星期三, 3月 7

膠波

二月初大地震,由花旗傳到北方,到昨日仲要微跌破咁話。話係熊市開始,怕且無咁快啩,地震都要有 ALPHA 波同 BETA 波,就當係 A 破嘞,咁都要等 B 同 C 波, 但一日過千點同美股咁跌法,就當係第一個訊號吧。有尐人話睇三萬八,我就不嬲都唔估頂,等回個時沽或反彈到三份一都有蘇。如再調,二百天線, 大概係廿萬七中左右都係入位了。如繼輸既話就學股神揸三十年咯, 包唔輸過債喎。

美元呢段時間強番但港元就創新低,即係有人走資了。見每日上高買貨淨低都低番,就當鬼佬做嘢無分別,咁即係要班師回朝。但上高登基場大龍凰搞緊,咁即係要起碼要過月中先有水回番賭埠。中長線話要加強融合,咁除政治外,咁去買番一半以上股份都係基本動作啩,咁即係要入大同有地個尐二三線咯。

啊 TRUMP 要提早搞選舉,咁以佢講咗當做咗既性格,咁尐貿易戰都怕且係選舉動作而己,就好似佢搞基建一樣, 都係整色整水而已。可能簽幾個行政命令,搞幾場新聞蘇,拖到選舉前為止。反而 APPLE 話生產線番噃花旗,睇佢開左幾間大廠,同上高外匯存底同又走幾間大廠,對外匯及息口走勢可能更有啟示。

派五百億都可以天怒人怨,起碼都算前無古人了。咁八成都派畀尐百萬年薪啊,大地主啊, 都唔好怪尐啱啱畢業同主婦同搵朝唔得晚嘈到拆天咯。尐人話派六千蚊,咪益左啊李生咁咶,咁派幾億又見佢地嘈,六千蚊就話唔公平,真係佢地小學計數學屎片啩。如每人六千蚊,當加埋畀細路仔嘞,咁即係五百億嘞,咁比較番射到深圳河河套既五百億,錢同地係香港人畀,但地係深圳用,請既公司同人都怕且係深圳來,咁不如每人買一個 IPAD 一個 IPHONE, 起碼可以打 ANGRY BIRD 消消氣,格吓價起碼可以幫本土賺番尐 GDP,又唔使第二期啊,第三期啊射落河了。高鐵遙遙有盡時,科技綿綿無了期啊,大佬。

坊間話政府儲備加外滙基金加埋同已有五萬億, 即係每人有七十萬咁話,仲未計尐小金庫啊同尐乜未來基金啊或土地發展基金啊。唔計地同已起既樓,咁即係可以起三百五十萬既公屋同足夠既醫院老人院加長期退休金了。咁政府每年都有錢收,咁佢既儲備既比例係咪要有合理既定量同其解釋呢?就當減一半勒嚟維持聯繫,四份一明明白白供獻祖國,咁淨番四份一都可以足夠解決以上所有問題,咁點解所謂唔係守財奴, 有新哲學既現政府,有資源但當問題睇唔到呢?

沒有留言:

發佈留言