星期一, 4月 2

101

即刻諗到董太係牛頭角邨沙士見阿婆時, 戴住豬嘴, 成個塑膠太空人咁講: 記住記住, 唔好唔好, 買任何 101, 乜 X 101 ...

我知道咁寫法, 會得失好多身邊朋友, 但如骨鯁在喉, 不得不吐.  幫朋友咁計尐 101 投資連保單, 真係愈計愈把幾火, 真係同殺人放火, 有乜分別呢. 表面係一張保單, 但用個多一或至十巴仙嚟保障, 咁仲係保險嗎? 為咗逃避規管, 求其改個名, 同賣迷債有乜分別, 個保險局就係第一大罪人, 點可以畀尐奸商漁肉小民.

個保險員推銷個陣, 緊係講話供頭一兩年就得, 其后任你轉, 攞番唒又得, 咁一下唔覺意就同佢簽咗十幾廿年約. 到你戥錢使時, 或不滿意基金回報想回水時, 咁佢個尐逐項收費就逐樣同你講番嘞, 連尐大學講師投資五年七載, 都係剩番條毛, 就知幾惡劣啦.

佢地實想推你去買廿年單, 供咗頭一年, 基本上個客係無得走, 走或唔走都係輸硬. 簽約個時, 佢地都有個所謂 ICP, 即係初始投資, 即大約為頭十二月或十八月供款, 掛名就話投資, 但其實係全期既基本佣金, 以廿五年為例, 即係每年用四巴仙去扣 ICP, 直至完合約為止, 中途退出, 剩底既 ICP 就會全部沒收, 以下表為其中某基金單張所例:

Remaining

term (years)
25 24 23 22 21 20 19 18 17 16 15 14 13
Surrender
charge rate (%)
100 87 84 81 78 75 72 69 66 63 60 57 54

Remaining
term (years)
12 11 10 9 8 7 6 5 4 3 2 1 –
Surrender
charge rate (%)
51 48 45 42 39 36 33 30 24 18 12 6 –

之所以睇落好似無 load, 其實個 load 係大概六至七點五巴仙, 即係未打已讓右拳, 仲係最早最應可累積個最初資本, 想跑贏怕且股神都做唔到.

呢個先係頭盤, 計落尐公司仲收你乜:  年管理費 (0.75-1.25%), 固定年費 (hkd550-750), 轉換費 (0.15-1%) (如轉基金的話).  仲未計個尐真係去炒既基金公司既收費, 我就估要用三巴仙一年嘞, 怕且要回番尐畀個推銷公司呢. (nb 我無睇得咁仔細, 但斷估佢地尐陰招, 想退出時上高剩底既年期既雜費都要計咯, 仲有條毛嗎?)
以以上數字, 就當個長期大市回報為九巴仙, 以廿年合約為準, 中途退出唔好計嘞, 除非你只供咗幾期, 咁就直斬好過嘞. 個廿年既總回報同你蓄廿年差唔多一樣, 連息都無, 記住廿年后連通脹都未計喎. 咁個九巴仙回報去唒邊呢, 咪去唒基金公司同中介既口袋囉, 投資者係一分都攞唔到.

以上只不過係最好既結果, 如果個投資者追脹殺跌, 或佢中途退出, 個結果一定差過以上. 咁呢尐仲係乜投資呢, 當然係保險, 保人地尐持續性剥削盈利囉.

2 則留言:

  1. 每年管理費收 (0.75-1.25%), 唔算貴, 比強積金低好多喎. 當然, 仲有其他雜費, 視乎你幫趁邊間保險公司, 以及公司嘅邊一種101投連保, 收費高低嘅差別好大, 要小心, 睇真至好買.

    回覆刪除
  2. 記憶所及, mpf 尐年管費大概係 1.25-2.xx 巴仙左右, 但而經畀人詛咒. 睇番尐 etf, 2800 低過 0.1 巴仙, 經廿年滾存, 就差距差唔多一半勒, 你話大唔大呢. 一兩個巴仙睇落唔大, 已經係咁, 但呢尐 101, 個使費係 1% + 650 + 0.2% + 3% + 1.125% (icp, 以最后全額計) = 5.3% (開頭大得多)9 + 650, 條總數只勁, 尐一呀二呀都係砌呀數者

    回覆刪除