搵食

今個月升回呢幾年既阻力處, 種種恐懼同追悔又一一告升, 但睇番大圖, 都係冉冉咁上升同大成交埋尾, 今次都怕且有七成係呢一季破頂, 年尾前應收高過二萬六, 怕係二萬八樓下, 睇下今次可以錯幾多.

惠理連今年初位都未到, 仲有水位可以補追; 中石油啊周老虎撲出, 都係回槍一下而已; 宏利點左穴, 但息都係要升番, 都怕且最差唔會脫腳得太遠; 133 三年唔發市, 睇下 a 股效應點威; 鴻興財務調黎調去, 實則都係要睇下大環境, 今季都係要睇位買尐.

大廈十日停電, 個個阿婆焗到成肚火, 翠華話唔好阻住佢搵食, 唔肯電改. 終於要搞到佔領翠華, 先達成共識收市六個鐘黎電改, 一個晏晝就搞掂. 咁尐阿婆有冇犯法呢, 阿翠華有冇依法甘要尐阿婆去賠償尐佔領間既損失呢, 當然佢地可以咁做, 但咁係咪合情, 或合公義呢?

殖民地教育都係叫尐蟻民做順民, 搵食者, 使唔使咁認真先. 但搵到既錢, 係咪同勞工法例有關先, 你食入口既係邊個檢查先, 尐錢係咪夠供樓活兒呢, 你兒子係咪接受到公平既教育機會呢, 一連串問題, 係咪搵食咁簡單先, 如你不爭取, 畀人自動代理, 而家咪係一個辦, 睇下而家有幾多人要退要移民呢. 你搵食, 出邊尐人要入黎搵食, 咁係係咪有權阻止先? 你搵食, 人地要卡住你唔畀你搵, 咁你又無渠道去反對先? 就算而家有得食, 你擔保實跟住有得食嗎?

食藥要苦, 針灸要痛, 如舌頭反對食藥, 四肢反對針刺, 當然合情合理, 但最后要跟住身子沉入黃泉, 諗諗勒. 其實大家有共同點, 唔係唔可以溝通下卦.

毛巾

半年跌過少少, 波幅都係咁窄, 睇爆都係要係下季內.

大孖咁博傻咁去抽新股, 今月已證明失哂效, 賭得愈太, 輸得愈勁, 好似馬交尐檯, 尐賭仔禁哂旗鳥獸散咁. 睇孖數, 睇 ah 差價, 但貴就係貴, 無打折, 點砌出黎都係要死, 仲係死撻撻個隻; 咁要平 pe 個尐, 少人都唔係托, 真係要想滅絕個市場咁, 其實尐保薦係度諗緊乜呢.

267 都係要搵人認頭, 橫左咁耐, 都係睇弱多尐, 沽左就轉隻大隻價值股, 平就得勒.

明天七一怕且都預有人演下佔領, 帶定 goggle 同濕毛巾勒

自由

反脆

既然變左型, 開頭入都係博鋼鐵業復蘇, 雖則真係無乜苗頭. 賺個尐就當係橫財, 分番去 347 鋼個邊, 減低注碼黎對應番個信心同所知.

如果有睇 Anti-fragile 呢本書, 咁應知道佢個啞鈴組合, 即係大部份 (八成以上) 係極低風險資產, 而其中一小部份則配置於高風險高回報之項目, 則其回報則程其正非對稱性, 即係輸個時可以保得住大部份本, 贏個時都可以跑得唔錯 (let profits run), 可能好過大市咁話. 其回報不取決於選股甚或時機, 而是其暴露風險之結構. 反而常人之集中組合或所謂中風險組合 (如七三股債組合或全賭股) 脆弱性太高, 跌得太勁唔夠本反身, 心理上亦太易投降, 甚易沒頂. 回睇自己組合, 其實都係十之二三跑出既係組合既主回報, 理由都好似同最初設想無乜關係, 好似私有化或炒緊軟件類咁, 而其他弱既要求都係唔好輸咁多者或有市場回報而已.

愛與和平講左兩年, 但紅衛兵十幾個游勇就迫到要反轉自由行, 大佬, 一個星期已經係天荒地老勒. 同上高講理性, 都由八九講到而家勒, 但人地東德人一推就仆哂係度, 邊個話唔理性就係唔理性呢, 可以咁講, 要一樣野發生, 如只用理性既話, 咁就一定一事無成, 唔係阿當個代早就滅絕哂囉. 今次火藥就齊唒, 你唔識引導, 仲要壓住咁話, 咁怕且要無序咁爆, 唔係燦爛, 而係慘烈. 唔好自己呃自己勒.

貪瀆

阿 267 變身做金融股, 其實同當初買入價值同博鐵價回升已有出入, 正路應該要沽轉其他, 個個配價都唔少人做成份, 但睇黎睇去, 真係搵唔到乜黎轉, 算把勒, 橫掂咁多都係高位無食, 盤 pei 咁話.

上高搞咁多財技抽水或扮注資, 都係要弔南水去救北者. 但上高咁屈機, 咁多老鼠同干擾, 紅又唔分, 想唔當係賭場都唔得勒, 尐人炒 ah 差距, 好似捉錯用神了. 睇下貪瀆指數, 可能搵下使費好過勒, 長就你諗你咯.

風雨

尐地產股猛咁抽水, 連獅王都要抽埋份. 都講過炒供嘢都要一年內了斷, 拧轉頭阿鄭生兩年內又要供多次股, 1125 高位無套哂, 但係贏住走就算嘞, 橫掂大把低位可以撈. 中材真係睇唔透, 唔郁都係策略呢既. 蘇联一出兵就話油價要猛跌, 調轉似多尐囉. 中信真係估佢唔到, 但以九六九七年經驗, 都係有排炒同水位啩. 招商一貫咁弱, 博吓佢又面值回購番, 兩三成幾日都有之. 中通信似乎跌定, 4g 點都要建啩, 都係左手袋右手, 跟住都有得數飛咯.

上高話一錘定音, 又話選舉係法律問題, 屈尾十又話要係上海做個鴻門宴, 一句講哂, 就係大石簀死蟹嘞. 上次秘密會談已成功分裂泛民, 今次邊個做宋江, 就必畀人打把之到地獄去. 而家唯一可以做既, 就係堅持公民共識, 而唔係枱底交易, 而家網上平台都做到七七八八嘞, 唔係就係自己搞公投囉, 大把熱血義工嘞. 而家風雨如晦, 群魔亂舞, 都係當大戯咁睇, 慳番啖氣, 留力係七月至年尾, 起錨好過, 那邊太陽花正開得燦爛呢.

壅川

月結前挾淡, 但建材同金融都係要藥煲. 睇落好似好强, 但一月效應咁跌法, 真係心有余悸, 重貨都係無乜好做, 都係要睇天. 但無貨咁既估值下, 點都值博過歐美, 雖則睇圖真係幾肉酸, 咁又要落番到底係用估值, 定係睇時機嚟個恆久既決定嘞.  2722 大部份人話要沽, 但沽極都係度磨, 咁反而愈嚟愈值博, 阿通信猛畀澳銀咁沽, 但諗落真係無乜壞消息, 3.5 樓下中長線真係入得過.

今個月尐新股唔係派都成手大蝕, 就係派得雞春咁少賺得仲微, 真係連時間哂埋都唔值. 孖到去 b, 當你有賺, 計落風險真係唔值, touch wood 係截哂飛時海潚撲過嚟, 咁你尐過百萬按金真係咁先, 仲未計輸突, 咁就算連贏十年都清哂嘞. 而家 a 頭無哂癮, 咁即係 a 頭派得好番尐, 咁不如分飛陰尐陰尐啄好過咯.

咁多年斬人事件邊件破得到, 咁即係第四權任人强姦, 要個個做寒蟬. 練工夫都要十年八載, 帶埋刀番工同行古惑有乜分別, 咁記者唯有個個用哂筆名, 好似民國記者咁, 但都係要比特務咁去狙擊, 怕且都係得啖笑, 怕且新聞要小說化或寫番幾齣雍正, 風花雪月囉, 正所謂:

早春杜鵑白日寒
班竹碧血見路旁
抽水嗟嘆聲聲急
呵呢吉帝過多場

抽水

係咁以就嘔突上年賺個兩三巴仙, 買咗最熊既 a 或新興個尐仲盞. 上個月未就話試高阻, 而家就要試上次個退市底, 唔講費事自己嚇自己.

股仔唔係跌得咁容, 最傷都係個尐內銀股, 真係擠極都有. 佢地尐信托都有成年回報八巴仙以上, 咁就知真既通脹有幾高嘞, 香港畀自由行同食品帶通通脹, 打個平均就知個官謊真係幾膠. 花旗都話用 siv, 起碼賺都佔大份尐, 而家仲要包底, 咁不如自己炒好過, 或真實行中小企貸及住穏尐囉.

脫脚

百萬倉今年跑到 18.6 巴仙, 相對番恆指個二三巴仙同 ah 既負回報, 都算過到関; 但比起美市或一路畀睇死既日市, 仲未計尐小型股 etf, 都係掹車邊咁話; 可知分散投資既緊要. 當然而家 a 股亦都被睇成籮底橙, 但好似日市, 幾時彈, 真係莫宰羊嘞. 但以以往輕驗嚟睇, 買得低點都係有 so, 易把握過時機.

美市持續跑贏世界其他指數, 大街表現亦無得質疑; 但收水下, 金市已跌破千二蚊大關, 14 年都係要持續創新低, 每一次反彈都係沽既機會; 日元創低去製造通脹, 但佢地個心都唔想過 120 先啩; 最近新興市場陰陰咁跌, 同第一市場走勢相反, 即證明尐籌碼都係喳係歐美人仕手上; a 市真係連牛一第一期反彈都未到, 但各市持續創新高后, 點都要最后同步, 睇吓點喪升吓, 不過真係好似零六年咁都怕且.

番睇番每年尾既組合, 似乎係低潮時都選得唔錯, 唔郁而家應好得多; 係高潮時如留到而家都怕且一早要爆煲了. 怕且要回到基本步, 都係要沽弱留强, 有尐真係好明顯跌落陷阱, 拖吓拖吓又一年, 換其他就真係太無謂, 換走太多以后强勢股, 未畀夠佢地時間表現, 等個時起碼比較起都唔算弱.

突破

巴西同國內都係死下死下, 就算升起上嚟都係好難跑得贏大市, 大額就應咁玩, 但百萬倉都係要博尐, 轉去鴻興, 博佢今次真係真反轉, 橫掂個價真係幾低. 806 上次高位都唔會咁渣, 牌面應會仲有一大浸. 啊招商仲唔搞下 spin off 或回購, 真係唔知仲有乜催化劑, 怕且要做尐嘢.

大市第三次去番二萬四以上, 其實成交仲未夠大, 但唔知係咪突破先嚟料. 但最近個一次底已係 19500 於今年中, 以往兩個就係 11300 同 16800 約莫 咁車上嚟, 睇下今次能否突破到嘞.

創新

四十大盗話要創新, 咪即係搶指數基金尐錢囉. 其實搵大錢, 都唔係一定要靠股權排到最后去博, 睇番股神打救美銀知衣, 都係主入優先股, 爆起上嚟都唔會喳都無哂, 仲要搭番夠認股證, 彈番上去就賺番鋪勁, 係一個經典既不對稱招.  而家本地既公司債散仔唔可以即市買賣, 一爆煲咁就一定要等白武士打救先得. 花旗想博會買入大折讓既高級債或優先股, 等破產后換入新公司之股票或延期之新債券, 咁好過尐 equity 沖到淨啩. 投資高科技骨水股本地好似無乜邊個有得賺, 唔好講個尐蝕咖嘞, 去撈底用債似乎穏得多, 個回報率唔會差得過用股票囉, 衰上嚟鬥長命起碼好少機會變零, 當然要識排隊同計清楚真係最尾剩番幾多.

貧窮

268 尐軟嘢好似再炒唔起, 咁沽咗泊係新興收息, 同轉落電機去博多次大霧. 3993 股東又押股, 自己注碼太重, 咁又勻尐去其他資源電訊, 都係水兵鬥水蟹, 橫掂都係一齊爆. 伯老要嫁又唔嫁, 反口就反口, 本來想收水行先, 但最尾都係睇通脹爆上先算, 或起碼失業率落到六以上先算. 中線收息股或 reits 都會彈多一彈, 但尐債就趁機走大部份好過, 好過事后揼嘞.

啊大盜同尐財俊話香江盟塞老土, 無哂創新去吸引尐新型公司喎. 上次大盜點表演尐財技同掠水法, 都唔使我重述一篇嘞. 用土共既思唯嚟千秋萬世, 今日過癮日后怕且日后都要親自受之, 小股東就更加係俎上嘞. 其實 ab 股都應有一定期限, 譬如十年內逐步減至同權, 都夠你表現啩, 唔係就退賢嘞. 小加事后補飛, 做哂所有醒目仔指定動作, 但香江既信譽都係要尐人傻傻咁堅持, 好似古人話齋, 義者, 才是真利長利, 而唔係話前眼前豆豉個尐, 或要市長頒個十幾張投命狀.

用中位數一半嚟定義貧窮, 咁假如下底個尐派多尐, 幾年后亦會有一定人係中位數一半以下, 咁即係要一路重複咁派, 咁同要將自己扯上半空有乜分別. 香江有無絶對貧窮, 無飯食無褲穿, 咁都怕且無啩, 咁定出嚟都係相對既有無而已, 對立太誇張咁又係太肉酸既. 相對既量度最普遍既係堅尼系數, 想勻尐咁就唯有順天道而行, 捐有余而補不足, 要以稅收再分配及整合福利政策嚟補鍋. 一個家庭既收入除咗份糧之外, 被動收入都係真啩, 咁就將尐股樓債淨值乘以十年債息率, 再加以接受到既公共補佐性福利既折現值, 咁就怕且有個似樣尐既全面圖像嚟微調, 當然唔係叫政府去清查所有市民既財產, 而係抽樣調查啫.

回收

	Sh	Price	Sum
Sell
268	38000	2.37	90,060
Buy
945	600	126.4	75,840
1125	82000	0.173	14,186
Commission			540
		Cash Change	−506
		Cash	339

個谷哥又死死地， 都係記録個買賣算。尐軟嘢升得咁勁，但上次珠船沽早咗都係要后悔，食都要慢慢嚟。十年息係咁升，又要收水，咁宏利真係實食無痴牙，1125 太少貨， 咁就補番尐，36 都有板睇囉。

呢一個月尐新興係咁跌， 雖則大中華早跌成半年有多，但係套息盤收水下， 唔跌先至怪。兩印沖沖咁就無咗二十， 都唔好話唔傷喎。但今次係每況愈佳， 而唔係日泊西山，如已發展要再持續買屋，再去增加消費， 咁新興都係可以慢慢多番尐生意啩，而且而家尐國債都無以前咁誇， 所以中線我都會睇高尐，當然睇位低尐買會安全尐既，不嬲都係架嘞。

癈物之中超過五成都係廚余，剩番個尐都係紙鐵膠。紙鐵回收都算係幾高，仲要堆填既都因而家未有廢物收費同唔方便住戶揼啫。如果政府承諾尐收費全用嚟環保同合理回水畀尐低收入戶，相信要過立法會真係話都無咁易，點都易過擴堆填同起焚化爐啩。咁又係，又要做多尐嘢，又要諗爆頭，又唔可以持續咁使幾百億，又唔可以徵地，有咪為先。係收費下，如垃圾房附近已有收紙收鐵箱，咁個一兩成咁就解決了，將尐收入分尐畀清潔公司，效率當然高得多啩。以前都有哨水桶收埋嚟喂豬，而家話用嚟做魚糧同肥田料，係得既而家就唔會多到溜出海嘞。收費當然是減廚余既不二法門，但政府都要讓尐利出嚟先有人係有規模咁投資，而唔係嚟扼津貼。用嚟喂豬又好，做乜都好，只要合符合最低環保規定就得，收既成本可以係零，十年后真係有錢賺先再講公平競爭嘞。膠同玻璃不嬲都係難回收同勁污染，咁一係提高入口稅，一係要廠高實名回收先至有得救嘞。

禮義廉

見到其他金三都脫唒脚, 再收水係咪想硬食先. 但入面買礦偷食有之, 上市即做數又有之, 被你扼一次都話, 係咪可以成世做傻仔先. 咁唯有畀個折完再大減價, 做番高個風險溢價, 咁就係低價磨, 話知你保七定保三嘞.

呢幾年係大陸仲揾到食既唔係炒波幅, 就係自己做庄個尐先可以有得賺, 唔係就唔會個個變哂僵屍戶. 大個尐係有佢既霸權, 但係民粹同無驅動力下, 錢係賺多咗, 但債亦多咗, 估價亦愈趨向下. 民企十九都係騙, 唔買好過, 歐洲股神有板睇嘞. 創業板香江無得抽, 如做接火棒, 你話嘞. 其他理財產品又話要爆, 怪唔得只剩買樓一途矣. 諗番自己都咁心淡, 都係一個信号嚟既, 咁唯有就睇位做嘢, 橫掂每次升都係外資做嘢先, 其他都係跟風啫. 睇位買 2823 可能已經夠, 但呢幾年都係分嘢有效尐, 咁分尐都新興同邊沿高息, 再跌都有得圍數.

商人眼光狹隘, 只見少利, 不見公利. 古代寒瑩十年, 心無旁騖, 先可以論道. 現代花旗大都是律師出身, 終身從政先可探得高位, 就算有把柄亦早有防火牆, 技術含量頗高. 如視權位為槓桿套嘢工具, 或每以良心自許, 厚皮賴死奮進骨水, 咁就要拿把槍對住路人係咁掃, 先有機矣.

收水

今個月跌咗成千六七點, 最低時仲要多個一千點, 都唔好話唔夠絕. 睇吓美息可以由一點六急速升到二點六, 就知跟住尐按息可以升到去邊樹嘞. 回想未 q 時, 十年息通常係四五厘左右, 而家尐香江定期已蠢蠢欲動, 而家暫按息係二點五左右, 今次咁升上去, 起碼四厘係底, 上高都怕且睇到六厘啩. 而家大話精配合尐樓花放到三十月期咁玩, 送尐后生矇董一程, 尐后果任內都應睇到啩, 雖則佢都做唔得幾耐矣.

先前入尐資源齋睇 rsi 嚟撈, 又中左技術降, 今次食得幾應, 仆到直一直.  追悔都唔係我等為之, 睇番組合內資源博得太多, 唔減都唔好再加, 事必要記住. 今次里面銀根抽得咁勁, 外資拆倉下尐人民幣都要回軟, 係整治非規范貸款下, 短期內中港市都會升得起, 咁就要有耐性慢慢揀肥而噬, 反正估值真係無話可說, 大爆炸輸咗都可以守啩. 阿邱生今浪都無乜走樣, 荷包又咁緊, 都算係奇蹟.

133

今日截回購以五巴仙持股每股 20.94 元, 收市當以認購價沽出收市價補回 900 股, 多出現金為:

900 x (20.94 - 11.28) x (1 - 0.3%) = 8667.92, 最新現金為 11879 元.

386

今日十送三, 由三萬股增至三萬九千股.

機率

今個月追番唔少, 雖則個市仲要穿番年初個位.  珠江話發尐認股證要炒上咁話, 但十年都無人唱, 食到咁足, 都係唔好似以前, 有食唔食, 彈去三蚊個尐都唔算係投資既功力囉.  中石化送多三份一紅股, 即係又要係散仔揼多次荷包仔, 呢尐向下炒陰招只怕且阿爺先做得出, 咁趕客下, 畀傳媒力吹, 仲唔雞飛狗走, 仲要加多脚沽多兩嘢. 但基本睇唔到咩改變, 咁就遲早彈番去市場回報, 雖則唔多, 但機會率都頗值租囉.  隻大眾真係郁到唔郁, 鞍鋼係殘, 但起碼仲有波幅, 當買個希望嘞.

安祖蓮娜做咗切除手術, 有尐人話明智, 有尐話發都未發, 咁做係乜有尐畀人誤導.  如果個情景持續咁遇, 除咗人地既數據外, 自己都有個普, 咁都可以用期望值或最低損失項嚟估或其化方化定性咁選擇.  但好多決定只係得一次, 就好似走難咁, 走或者留就連命運都唔同唒.

切咗就係切咁, 功效如有, 即係咪都觀察唔到, 咁怕且做決定嗰個會否后悔呢.  唔做亦未必會有嘢發生, 咁係僥幸下都唔好話唔會諱疾忌醫嘞. 但賭個樣係絕對唔輸得既, 就算幾有把握咁都係無得賭啩. 但係賭既注係輸得起, 咁就要秤吓輸贏既對比, 當然要加權以各自發生既機率, 其和必為一.  賭嗰個可以懷疑專家畀出個機率分佈, 佢唯有自己對多幾個來源驗證, 但佢自己斷估出嚟或情願作出既斷估, 怕且唔會好得過現時可以作得出最好既平均啩, 做出判斷係難, 唔係計算個種難, 而係係個樣嘢仲未發生就要痛苦付出個種難, 仲要加埋后悔個種澀, 呢個就係理性同唔理性既分別嘞.

平衡

百萬倉繼續跑輸, 要大大超前都係要付出高波動既代價嘞. 月初大家睇得淡, 個市就用幾日又升番高位, 都係唔做好過亂做.  花旗市迭創新高, 但無人話牛市已到, 雖則尐大戶都布署得七七八八矣. 無可否認其為領頭羊, 睇吓尐金融股既强勢都好明顯了, 雖則係濟后, 但我唔會將新興睇得太淡, 係牽絆之下, 都係遲早要升而已.  日元跌咗一排, 金市就超速完成大調整, 有尐人話係升之前既大調整而已, 又尐話長期熊市, 但上高高位一浪低過一浪, 以炒家角度睇, 都係逄高沽有數, 止蝕可以有限, 下低食落就啖啖矣.

尐基金經理話降低金屬資源股比例, 咁怕且係開始見低既信号, 如個市要上, 個種升法都係唔係咁品, 橫掂而家跌到咁既位, 再跌都係有限數嘞, 當然要自己限碼, 0.1 跌去 0.01 都唔係咁盞. 金碟收入減低, 都係怕且係公司延長投資, 躲避經濟風險, 但只要尐公司要古惑咁出報表, 都係要搵尐土炮去揼石仔, 都係無得走雞, 爭在幾時 u turn 啫.  中信都係被開礦期拖延困擾, 都係等時日而已, 最后都係要落單.

hit 有香港七成市佔, 已有獨佔既力量.  仲要將尐部份工人打散去各関連外判, 無联合下工人係根本係做 hit 既 price taker 而已. 如無工會介入整合各游勇, 根本無得鬥.  如係花旗, hit 早已畀打散九世了, 尐大袋反對起十号碼頭, 減低自己生產, 提高貨運價, 對香港當然利不抵害.  嗰個競爭法都係怕且無佢乎, 但阿李生隻手遮天, 政府都唔會咁易控到啩, 阿梁都近唔少囉.  工會如成功既話就會限制會員資格, 和以工齡做分界. 要保持流動及生上力, 唔偏向是但一邊, 年會討論薪酬人事, 需由三方包括政府代表嚟攞個平衡.

春夢

衝唔到就要落番嚟, 雖則花旗已迭創新高. 賺差唔多成倍, 係咁碌落嚟, 仲要升 st, 雖則心口有個大勇, 但都要攞番個平衡, 縮短戰線, 減低些少風險先, 耐玩先係正路, 無咗就係無咗加嘞.

上高猛咁收銀根, 仲要堵塞番尐風險債銀行渠道, 個微調都係要控通脹為道目標, a 唔升, 香市都幾難升矣. 再加尐咸水沙, 無底礦, 縮骨鋼, 真係唔知要守幾耐. 唯有可以知既, 就係要係心慌低位, 慢慢, 慢慢咁溝, 唔係尐茄鼠擺咁耐都唔知做乜好嘞.

阿貪曾話玩鋪勁, 都知從政都係口嗑嗑啫, 都怕且要自己落場先有效. 上次尐四五十歲既中坑民主握完手, 咁又反轉話唔愛國, 又畀人搞到分裂埋, 呢次怕且無人再做傻仔囉. 咁難得有個催化劑, 今次就要眾志成城, 為神工, 為弟子嘞, 希望係渺茫, 雖則禽獸只要飽食男女而已.

稅基

衝力射球, 上得急, 落得更快. 尐三四線, 剛剛炒得不亦樂乎, 咁就由賺一個開, 跌剩番個零頭, 都唔好話唔揼心, 但要食幾倍, 咁就係要付出既代價嘞.  坊間話回補裂口, 而家補咗第一口嘞, 如未跌破 21800, 向上之勢其實還未受到最大考驗.

有尐股真係一路係弱, 要等佢爆, 真係要等到天荒地老. 倉內無乜邊隻唔係抵, 咁不如就趁呢次調整, 咁就去轉弱去比較强, 估值都唔好話沒陷阱, 數目少尐, 睇路都無咁哂神, 當自己做馬戲團雜耍嗎. 跟住每月有機會會慢慢做, 希望縮番做十個左右, 仲避免番尐種類重叠.

今年四月尐有老人家開始攞到廿千鬆尐, 呢樣我唔會反對, 雖則無印花稅回贈. 但全民退休, 我不嬲都反對, 而家呢一代緊係拍枱贊成, 但咁用下一代爆煲呢支撐, 咁係咪負責任既做法呢. 需求當然無窮無盡, 但自立自足是做人第一要義, 唔通好似要求共產咁做到生養死葬嗎, 係咩后果往績已有眼睇嘞. 香港問題根本就係資源人才錯配, 將安居樂業既房變做炒賣工具, 生死以夢之, 做成最昂貴既囚籠, 做樓價既奴隸同共孽. 當然我唔會激進到話要平均地權, 盡皆王土咁又係死路一條, 但古語都有訓, 走得了和尚走不了廟, 唔稅多尐地主個荷包, 唔通仲稅尐畀壓迫中既小民. 尐租金緊係去到盡咖嘞, 同你有親嗎, 咁攞咗佢都無乜空間再追加尐租戶囉. 尐人實話會減少供應, 但咁既回報率, 都怕且全球第一, 尐資本會流出去嗎, 再咁講, 西德咁管制下, 咪個個要瞓街. 將尐稅種均勻尐穏定尐, 等尐少民少商戶可以喘番啖氣, 咁係咪合理尐呢, 雖則個尐地產路既打手會畀你過嗎?

衝力

今個月衝呀衝, 尐三四線炒到不亦樂乎, 新股都番嚟, 雖則隻中女押尾又要搞吓局. 上星期尾尐三四線突然一插, 尐人又開始呼狼來了, 怕且騰雞咁多年, 呢個盛宴無咁快玩完既, 仲見尐人猶猶疑疑, 但個美經濟真係愈嚟愈似樣, 要食大都係要尐耐性啩.

組合內有好消息既絕無謹有, 壞消息都佔大部份嘞, 但偏偏係咁升到半空里, 都係睇前咁計啫, 暫時每一次調整都當係低吸機會. 阿麗丰話有百億咁話, 都係要開始打上要派, 既然係中期咁投機, 都係要一路上慢慢咁沽. 宏利呢幾年猛咁增發, 賺番上都唔夠補番溝淡效應, 同全行咁比, 真係要揼心.

年結

本來想買番所有麗丰, 下過遠東咁鬼抵, 怕且官非后, 阿邱家唔會走路啩, 都係同佢鬥耐性而已, 橫掂啱啱二供一, 又係左手交右手, 又係統計低位, 都係走高機會多得多, 好過擺現金囉. 大眾真係好鬼眼冤, 但教訓太多, 轉都要唔好一次過轉, 慢慢轉都係一樣, 仲可以睇耐尐, 自己既反應都係信号呢既.

粗略一計, 而家既注碼又去番一一年尾既高位, 用咗兩年既時間去番先前既位. 朋友有尐心雄, 有尐遲疑問係咪再升會高得濟. 股市高低其實用常識平常心估自己都知, 唔使用數學模型份扮高深嚟計囉. 雖則自己成日係個心入面畫圖, 其實落實都係睇係咪過到自己個関而已, 想一買就贏或一年內必有收成, 真係發夢好過囉. 點解散仔十個之中九個輸, 都係走唔甩個情緒管理既問題, 專業炒家更加唔使講嘞, 學吓觀心或寫投資日記好過嘞.

每隻狗都有佢既好日子, 上年係相對低位加高風險卜都直一直, 今年年中咁做效果真反哂嚟. 方法無話好定壞, 表面情形睇落一樣, 其實細睇都係有尐唔同, 差之毫厘呢. 以 347 為例, 上年咁調都係去番七八蚊個位, 同近期個廿蚊個位都係調多一半啫, 係咪值博個位呢, 以佢地既波動性嚟睇真係未到位囉. 如個時溝個尐係中間既或低波動, 個組合就少尐肉酸囉, 雖則彈上嚟會贏少尐. 今年尐二三線真係到哂位, 就算大爆炸都可以一守, 值博得多, 到最后, 都係估值同統計既判斷同執行.

睇經濟學人尐十年對沖基金統計, 扣除個尐基金收費同獎金后, 都得得個二十巴仙左右, 反而保守咁六成股四成債都係一位回報; 而十年有九年都係跑輸 s&p, 除 2008 外, 不過都係 marginal 而已. 咁咁多富豪榜都係尐對沖基金經理, 都係正確既. 如果真係想對沖, 都係現金或中期美官債基金足矣.

茶怪老作: 聖誕過後

茶怪老作: 聖誕過後

套息

盡沽 1125@0.207, 十二月三十一日收市價全數買回.

五十

雖則未到年尾, 但 A 場連鑽石底都穿埋, 加到咁重中華成份, 尐乜强積金同真實倉, 想唔跑輸真係幾難矣.  但見到入面哀鴻遍野, 出面尐散仔又雞飛狗走, 雖則話有增長陷阱, 但估值咁低, 乜都補番唒嘞, 中期輸真係接近零囉, 連少少損都捱唔到, 仲炒乜鬼股先, 轉唒去對沖或高息債好過嘞.

21800 突破今個月都算企得穏, 係咁以跌番去二萬一邊又彈番. 咁就當係持續突破已成, 下年都係要創新高去, 唔係年年都咁樣衰啩, 都要補番呢幾年既脫脚. A 場年尾要交數, 新曆年前都唔會彈得去邊, 可以十二月慢慢入. 阿經濟話要彈上番一萬, 今次都幾有機囉. 內房不嬲係春江鴨, 咁怕且相關股都要跟住郁啩.

阿廖氏一辭職, 個股價就一支箭係咁上; 估值點都無 626 咁平, 但人地一直炒, 你又要係到守株, 唔理尐催化劑, 咁真係無人幫個喎.  惠理咁年點都有尐獎賞咯, 市場似乎有尐疏忽咗. A50 係有溢價, 但折如 820 同 133, 最終係會爆升, 但可能係大爆炸前先有機會套現, 怕且真係要睇吓大股東動作做嘢先, 唔係真係畀佢地悶死. 啊 267 終於有鐵磁礦投產, 如派息維持到, 咁有實力下, 怕且都可以開始買啩. 606 啱啱供完嘢, 跌又差唔多, 又可以投機性買入囉.

中華知識份子都係老親底, 尐人唸吓開誠佈公, 咁就同佢地敲邊鼓, 好似尐愚民一樣, 真係信青天大老爺咁幫佢出頭一樣. 點知一個屈尾十爆煲, 咪又係五十步同一百步之爭, 仲要係加埋伶牙利齒尐既訟棍 FEEL, 先前尐承諾即刻走唒樣, 三個巴仙地話住成百萬人, 而家變咗原居民既酬庸, 仲要開中宣部同加大埋個政治梯隊, 分明係紅色滲透消融. 與其信上天打救, 不如諗吓點樣團結自保好過, 唔好望變好, 唔變差落去, 已經呵喱吉弟嘞.

耐人

上兩月話會有大突破, 升就係升, 但亦都唔係預見得咁誇, 唔準就係唔準, 再估過好過. 睇五年圖真係上高都係二萬五六頂住, 唔計個三萬上咁話, 下底就係個萬一同萬六二斜斜頂住, 都係向上機會多得多, 雖則唔知乜原因, 咁就當係花旗加上高除二嘞.

ipo 咩都死, 呢排興供嘢. 隻大美人又要供, 有家底同埋早炒低要收集既, 就話同你鬥耐性, 賺吓尐差價. 死供去話番身品牌, 咁咪係天真尐呢, 咁把炮咁不如開過新嘢好過, 尐人唔又係貪新鮮, 都唔知點解咁以前都可以做到藍嘢, 真係耐人尋味.

海潚前走咗個隻安全倉, 係六蚊左近, 今日怕係十一二蚊, 怕且無乜邊個咁有耐性賺得到. 自己倉入面都唔少咁郁都唔郁, 死守又唔憤氣, 走又隨時走宝, 咁怕且要好似股神買起變大股東先可以賺個價值差, 唔係內部點知先. 大包圍散仔做唔到, 本地尐價值基金都係以大價為主, 都係個十隻八隻大白象, 投機價值怕且難過估大圍.

懺悔

至今為止, 大市最大調整底為 16250, 而上次鐵底係 11015; 上證既鐵底係 1707, 而今就去到差唔 多二千, 唔使計都知上高幾弱矣.  反觀花旗係咁升, 唔知以為佢地保八多尐囉. 零八就上高做領頭羊, 今次就係西方樓市日出, 東方怕點都有尐滯后囉. 全世界都係咁印銀紙, 十八大上場后, 都要做旺個場先, 谷就未必, 但打壓怕且都無乜可能.  而家尐高風險股都起碼跌個五六成以上, 剩番零頭亦通處都係, 月尾指數都反住上月尐驚青咁貼住高位收, 怕且都係開大既勢多尐, 仲加埋大突破就近, 唔賭鋪大仲等何時先, 橫掂跌到雙底個衰殘位都唔爭在輸多廿個咯.

睇番國企既中期報告, 如少尐定力, 都怕且會一路滴汗. 買佢個時, 尐債仲係若有若無, 過咗一兩年所謂保守既就一半股本, 一半係債, 都算係本人既投資極限嘞; 有尐仲去到總債係股本既三四倍以上, 起因都不離以銀行貸款或發債嚟收購資產, 槓杆就大咗, 但盈利就一尐都跟唔上, 跌二成已算强, 跌五六成都不少. 上高股市半死不活, 圈唔到錢, 就唯有猛咁借. 咁就要定期檢視自己既持股, 要分清係乜投機緊, 雖則升起嚟會爽尐, 但一日上落起碼半成都唔係咁好玩.

最近睇咗本書 "Confession of Economic Hitman", 都唔係真事定係小說嚟. 但主旨不離講美帝國主義利用大企業如跨國銀行, 石油公司及基建顧問及建築公司, 誇大第三世界增長率, 再旁利用黑金, 間諜, 暗殺及軍事介入, 以令之破產以控制其政府, 以畀其放任提取資源及保証其忠誠. 當然其主意怕且老馬已一早破解, 但入面講述既內幕雖則有尐舊, 但同平時睇既西報都有幾大既差別, 要知道花旗對自己人可以民主, 但對外都係以利益行先, 睇番出面幾多暴君既盟友就知勒, 尐國民咪又係詐傻咁去取利. 唔好咁天真呢個世界會有正義超人, 爭取乜都係要靠自己, 唔好咁 naive 嘞.

暗湧

谷哥唔再 update 本地股價, 咁就唯有沽哂尐美股, 專心咁用 editgrid 炒港股去咯. 其實花旗尐官債行都變番黑, 樓價又開始止跌回升, 唔怪得咁鬼强, 現實點都要留尐睇門口, 想套戥都唔使哂冷咁轉, 兩三成慢慢轉都得, 橫掂個 game 都係成世咁玩, 使乜急呢.

a50 跌吓跌吓又去番個傳說既鐵底, 咁就用美股跌無咁多嚟守一半先, 點知會唔會跌去煉獄咁低. 尐二三線跌去未升時同幾年新低, 見位就自動做嘢. 珠江做內河運輸同珠三江既近海客運, 無乜競爭又有被收購概念. 廣南馬蹄鐵做得唔錯, 又有專賣豬牛, 咁低隻現金年仲想點. 金碟就古古惑惑, 但呢行其實同印銀紙差唔多, 入咗局都幾難唔畀落去, 用過 ERP 你就知乜事嘞.

820 獅王四成咁以淨值回購, 睇落唔會唔食啩. 市面好似見唔到 A50 期指嚟做對沖, 但有類似既 A50 或 A 股基金, 食個無風險既四巴仙唔好 (前提當然期內為淨持貨者), 都係個十日八日啫. 133 係咁做就呵呢吉帝囉.

前幾日睇報紙畫個恆指圖, 見到呢三四年由歷史高位三萬二, 壓二萬六, 到二萬四, 到近來既 20500, 下低就係一萬一, 一萬六托到最近既一萬九, 為超大型三角 WEDGE, 雖則最近波幅變少成交創新低, 怕且都係大波動前既暗湧而已. 用指甲咁亂畫, 個爆炸點就係九月尾, 遲至十月, 怕且買尐 CALL 可以博吓大霧.

討厭

成個月由萬九又彈番去牛熊, 唔理大海潚咁恐落去, 都係要執番張地圖咁估, 不離上落市咁睇法.  既然歐盟同花旗同新興都係唔畀個市跌落去, 就算唔番生, 最差都係要上落咁磨. 如果低位唔敢加, 真係唔知點可以有得贏, 唔通識高位去沽, 似乎高難尐囉. 呢一季民企同尐中投愛股係咁跌, 尐賊股真係無得估底, 咁就揀尐有背景跌到討厭階段既咁博一下, 預左仲要調, 咁就用一成咁去溝一溝, 賺就開心, 再調咁就再搵位再溝, 死守同佢鬥長命.

梁營上場, 雖則都係改唒口, 但推多尐地同居屋都係無得走, 唔係仲有乜師奶支持佢.  新世界睇位沽之, 咁去溝先前沽既碼頭同已持有既水泥.  廈門話要斬件畀人做郵輪, 跌去咁殘, 乜都反映唒, 咁就當佢無咁狼死咁去搶卦, 1893 早就想去溝, 估吾到可以跌個八成你睇, 溝就唔好估底勒, 眯眼就算咯.

過一個月就好似過左一世紀, 月頭月尾兩次大遊行, 同阿梁生增慶.  呢排睇書咁話, 主權打散左就等於無物, 咁阿老毛都怕且后悔起左個天安門廣場. 開頭都奇怪綠衣點解唔把把聲咁放, 好似個時百萬大遊行咁早收工咪仲好, 又可以畀尐小民出下氣, 但敵我觀咁督促下, 分明已經變左對壘, 禁少總好過開大, 交差都易尐. 咁都好, 起碼畀其他市民知道咪叫做乾煎. 但煎下焗下, 遲早出火, 怕且好似湖南咁, 無高官會信, 但事實終歸會事出來既.

深淵

呢排係咁磨, 有尐話睇番萬四. 其實呢半年都係得個六月三四兩日低過年初個位, 咁都算反覆向上卦, 雖則每月都有舊料再炒過, 仲未低得過上年下位 16250 住. 年初升既都係美國尐增長指標做得唔錯, 其實呢半年都無乜點甩轆, 回得快反而係上高同巴印, 夾埋愛琴海就將個市做低. 如睇住尐新聞同情緒去做買賣今年又剷多一層皮而已, 倒不如靜待其變, 都係一種磨練同策略黎既, 好過大巴大巴咁輸.

阿爺話可以推香港 etf, 香江又有 a 股 etf, 咁即係不久起碼又多一重套戥兩市既工具, 2823 有溢價, 但翔龍 (820) 都話要沽鬼哂尐 h b 股黎買 a, 好追番尐折讓, 封閉基金香江無幾多隻, 折讓由九折到五折都有, 咁都怕且唔少遐想既空間卦.

照劇情到呢頭十五年, 應去到第二任既一半者, 但都要俾隻 hello kitty 從無犯錯既狼上場. 唔係對佢無幻想過, 但一件事過到骨算你 ok, 但加下十件八件, 下下都唔關佢事, 尐口供仲夾到無縫, 技術上無犯過錯, 咁既機會率好似田雞話齋, 真係椄近零囉. 今次變陣明眼人都睇得出, 係革左尐本地一線地產, 連合本地同植入既左營黎做全面渣旗, 睇今次打唔到尖就知乜事勒. 你話一線仲有運行咁真係太 naive, 人地都係咁移動畀二仔勒, 咁怕且紅色同二線尐機會高尐囉. 但一個人從來無錯都幾恐怖, 仲要自己猛咁話先得人驚, 咁又幾似佢個老祖宗既, 唔係點會有 ab, 57, 64, 71 同旺陽呢? 短線港人可能有尐 so, 但有尐線係唔可以退, 后面就係萬丈深淵.

燒炭

年初的人仲話去二萬七八,今個月就狠狠跌回年初既萬八中, 咩牛都殺鬼晒. 希臘人要脅呢個大爆炸, IMF話點都無非洲飢民甘需要打救卦。姣婆要守寡, 都唔會忍到兩三年甘鬼耐勒, 都係俾的炒家咁舞高弄低而已, 但死氣頂住甘追牛, 好無謂咁炮灰羅。只不過係腥風血兩下, 只不過又整爆多個追高殺跌倉者, 人生又能有幾多個實倉呢。但睇番自己都好似危危乎, 舞甘耐都未死得, 怕都係一個奇蹟勒。

油係甘跌,唔知點解尐石化股仲跌得多的, 如果跌得差吾多, 轉番去石油股怕正路得多卦。西方企得甘硬正,也就沽渠黎溝其他。 一路宏利都守得唔差, 波幅夠大, 都值得去溝既, 大眾真係口吾想加, 仲要無厘頭咁跌,但照估值規則, 係甘意都要做的野. 尐金今浪避吾到咩險, 仲要倒蝕, 怕且跌勢已成, 石油起碼都可以開車做生產卦。官員冰火論出埋口術, 阿李生就話樓市健康, 量力就可入市喎。咁怕且只有三孫既力先頂得住個脫離現實既樓市勒, 證諸九七年初既樓市升勢, 係甘托住咁黎滲俾用家, 守得住七八年既還可, 怕未至如燒炭卦. 歷史話俾人昕, 唔好同政策對著幹, 而大升后未必會大跌, 但中期表現差不多必然差過其他類別囉.

看書睇到大數原則, 竟然黎解釋到為何美女會配醜男, 虎父會生犬子。咁自我安慰下自已, 係呢幾年得個吉, 仲未講倒輸個的, 但吽下吽下, 怕且跟住會一次過補番幾年尐回報卦, 要長期咁持貨, 真係要有的痴痴地先得。

大我

書商減左變左加番, 一係食你一大啖, 政府發悔氣要搞電子書甘話。睇下蘋果賣書夾硬都可以挾高三四成, 點關咩紙價同運輸先? 要知教局的規矩死定下來, 剩番個几間書局去壟斷, 個價點會唔俾住甘舞先? 網上免費軟件任你用, 維基就任你查同去改。 香江唔係無有心人分享教材, 將個大綱網上分享官方認定, 支節教材就微價定位, 大量發售自印或及, 好似的apps 一樣, 甘的書商係甘大競爭下, 有點會敢狼死去略呢?

而家隻狼話再拉布落去小民無得住屋咁話, 真係唔知佢現形緊定係腦殘. 邊班人要去但無去開會先, 食二星表演既又有, 憩十分鐘既又係個個寶, 黎黎去去都係個的功能組別既尸位, 呢的人到底想點, 廁又霸住, 又唔去痾, 就話隔離點解吾幫佢拉, 沒有最無恥, 只有更無恥, 真係唔知點形容呢班尊貴既議員勒.

分柝

COP 完成分柝, 二送一件 PSX, 已入.

直覺

雖則鉬業尐收入跌得咁勁, 但起碼仲有得賺, 槓桿都無咁恐怖, 好過成本咁高既中女咯, 睇下係咪跟住反彈得高尐; 巴西怕佢跟風民粹, 但計落咁抵真係值得套戥下囉; 而家尐新股加民企真係無得炒, 與期去炒呢尐垃圾, 不如中期投機下尐供股好過, 先期尐內部猛咁沽, 估唔會狗到半年內再供卦, 中期點都要補番一浸, 蟹左咪守下, 一年內都有得走卦, 起碼值博得多. 麗 x 其實仲未除權, 都係當簡易拿左先咁計, 照計都要係五月后先可以買賣, 呢尐咪要耐性勒.

被友人迫住咁計數, 咁就將百萬倉由始計到今年三月尾, 計下尐平均同離散囉, 結果如下:

開始至今:

大市:  19843 +- 3982 (20.07%)
倉:  1786514 +- 475899 (26.64%)

由零七年十月一日至今:


大市:  21108 +- 3766 (17.84%)
倉:  1974906 +- 391062 (19.80%)

照直觀呢幾年好似幾波動, 實則其實個波動係趨細左; 而一路都認為自己係用保守尐既方案黎投資, 但計出黎係波動性高過大市, 全期係跑得贏大市些少, 就算計埋多出黎既風險. 但零七年中至今其實跑輸大市, 計埋尐波動都係咁話. 似乎咁落注法係大升市係升得唔少, 但係守似乎唔足, 仲衰過淨買 2800. 攻全攻似乎無問題, 守怕且部份現金仲實際尐. 而近年守既似乎金融太多, 落注得太早囉.

101

即刻諗到董太係牛頭角邨沙士見阿婆時, 戴住豬嘴, 成個塑膠太空人咁講: 記住記住, 唔好唔好, 買任何 101, 乜 X 101 ...

我知道咁寫法, 會得失好多身邊朋友, 但如骨鯁在喉, 不得不吐.  幫朋友咁計尐 101 投資連保單, 真係愈計愈把幾火, 真係同殺人放火, 有乜分別呢. 表面係一張保單, 但用個多一或至十巴仙嚟保障, 咁仲係保險嗎? 為咗逃避規管, 求其改個名, 同賣迷債有乜分別, 個保險局就係第一大罪人, 點可以畀尐奸商漁肉小民.

個保險員推銷個陣, 緊係講話供頭一兩年就得, 其后任你轉, 攞番唒又得, 咁一下唔覺意就同佢簽咗十幾廿年約. 到你戥錢使時, 或不滿意基金回報想回水時, 咁佢個尐逐項收費就逐樣同你講番嘞, 連尐大學講師投資五年七載, 都係剩番條毛, 就知幾惡劣啦.

佢地實想推你去買廿年單, 供咗頭一年, 基本上個客係無得走, 走或唔走都係輸硬. 簽約個時, 佢地都有個所謂 ICP, 即係初始投資, 即大約為頭十二月或十八月供款, 掛名就話投資, 但其實係全期既基本佣金, 以廿五年為例, 即係每年用四巴仙去扣 ICP, 直至完合約為止, 中途退出, 剩底既 ICP 就會全部沒收, 以下表為其中某基金單張所例:

Remaining

term (years)
25 24 23 22 21 20 19 18 17 16 15 14 13
Surrender
charge rate (%)
100 87 84 81 78 75 72 69 66 63 60 57 54

Remaining
term (years)
12 11 10 9 8 7 6 5 4 3 2 1 –
Surrender
charge rate (%)
51 48 45 42 39 36 33 30 24 18 12 6 –

之所以睇落好似無 load, 其實個 load 係大概六至七點五巴仙, 即係未打已讓右拳, 仲係最早最應可累積個最初資本, 想跑贏怕且股神都做唔到.

呢個先係頭盤, 計落尐公司仲收你乜:  年管理費 (0.75-1.25%), 固定年費 (hkd550-750), 轉換費 (0.15-1%) (如轉基金的話).  仲未計個尐真係去炒既基金公司既收費, 我就估要用三巴仙一年嘞, 怕且要回番尐畀個推銷公司呢. (nb 我無睇得咁仔細, 但斷估佢地尐陰招, 想退出時上高剩底既年期既雜費都要計咯, 仲有條毛嗎?)

以以上數字, 就當個長期大市回報為九巴仙, 以廿年合約為準, 中途退出唔好計嘞, 除非你只供咗幾期, 咁就直斬好過嘞. 個廿年既總回報同你蓄廿年差唔多一樣, 連息都無, 記住廿年后連通脹都未計喎. 咁個九巴仙回報去唒邊呢, 咪去唒基金公司同中介既口袋囉, 投資者係一分都攞唔到.

以上只不過係最好既結果, 如果個投資者追脹殺跌, 或佢中途退出, 個結果一定差過以上. 咁呢尐仲係乜投資呢, 當然係保險, 保人地尐持續性剥削盈利囉.

意志

呢個月跌番千點落嚟, 尐人又轉睇為淡了.  技術上又見番黃金向上叉, 但現已跌番牛熊以下, 反正呢幾年都係咁上上下下嘞, 估得到, 都係賺多個十個八個, 平均咁個預估都係零啩, 仲未計個尐使費同心力, 血壓都高埋. 如追高殺跌, 咁就要輸多過大市十個八個囉, 至少.  現仲西風壓倒東風, 個邊日日有好消息, 呢邊話要降低增長至 7.5, 正路緊係落注係賺硬, 降低番尐高風險, 横掂都係低回報而已. 原材料股都而經做唒預告, 咁路向都係不離環保同內部消費, 但呢兩瓣都係一樣死咗, 真係唔知想點.

尐邪惡民企又嚟多浪爆煲, 都係預期之內. 個隻地下, 條數好到加零一, 仲話要增長一半咁話, 但數就慢慢找; 隻靜向話高現金, 派息好鬼箋, 但做咗咁耐, 都要回籠番尐, 頂唔到嗎, 咁又兩三日跌番幾成, 仲未計上年跌個尐. 咁投資如只係識睇吓尐比率既話, 連現金流同酸試現金項街外數都唔睇緊既話, 真係多多都唔夠輸.

巴西尐增長若有若無, 都係要減息架嘞, PBR 都係無運行, 但買都買佢估值低, 都無變啩.  長息呢個幾月真係有尐勢頭, 美市都真係做得唔錯, MFC 應仲有得去既.  中鋁同大眾真係唔知想點, 尐跌阿Q 咁諗係咪幫我縮注呢?  中鋁同其他材料股走勢基本一樣, 但彈上去佢就差過人, 怕且要諗下換吓馬嘞.

呎次選舉, 尐最高公信力報做咗做王者, 謊報變咗西方, 西方變咗左邊, 仲未計個尐忽然甜咗既財演同博瓜. 有尐人會寧唒頭, 但係亙相攻訐下, 市民係咪知多咗, 尐從政者未來係咪會顧慮多咗, 咁怕且唔係温良恭儉, 所謂持正做到啩, 但偏聴偏情緊係死得, 之所以呢排連小私同文海都多咗人買, 睇吓個字花點畫好過尐信誓旦旦咯. 前夕尐人話緃横投白, 但商人就係商人, 一切都係從利益出發, 個大局都都係局部癱瘓政制嚟尋租, 又點會真心去追求民主, 又點會逆上高意先, 仲話要投畀白鴿, 發夢無咁早. 民主派都係心知無可能以小攻大, 都係擺下姿勢而已, 如有大志, 就唔會話投白, 應一早搞聯合陣線, 輸都無所謂, 真係連底牌都蘇埋, 連執政既意志都無, 仲搞乜鬼政治, 寫博好過囉.

故事

網上唔岩聽就個個變五毛, 但概括尐咁睇, 有累既就撐糖糖, 無累既就撐狼死, 唔變既當然既得利益隨時玩多十年, 水深火熱既橫死掂死, 唔賭就死梗, 推狼仲有一線生機, 仲講乜鬼民主, 自己層樓都就黎畀人收, 自己仲要住緊劏房.

睇狄卡比奧, 話要入人夢就要用 implant 暗示, 回頭諗下咁次港人都畀人由兩三年前已 implant 緊, 唔係一隻鷹點可以變做民生救主咁款. 上次零三一役, 自由黨已經跣左上高一楝, 用曾貪都係無辦法之中既唯一辦法, 既然阿朱鎔基黎唔到做特首勒, 咁就不如自己做囉. 咁邊尐人可以信先, 只要可以有把握可以控制到六百票以上就得, 但太肉酸都係唔得卦. 做好做醜, 都要用下以前既技倆, 好似以前尐民盟咁, 擺番幾個地下咁, 明就係民主席, 暗既就係執行黨既指示. 現實黎講, 香港既民主進程取決於中央對推進政改既彈性, 以近日烏坎村同六四字眼搜得到, 怕且香港會係可見將來要鬆一鬆, 做實驗又好, 做展示又好. 但鷹都話要做多任, 咁係自己人將民主化推進, 好過畀尐養唔熟既去做, 唔好講個尐民主政客勒.

上次董生孤身一人去執政, 就算第二任用到問責制, 都係大勢已去, 仲唔好講入面鬼打鬼勒. 今次民建聯當然係膽, 但自由工商已反左大半面, 咁唯有扶持綠葉同分裂尐商會去做第二梯隊黎卡住分組. 阿唐營今次玩到咁大, 后面仲有四大, 又點會咁易退縮, 但數埋尐票, 連第一梯隊都唔夠, 咁唯一就係同民主派做一個弱既聯盟, 就好似而家咁玩白票策略咁.  今次社福界同醫學界都好 buy 隻狼, 民主派都有唔少民粹同一路既成份, 呢尐一早分左出去同扎根社區既, 怕會走出去聯合做隻鷹既第三隊, 過多十年八載都會同民聯結合卦. 而民主派既基本教義派會走得更極端, 都係一個必然既市場策略黎既. 而主流民主派會游疑於去縱橫捭闔定係更加民粹去迎合選票, 如下一任特首同后一立法局尐民主收到貨, 咁岩阿溫總真係平反到六四, 真係唔知點投佢票囉, 雖則我都投左佢地幾十年勒.

文抄

的網友講得太到肉, 忍唔住抄下:

"你地講果D 飯局、商台、西九... 已經無市民有興趣睇來龍去脈
中/下 階層 住/行/食/買/電/煤/MPF......... 已經比地主層層刮盡  
連生/葬 床位/骨灰位 都無  
衣食足 先知榮辱
無市民會當CY係君子
只係稍有能力與地主周旋 既奸雄

你以為市民會天真到
唐營唔會干預言論自由 無古惑野 無食飯
報紙 舊樓 西九又咪係比地主買晒  "

"所以現在平民選擇cy係有其必要
否則殺到埋身 永不翻身 中產將會被大量消滅
至於cy不會對不合作的地慘商動手的說法 是完全不通
單看+x要如此緊張赤膊上陣 和地慘商對cy的0提名 就完全無法解釋！
他們的推論有太大的漏洞！"

"其實本身香港人要求唔算高
有份奴隸工番 有飯食
有個自置窗台訓下  已經沾沾自喜
奈何帝國 仲要一刀放血食人三代
未死 強拍放火被收樓
死左骨灰位 都再執你十幾廿個
陳雲 講得好  同慢性殺人無分別
要落地獄 "

優化

彤叔賺得太勁, 想沽咁話, 但 A 股同無咁耐發威既內房股都氣勢如虹, 都係升既唔沽嘞, 反正沽都唔係呢個位, 17 要沽既都沽得七八啩. 惠理佔組合似乎都幾多, 但夠胆輸, 要改夠胆贏嘞. COP 搞緊 SPIN OFF, 調整得差唔多, 價值往后點都要浮現. 諗過轉大眾去創興, 但原意都係咁, 內里無變, 以不變應萬變囉. 宏利無可能咁弱, 但相比 133, 都係差唔多. 其實每一次 HOLD, 即係等於再買多一次, 如有錢, 你會唔會再買落去啫.

沽神上年尾沽左的美銀, 到如今被人恥笑, 做燈多一次. 如個時再堅持, 又被人話, 頑石一夠, 點可以畀佢炒, 直沽可也. 想基金經理, 投資人期望係要管理下, 唔係下下都要月結周結, 咪好似寫字比人后面猛起肘, 仲話要靜心觀道. 但先前落住都有理念分析, 到最差處係咪咁差, 定係畀旁人影響緊呢. 而家事后睇當然可以食花生, 但係個一刻唔係咁易揀去留囉. 我想, 如個刻最初諗個的仲岩, 咁一動不如一靜好過勒. 反睇挪威個福利基金, 六四股債比, 零八年畀人民咁鬧爆, 輸緊國家啲血汗, 都堅持咁重整比例, 有時簡簡單單既紀律已可贏哂啲短視同情緒嘞.

睇番自己個倉, 以前通常都係沽的贏得勁, 去溝跌緊, 或認為市場睇低個的. 回顧呢幾年, 怕且係負面既多, 正面既少. 當然唔咁做, 贏既風險影響日大, 但幾時去平衡, 係咪一賺就要去轉呢. 衡諸已往, 做得疏的, 準的, 高的低的, 咁個把握同正面性點都好過隨情緒咁密密做.

無庸個倉係特燈係加多的高風險股票, 黎加大個長期回報. 預左加大波動性, 但似乎中長期都係負面居多. 係跌個初期由低風險轉高, 但高一跌上黎唔係咁碎, 以 2600 bac 為例, 跌五成係基本, 七八成都有之, 相對番大市既二至三成咁守當然係天與地勒. 轉係可以去轉, 不過唔係開頭中間, 而係當自己都懷疑自己, 出左的輸硬類題既, 去溝都未遲, 雖則話去番時效既技術, 但點樣揣摸, 點都要自己諗同去領會, 唔係拎個計數機計下就得卦, 唔係交咁多學費, 做乜先.

阿彤叔個大的會, 要係江山后指點. 但阿爺定的待孫特務, 教左香江人咩叫黑材料, 都唔好話唔大開眼界. 四大天王玩左香江咁多年, 都係要推庄勒.

革新

而家有少過四百票去左提明豬營, 首先卡住個位, 做成既定事實同箍住的猶疑票先, 好過流哂去狼營. 但呢的公然侵法既世紀賤男, 如當選得, 就算唔百萬人上街, 都幾乎必成為國際笑話, 有損大國個面, 都怕且係等日子而已.

民主黨有二百票, 但商界咁多年都無捐過畀民主黨, 都幾難過戶去唐唐卦, 可見後路點都要留的既. 咁剩低仲有六百票, 民建聯當握有百二票, 咁仲有四百八十票, 當一半係偏左, 咁仲有二百四十張獨立票左右; 即三百六十票係傳統左票, 二百四十張係獨立票, 應屬於專業人仕票.

撇除民主個二百票, 邊個集齊六百票第一輪已可當選. 上邊可以直控 360 票, 保守當吹雞后唐營一半票同 1/3 專業票歸班, 咁都已有六百四十票, 雖則都幾麻真勞. 之所以北方係最后做王者, 但而家上高兩條線, 到呢一刻都無明顯信號, 但上次胡總見到唐唐黑黑地面, 你話隻狼后面唔係一團, 都幾難唔信矣. 呢排一團西方大盛, 連天都唔幫佢.

就當首輪無人夠六百票, 阿柯必死無疑, 亦表明阿爺無明確信號, 建制陣營分裂左, 而民主個二百票則會釋放出黎. 如第二階段阿爺仲唔出聲, 咁民主黨咪變左做王者, 所以既一定要出聲, 爭在係報名階段已做, 定係提名后選舉前表明者, 所以第一輪應勝負已了.

唐係一夠爛泥, 都幾難扶上牆; 葉劉都未養得熟, 港人都未必全信服; 梁同曾要睇上高點揀勒.

忠

大陸射鵰劇個楊康, 一時正一時邪, 想翻案咁話. 以宋人嚟睇, 佢緊係一隻賣國求榮既金狗, 但於金人嚟講, 養娘緊係大過親娘, 佢只不過正本清源而已.

再睇吓天龍既蕭峯, 以遼人嚟講, 佢拒絶侵宋, 實有賣遼之嫌. 於宋人嚟講, 咁佢就係兩邊都不是, 雖則當佢係大英雄咁拜. 雖則掃地僧, 都話天下無宋無遼矣.

唔論人品, 佢地所處情境, 所做抉擇, 真係有咁大分別嗎? 唔通因為利在於宋, 咁就係大英雄; 損在於宋, 則為走狗?

郭靖鬧皇帝係昏君, 只忠於華宋; 魏徵不死於玄武, 改投李世民, 咁忠都係手段而已, 想造福蒼生而已.

儒家只講仁義, 去到叔孫通輩先講個忠字, 流到最近, 就興起要跳忠字舞, 咁忠都係一個套子啫, 古語都講待我如仇, 則報之如仇寇, 唔通俾埋條頸佢斬嗎?

The death of capital

為 Michael E. Lewitt 所作, 主題為揭示各金融創新於八十年代后, 除肥己外, 怎樣重創大街之經濟. 更而提出整理全球 (主為美國) 金融體系之大方向及原則.

寫於零八海潚后, 書中先道出四經濟大師對資本之概念, 指出資本為變化不居, 而最近之金融創新亦為最新之資本型式, 但有別於先前基本種類, 即於其本身價值決定於其他資產之市場價格, 而買賣雙方距離太遠, 於信用及承諾越陷模糊. 其加大之波動性, 亦反過來影響到債股市場, 對本來脆弱之經濟帶來更大之不穏定性.

書中大加撻伐私募基金及 cds 生市場之創立及運作. 私募初意為提高上市公司低下之效率, 但結果為私募基金經理濫收之工具, 而公司資本則被淘空, 被槓桿債務所取代, 除加大公司之經營風險, 亦將資本用於短期投機取利, 而不是長遠提高生產力及人民之福祉. cds 除購債者投保外, 無関之投機者亦可下注, 遂令債務衍生市場成十百倍畸形成長. 而 cds 按金投注少, 獲利郤可以無限大, 投保了的亦不怕輸, 所以有太大誘因, 去推倒受市場注意之公司或市場, 大大加重市場及國家經濟之波動性.

書中亦道出樓按債務之打包, 令審批之機構蒙混賺佣而已, 而評級機構則只迷信數學模型, 而不用常識評估, 亂發出高級別給毒債行銷. 而投資者與貸款者亦無人身之信用関係, 可否持續還款, 不問可知, 更不用說各種詭計及假裝了. 作者中心主題, 為反對利益權貴化, 風險損失則社會化, 除加大貧富差距外, 亦有違道德風險及令資源錯配.

本書不是教你投資賺錢, 其行文流暢, 語帶情感, 能概括出種種魍魎. 而細至附注, 亦反覆討論正反兩觀點, 為不可多得誇人文領域之著述.

捨我

廈門港睇落好似快高長大, 但都係啲非本業咁做出嚟, 真係唔知入面啲秘技.  東方先前係抵, 而家仲抵, 唔估幾時反轉私有, 價值已經係保險, 話知佢升定跌.

啲財演仲估緊先高后低, 定先低后高, 潛台詞即係仲要跌多浸, 要謀定先后動咁話.  經過上年咁跌, 啲人又回憶番零八咁喪跌, 又要保本咁去守. 但短線都係隨機, 中線都係唔易估, 上年自己都中哂嘞.  啲人話啲神棍每年咁估, 都係同擲毫咁準, 啲人俾面咁無同本地財演咁去統計啫. 於外國做同樣統計, 用預計咁做買賣, 都係九成以上跑輸大市. 所以以預計去投機或投資 (?), 似乎都唔係一個持續既好方法囉.

特首話要爆就要身受之, 不要留俾下屆去受.  啲前任現財年年都話有勁嘢係前, 要注意風險咁話, 咁怕且年年啲演詞都可以循環咁用, 好似啲大學講師啲爛爛轆史一樣. 以前啲人見到災異, 上既就修德以安民, 中既就下罪己詔做吓蘇, 下既怕且幸災樂禍, 補鍋去上下其手咯.

供股

唔加注, 實際要下月中先有得供, 簡易做咗先.

艱難

今年買得勇, 輸得更勁, 計埋畀花旗抽啲通脹稅, 未曾輸過咁慘烈, 雖則好似無零八咁誇張, 但年頭個個睇二萬八創新高, 咁入, 啲危機意識真係無零八個時咁狠, 本地跌廿個, 再加十巴仙通脹, 無咗三成資本, 都唔好話唔痛. 但今之視昔, 到下年尾睇番, 唔知又點評而家啲人既悲呢, 怕且都要中庸番啲, 希望在人間嘛.

做咗個簡表睇下各市場表現:


2011/12/30 2010/12/31 Return
hsi      18434        23035 -19.97%
sse     2173.56    2808.08 -22.60%  (中國)
dia   12287.04   11577.51 6.13%      (花旗)
ni225 8398.89  10228.92 -17.89%   (日本)
vgk        41.3           49.09 -15.87%    (歐)
bnd         83.41        80.27 3.91%        (債)
gld      150.34      138.72 8.38%        (金)

平均咁買就輸 8.27 巴仙, 如債金股各三份一, 就輸 0.6 巴仙, 都唔好話唔頹, 乜股債估神都要死哂.

睇路紙啲錢都係去番花旗去守, 而歐洲同新興都收番自己啲水去防通咁話. 但如慳住個荷包咁去填既話, 雖則王道, 但怕且要用起碼三年以上先會有啲起色. 但啲人日日嗌黑天鵝, 咁即係啲人都預咗打折, 咁仲係黑嘢嗎? 所以而家都係已折矣, 係咪全部, 咁怕且只有天知, 但話要沽咗係低位撈去大勝或即沽去贏, 都要預防撞番零九咁被人夾, 贏係次要, 持續生存先至係最要緊喎.

斷估篇先前乜位都破哂, 再講都係無謂, 啲位點 set 點都會講得通既, 最重要係位前后點因應, 同你係咪可以持到賺既啫. 睇番强積金同恆指主趨勢線, 回報為 6.75 及 8.9 巴仙 (含息), 以而家呢個位計, 如跌落去都可以預點溝啩, 如仲有水既話.

認輸

就嚟到年尾, 都不得不承認, 今年都係要以跌為主, 除非好似啲師傅咁話, 下月升番五千點先得. 除非你識對沖唔使輸, 或一直喳金, 咁先至可以跑得贏通脹, 雖則人幣定期都可能輸少好多, 普遍買大市怕且要輸二十以上了, 啲股神仲輸過三十添, 再加上實則椄近十巴仙既通脹, 實際係輸三十至四十, 表面上好似無零八咁激, 其實死得仲慘. 先前賺落都仲好啲, 係兩萬以上才入番嗰啲, 想唔係最痛都幾難矣.

個大市係由四月開始跌, 個理由都係不離個去槓桿化啫. 個問題唔係由今日開始, 遠啲可以追索到歐元成立之前或美財赤自六十年代始. 個問題唔會短期內解決, 以前都係由一個個泡嚟掩埋咗佢, 今次銀行自己都莫財, 先至要嚟埋一次單而已.睇世界大勢, 新興國家, 上次金融風暴衰過, 保守下今次都中少好多, 歐洲則要由左去番右啲, 花旗就要由右去番左啲嘞. 天之道, 損有余而補不足, 稅都係要交既, 當然有余點都比較有余, 損不足只影響更多消費而已.

如以輸過廿五為跑輸, 咁旋渦中心股就不離 BAC, 2600 同 3378 囉. BAC 本來有得贏, 一跌落嚟破位溝多一溝, 仲蟹都一半咁話, 弱勢股, 唔止贏都算, 仲要咁溝又犯幼稚症; 2600 都係差唔多, 並且呢隻股既估值都係斷估而已. 3378 雖則話睇台灣走勢, 但出入口數字都睇得出啩. 百萬倉唔係一個保守倉, 但從今年問題, 一直唔喳現金嚟上套下去買, 諗落真係幾蝕章, 雖則個最終風險取態都係要公仔紙為先.

朋友宴上聞說有論學校收生不應只以成績為限, 收舊生子女或兄妹則習知校政, 文化上亦比較脗合, 易於教學云; 又曰資優家庭之學生, 不能取其上, 差亦可得其中, 而普通之學生, 最優亦只得其中已, 所以現今之校友得分制為合理矣. 聴吓聴吓, 就好似聴番唐朝李德裕既子第論, 世家子第習於朝庭禮章政事, 怎可取啲孤陋寡聞既寒士呢.  九品中正制只為保護世家特權, 唔係要求好似明清啲官員子第去避席唔應試, 我地只不過要求公平既機制, 為社會選才而已. 如云為學校方便, 何為主, 學生為主, 其他都係次要技術問題, 唔會為咗緑葉剪咗花啩. 如數字統計, 下底都係一個個人, 如你個仔本來成績比隔嚟好, 但因唔係校友而入唔到校, 咁本來可以升喱去做中上產, 而家要迫去做中下產或下產, 你又點睇. 做社會政策, 不嬲有個原則, 就係唔諗你既位置, 應設想自己係最弱個一群, 或至少每個位置都去諗諗, 然后去制定政策. 而家呢個制度, 以筆者嚟講, 既不公平, 長遠亦對社會帶來倒退.

膠文一抄, 不值一駁:

筆者想問, 露宿者, 居無定所的人, 在大陸養老或在外國定居而在香港無居所的香港公民, 公民黨是否主張剝奪這些人的 投票權利?

大家要記住, 所有投票的選民都是有投票權利的香港市民, 請尊重乎和維護香港人的投票權利. 不要加設關卡剝奪香港公民的投票權利.

供送

啲報紙寫得咁弱, 啲資產又咁抵, 去到麗X咁款, 雖則唔善待小股東, 但亦未至騙住, 掟爛個招牌咁話. 短期沽壓都要平倉, 唔估大市跌定升, 轉咗先算. 要注意, 信和十送一要下月中前先完成, 為簡易計算, 而影響不大, 咁就做咗先, 現實就要同經紀商量吓, 唔係就要入策囉.

冰火

十月通常都係驚濤駭浪, 由第二日既 16250 既低點急速彈回, 前后兩三日既大陰陽燭成千三四點, 仲係大成交咁交易, 咁就先當係中期調整底先. 如以二萬四調整起, 上個交易日已彈到 20100 中點, 如以二萬五計, 則要彈到 20600 點. 如以上月斷估篇所計, 則牛一二既中點都算守得住, 雖則乜死亡都交义哂.

月初萬六個個話要清倉咁款, 要見萬二再算; 彈到二萬又話后悔無係低位追貨, 賺少四五成利潤咁話. 諗吓, 同一張股票, 係月初同係月尾真係有咁大分別嗎? 再睇番海潚前, 都係二萬附近, 個零月低見一萬, 半年多后又見番萬七九, 咁又係咪內值差別咁大呢? 當然筆者唔會武斷話個市唔會再插, 而係用個市個高低嚟測市, 即係用番個市場情緒嚟投機, 識轉身仲還好, 唔賺都唔會上身, 如係口話用嚟投資(雖則內里其實都係投機咁睇差價), 咁就不離追高殺低, 想唔輸都幾難矣.

但睇番自己個兜, 真係跌超過廿十, 係低位真係幾難受, 唔係易頂喎. 經過咁多次大跌市, 咁跌真係唔會再大驚, 難受當然會有. 但最大問題就係低位如再無彈藥, eq 技術點高都無用武之地, 咁唯有將啲低波動轉高, 但又回到時機既問題, 係萬六個刻真係做唔到嘞, 如係現金就做乜都超標嘞. 呢兩年現金最有用時當係兩萬樓下時, 但所佔比例不多, 粗略計應少過一成時間, 所以不動心加耐性先可以食呢兩個波幅, 仲要識係相對高位要減持番啲. 馬后炮嚟講, 呢啲儲備現金放定期已可跑贏哂, 但個市亦都可能會升. 新股今年都死哂, 長期金係高位, 唔怪得啲退休金都要對沖投機, 起碼唔使輸 pace, 主旨唔係要嚟大贏, 低風險, 高過債, 唔太脫腳便可.

斷估.大數

用番上年五月個篇斷估:

a 場大浪由 2008/11/4 (y/m/d) 日 1707 點開動直升至最高 2009/8/31 日 3471 點, 中間最低點為 2009/8/31 2668 點, 最近覆跌回附近, 今日收 2697 點. 三份一回調位及牛熊位早破, 中間位為 2589 點, 應為極强支持, 去到附近當局可能有啲嘢會做. a 股歷史高位為 2007/10/16 日 6092 點, 跟最近低位之中點為 3900 點, 今次升浪仍未觸及. 現五十天線同長期線交會於三千點左右, 現低過牛熊十巴仙過一星期, 不得不令人憂慮, 雖然反彈幅度超高, 不過以技術角度嚟睇其實未夠確定, 而且而家形勢都幾尷尬, 所以今月餘下走勢都幾緊要, 要睇緊啲. 所幸現在估值已比較合理, 周三晚啲外資係度吸 2823 同隘價升番去七八巴仙, 就算套戥都算值租啩.

香江今次牛市由 2008/10/27 11015 點開始, 升至牛一高點 2009/11/16 22944 點, 1/3 及中位為 18968 點及 16980 點, 牛一高位后最低點為 2010/2/8 19551 點. 技術上比 a 股强, 雖則上高收緊銀根, 外面猛印銀紙托番一把啩. 美市則由 2009/3/9 6547 點升至今, 未見高位, 亦已升破中位 10320 點 (2007/10/8 14093 點), 形勢現最强, 控到條水喉真係唔同啲,  跟足戱美市遲啲都要跌番啲啩.


直到今日為止, 呢三場低位調整低位及波幅中位數為:


恆: 9/26/11 17408 / 17990 (11015 & 24964), (如以牛一波幅計, 中位應係 17500 附近);
綜: 7/5/10  2364 / 2589 (1707 & 3471) (最近低位為 2392 於 9/26/11);
美: 7/2/10  9686 / 9679 (6547 & 12811 4/29/11) (最近低位為 10734 於 9/22/11);


恆指創新高后反覆試過幾次廿萬四, 無功而還, 做咗幾個頂, 就跌跌至今, 暫時調整低位低過中位 3.2 巴仙; 而綜指則為 8.7 巴仙, 於上年中一早見咗; 杜指則為剛一點即彈, 時間同綜指一樣早到咗, 反而今年恆指先要試吓條中線, 玩吓 dip water. 今日綜指仲創緊新低.


劇情發展落去, 一係恆指好似上年行早兩個幾月跌先, 綜杜兩指跟住先再創新低去中位以下, 睇落而家都係美指强得多, 正好似坊間話齋, 銀根鬆緊都係幾決定性既因素嚟, 同通脹預期啱啱相反; 一就係中位真係守得住, 係年尾前可以升番, 再創新高去; 但亦唔否決大型上落市咁法上法落去, 綜指係零九年八月創咗 3471 高后, 每次試新高都係三千二前就莫進, 杜指同恆指好些少, 不過都係行前少許而已. 如今次係零七年熊市既廷續, 咁行到而家就差一個月就四年咁長, 以香江近廿年嚟睇真係未試過咁耐, 所以筆者直至此, 都認為而家都係震痛複發緊, 為牛二既深度調整, 或大型上落市既低潮期.


計數當然咁計, 但投資中心點係風險管理, 每人都要因應自己現金流同情緒管理而調節之, 唔係應贏都變咗輸, 跟住仲要去 icc 添. 百萬斷估兩倉都係超進取咁去投資, 啲錢都可以唔使十年內用, 而點跌個倉主都可以瞓得着, 怕且十之九點九都做唔到啩, 所以唔好亂學. 今次跌市集中係中指大股同二三線, 呢啲正係散戶集中既持貨, 話唔係重傷都幾難矣. 如係炒股同蝕緊既股, 輸太深止都無謂, 仲有渣拿既不如轉去啲仲有增長既中資股好過, 橫掂跌起嚟都係咁慘烈, 升番去怕且跑得快啲啩. 仲有錢既就提議至少六成現股倉, 真係創新低就愈低愈買, 對象咪買啲指數基金放係枕底囉, 唔好話等萬x 再哂冷, 講既九點九都做唔到, 不如切實揾個可行既去做好過, 只要中期內差唔多必贏就可, 邊有長短都贏既方案咁筍先, 諗到都做唔切嘞, 起碼身邊從未見過做到囉.


百萬倉都有衝動轉哂去高波動, 但預防估錯都係中庸咁溝算, 反正而家倉內個啲都唔算係保守類囉.

斷估.反艇

沽神至今輸咗三十個, 債神都要買番回美債, 歐洲股神要摺咁話,  就知啲大戶點輸法, 自己輸咗咁多, 都可以阿 q 一吓. 睇番斷估倉已輸入肉, 百萬倉都要嘔突, 出面啲人爭論係牛定係熊, 都係睇番自己個錢兜實際啲啩.

參考番上年最恐時刻寫個篇斷估:

http://philipleung168.blogspot.com/2010/05/blog-post_14.html

之后, 2010/5/25 低位為 18986, 2010/11/8 高位 24964, 而今月低位為 2011/8/9 19331, 仲未破上年波幅底. 炒衍生啲話期指位破咗, 筆者都係睇收市價為主, 起碼濾咗唔少噪音矣. 呢個大雙底隔咗一年一月, 波幅為六千點, 中間已反覆多次二萬樓下, 為典型折磨型上落市. 以 ta 睇, 既然 18986 破唔到彈番, 係咪要追番而唔係食水尾沽呢, 要沽都怕且要跌破 18986 先出手呢? 估值唔使複雜咁計, 求其睇吓都知通街平貨, 啲二三線起碼跌三十個, 五六成都大把, 業績都無乜脫脚, 爭在你有無胆買啫. 但香江去到好耐都無見過既 7.9 巴仙, 調轉嚟講股市都要買平啲, 先可以追番多啲通脹, 所以股市咁跌都唔係無道理既. 死要托住, 生又見唔到苗頭, 呢個上落市話要玩個五年以上都有可能, 睇吓點發展同利用之.

換馬.2

換馬

奇蹟

今個月比而家最低過一千點, 月尾又去番上月既位, 真係好難估.  但花旗啲政客係度兇緊全宇宙, 但市場相對當佢地無到, 咁又係, 爆既係自己個缸, 邊會有人信先, 唔通倒自己米嘛. 日元係咁升, 真係唔知日本仔啲解困嘞, 唔通啲回朝既錢浸死自己, 亦可見美鈔之虛矣, 遲啲去東南亞玩都要預多啲, 怪唔得啲鬼仔話香江食反平, 當然佢地唔知啲樓價點高嘞.

雖則睇落指數唔係跌咁多, 但散仔鐘情多係股仔, 回頭看斷估倉, 就知小股民點頹嘞. 相對百萬倉都唔會好得太多, 又點估到領滙, 兩電會大大跑贏呢, 仲要沽埋倉底去換相對風險. 但煮到嚟就要食架嘞, 133 真係唔知點解可以咁低, 但兩成現金怕且點都夠供招銀啩, 比番 3061 及其他內銀真係跌得太多, 內銀係胆一個, 既然要留, 咁不如轉去比較價真個隻, 真係爆都死得心甘啲啩. 中旅又死唔哂, 反而中通信食咗瀉藥咁, 啱啱同中移動調轉, 啲供嘢真係比佢玩殘, 怕且要供完先有得番身, 唯有忍字一訣. 其他跑輸個啲無話何說, 散戶强項就係死不認輸, 但前提就係唔好亂溝, 仲要一隻咁話, 咁就神仙都難救, 一日未死, 一日都有機反敗為勝, 希望在人間, 唔係真唔知投資嚟做乜, 就係要去認輸嘛?

啲引導性既資詢同廣告真係幾反智, 啲程度連大學一年級都做唔出. 其實玩嚟玩去, 咪係要堵塞市民表逹"所謂"公投既權利矣. 而家私人法案基本上連提到提唔到, 所有提案已畀政府壟斷咗, 市民除反對外已無力回天. 遊行一役連數字都要糾纏咁耐, 又可以任人去演繹, 咁點解唔實牙實齒咁去投嘢, 然后點票咁咪一清二楚, 講到尾就算民建联攞哂啲票佢地都唔會放心架嘞, 因為啲理要係地手中搓圓禁扁, 又怎會畀人置喙. 你不信又點, 我反正信咗嘞.

存在

最尾一日又扯回牛熊附近, 雖則呢個月已跌死好多細價股投機人矣. 賬目賺蝕都唔點睇, 反而百萬倉組合今個月唔使持續跑輸, 板回兩巴仙, 呢個先緊要. 咪話后悔點解係廿萬三唔識沽, 唔係神, 就唔好做神既嘢, 强化組合長期先至有得守, 跟住先有得贏.

睇番組合, mfc 算比較對美經濟敏感, 今次調整浪守得幾硬淨, 所以唔會睇得美太淡. cop 石油好似無跌過咁, 雖則前少少已早跌咗, 所以資源股應無咁快散, 買外國點都有啲 edge 既. 兩中女就好似揾到底. 其實今次都算守得穏, 唔跌番去萬九樓下, 點風險微調都係作用不大. 百萬倉風險性都不少, 再加怕且唔夠審慎囉. 係今次十連跌本人都唯有死守, 肉痛當然有, 但經過零八年個滄海, 都係咪埋眼, 閉門讀書好過嘞, 係低位唔郁好過郁囉, 呢啲怕且係散仔既强項, 你無需要做任何嘢, 亦唔雖要為某些人負責去做違理既事.

曾生放風話起番居屋, 旋踵啲經濟師啊, 財演啊, 專欄作家啊, 知名商家啊, 就即登報話會推冧個市喎, 同私樓爭地會推高樓價喎, 會爭哂啲公屋地喎, 要等七年早抖喎. 無恥啊真係無恥啊. 呢啲人讀咗咁多書, 就係為咗做虎倀幫閒, 同以前村霸啲師爺打手有乜分別, 咪多咗啲所謂供需定理啊, 嚟兇吓啲小民囉. 市民係有本地居住生存權, 唔通窮就要番去大陸鄉下住嗎, 每個人都有居住權, 窮既可以住 cheap 啲, 但不至於住棺材房啩; 啲后生屋都無, 又點結婚生仔呢, 咁又係, 関個啲大商家同高官乜事, 做好份工等收工咪得, 橫掂收工高位厚職實有著落, 你瞓街係你無本事嘛. 有時同呢啲人講理係無用, 因為啲理已係哂佢地手中, 嗰時就唯有用你既行動, 嚟證明你既實在既存在嘞.

連續

月收微跌, 但倉已超跌多七巴仙, 連續兩個月都大跑輸, 倉內有頗多二線, 大大插, 升就無佢份, 太肉酸真係換唔落手住.  恆指曾跌破二百天線未破牛熊住, 呢幾日又彈回; 自從上回跌去萬九彈回后, 都係牛熊托住咁運行. 倉內地產股真係郁都無郁過, 咁就轉的去港口股博下.

月內中投三寶幾星期跌過三十, 仲未計個的無線, 龍工同熱炒既二三線股. 炒呢喳既都係北水, 咁係上高咁收水下, 怕且都已近臨界點, 睇下爆上定爆落, 我就睇得樂觀多的, 如通脹落得番, a 場唔會咁差. 係熱炒股爆煲下, 的動向倉主個個鬧的籌碼係禽獸, 可見情感之投入. 就算冷靜如惠理, 手起刀落, 但都已蝕三十個以上. 技術派秘技有個前提, 就係咁市價係接近連續同佢地止野既動作係唔會點影響股價 (否則對拎番既錢必然大大不利), 呢個月已顯示呢個非必然, 猶其係你最需要佢個時. 如遇到九七大跌或微型閃電股災, 個時止又大失預算, 唔止個風險又變得太大, 陷入兩難. 所以炒都要早炒, 點都好過遲炒, 當然的技術要求高得多喇, 當然中伏機會少得多.

沽弱

今個月都係弱煲, 跑贏個啲跌番落嚟, 弱個啲更加弱, 個市微升, 要倒跌番六個巴仙咁話, 都唔好話唔揼. 再睇吓斷估倉都係咁跌, 但出得嚟行, 預咗要還, 爭在企定定, 定係諗吓反敗為勝好過嘞.

啲年報逐本寄嚟, 係咁以睇吓, 弱個啲都睇到眼火爆, 但自己博大霧咁亂買, 有乜話好講.  中鋁都話有啲爆炸性, 雖則啲成本仲高過俄鋁, 起碼好似華能咁, 仲有得賭吓. 但個隻中旅, 係咁既資本下, 做到持續咁差既盈利, 仲要啲乜行政成本連年幾成咁追加, 就真係樣版嘞, 仲食埋六七成銷售盈利咁話添.  自己博去亂炒, 而家綁到實一實, 憤怒咁去沽咪又要錯多鑊, 以前咁去忍咗半年去沽, 都可套多兩成, 但一路等, 可能只滿足自己僥倖, 變死等都有之, 個時咪好似海潚前既細價蟹一樣咁尶尬, 咁唯有就係先沽一部份, 其他就先好價或形勢嚟平均沽嘞, 只要你相信沽弱買强係啱既, 中間慳多爭少都唔係重點, 長遠唔郁仲大濟. 再反思用資產值去選股, 大價股仲可能得啲, 但中低價股就真係唔係咁有效, 都係要睇現金流趨勢為第一點, 其他都係輔而已, 起碼唔會買啲退步股, 揼心價值股嚟磨去鬥志同機會.

美金係咁跌, 好似只要肯買外幣同金實贏咁款, 但就算大趨勢如此, 啲錢係咪咁易賺先, 怕且都要落定止盤為上, 待調整定再嚟沽穏啲.  係美金大散吓, 香江啲鬼佬遊客都多咗, 而照歷史嚟睇, 啲資產遲早都要顛番輪, 但周末睇番中原地產指數既走勢, 探回九七既阻力矣, 係政府既政策轉變, 同埋炒家發展商滲貨出嚟, 樓價怕且要調番十至十八巴仙落嚟, 先可以創新高去. 同啲租樓既朋友傾到可以用呢個調整嚟重新入市自住, 但佢話要等沙士咁話. 要好似九七后咁縮銀紙供應, 調轉嚟去驚好過啲啩, 睇吓花旗同上高咁心雄不負任就知嘞. 自己層樓都係住嚟對沖居住成本, 賺蝕唔係重點, 唔好太狼死就得嘞.

封印

谷哥啲報價成日唔更新, 唯有用人手入價計輸贏, 網上嗰啲就由佢囉, 遲早都啱番啩, 成日睇住啲價其實都幾無謂.  今日成交突破咗, 下半年前后應反覆覓高去.

睇住啲高通脹殺緊埋嚟, 咁持住啲鍊油股都唔係辦法, 本來想轉去啲資源金屬股, 但撞正今日中通信被人洗倉, 分散吓去電訊類都好過偏埋一邊咁話. 其實 552 無乜債, 正路借銀行好過去供嘢, 但大股東咁有信心, 咁就唯有奉陪到底, 反正呢十幾巴仙增長都幾難脫脚, 起碼唔會直接面對群眾, 唔使畀人抽暴利稅. 預咗仲有三四成要供同要磨多排, 留番啲鍊油貨尾嚟守尾門.  bac 其實幾鬼想食, 但唸住古訓, 無五成都唔好食, 唔係都係哂氣而已, 一於死忍.

衰既特別易靈, 日本福島啲反應爐一早己鎔鬼咗, 怕且都要用日本仔既獨門秘技, 封印呢四個反應爐, 投機啲嚟計, 鋼材股同水泥股應仲有得去既. 但計落啲衰退期話要廿四萬年, 當我地祖宗黃帝距今六千年, 即係要經過四十個中國既文明咁耐先至安全番, 咁怕且下一個文明要交棒畀啲曱甴, 都夠時間佢進化嘞.

高登啲人鬧新移民係蝗蟲, 但其實啲六十打后都怕且係上一輩既后代而已, 煮到嚟抱怨真係無咪用, 諗吓點變成正面係咪積極啲, 可能我地第時都要靠佢地養都唔定. 通常聴到呢啲意見, 我都會問由何而來, 有乜論據, 通常都係感性既印象而已. 跟住我就會介紹佢地睇吓福利處年報啲錢點樣使. 雖則呢啲係應然問題, 但好似主席話齌, 無調查就無發言權嘞, 情緒發洩通常都只會帶來偏見而已.

鎔解

本來唔想咁快寫, 但小道消息滿天飛, 人心惶惶咁話, 咁不如將自己構想而家寫落嚟, 就算衰咗都知點衰.

自己都算係物理本科, 但對呢啲咁鬼專業既反應爐設計, 同啲輻射問題, 都同其他人一樣, 都係一舊雲而已. 但有樣就幾肯定, 就算點大鑊, 都唔會爆到似核彈囉, 唔係個設計既物理家就真白痴. 咁最壞既結果, 中就去到三里島咁嚴重, 最差咪去到切諾貝爾囉, 記諸往事, 最差日子都唔係去到末日啩. 市場諸人最大憂慮, 就係日本會拖累正復蘇緊既全球經濟. 停產一陣同減低出口差唔多係必然, 但破咗個窗, 都要用錢補番, 拉勻都未必跌得咁誇啩, 而家日經由發生前都跌過二十, 計落包埋陸沉啲地都無咁多啩.

日元班師救命, 同步就係加印同猛使錢去重建, 而花旗雖則想加息嚟壓一壓通脹, 怕且都要等多陣先, 所以跟住既流動性無端端加多個新力軍, 時間又延長埋, 唯一幾肯定既商品就稍跌后, 跟住應有一浸幾大同全面既升幅. 全球增長稍減, 但流動性又增大咗, 所以對股市嚟講, 短線會偏弱, 但長線可能會加强之后既泡沫, 都唔定.

既然自己而家現金都無多, 咁呢幾日跌落嚟, 啲人就避開沽貨減風險, 但愈低位就應添加風險資產, 本人就沽嗰啲公用股啲巴士啊, 電力啊, 分段轉到跟大市同步既資產, 博啲就轉到 2814 日股指數基金, 如日本唔陸沉, 你又守得住既話, 輸既可能性都幾低囉, 十分之值傅.

派糖

沽 3061 4200@9.49; 308 24000@1.59; cop 60@598.92
買 696 16000@7.08

到今個月此刻, 恆指都係行番上個月咁既樣板, 不經不覺都行咗差唔多半年, 悶到嚇到有啲人要清倉. 係恐懼之牆前, 係咁上下出力爭持下, 半年結前后波幅應大得多.

中旅又要再試底, 以前都要想溝咁話, 但擺埋一邊, 就算一路輸啲銀碼即係一路縮, 對總組合影響少咗, 溝就未搞嘞, 除非而家無貨, 所以自身位置點都會有唔同因應, 大前提都係要點平衡風險回報. 睇番自家組合, 中美冰火兩重天, 所以睇住目前數據去炒, 都係幼稚園而已, 但炒吓炒吓, 啲水都係要揾番啲超回報嚟再炒過, 不過唔知幾時啫. 油價係咁標上去, 但中石化同其他油股對沖咗, 遲啲點都要落番啩. 東尼倉重新上路, 首剔出中鋁同華能, 華能就無乜異議, 雖則本人持貨槓桿蝕住投機咁話, 但啲唾棄股加番啲耐性, 大都跑贏大市既, 之所以股沽神都沽 bac 都唔會沽住, 起碼而家賣壓小得多.

跌到二萬三樓下, 循例都買吓貨坐吓, 除 820 外, 就係再補番啲 696, 表面睇嚟好似唔係平, 但九成係現金, 呢隻又係以虛嚟揾虛, 真係超安全, 爆上嚟又夠勁, 講講吓好似買藥咁, 好在本人唔識心口碎大石.

港人所謂公平, 就係自己無錢分, 或者共人地既銀而已. 金融風暴后, 個時真係滿目瘡痍, 但派吓派吓, 就好似老馮咁, 係乜要人人都要回水, 不如乜都派哂算, 仲抽稅做乜先. 一個無民意支持既政權, 本身又無政治 (起碼管治) 理念, 對住一班呱呱嘈既壓力團體, 咪得出咁既年複一年既搞局囉. 朱鎔基零四年已提出深層次矛盾, 咁多年又無釐清定義過乜先, 唔好話解題嘞. 以本人見解, 香港有三座大山要跨, 一係住屋, 二係教育, 三係政改, 其他都係枝節而已. 回歸后董氏都係呢三個問題著力, 房策唔識轉膞同微調, 乜鑊都自己揹哂, 其方向及功效對小市民其實有利, 對大商家就當然不利, 賭得勁既中產咪燒炭囉.  其次教育政策分化標籤咗中英教學, 好事變咗壞事, 最后結果就係變回微調貴族教學咁話, 呢啲就真係唔公平, 就好似愛因斯坦咁勁, 如無阿哥阿爸做校友, 又唔係教徒, 又唔係住豪宅, 又無前局長老竇, 都幾難入到啲直資, 仲話點再上一層樓, 係班入面攞多幾罐罐頭都怕且得既. 反方向逆潮流既政改更不消提囉.  如下任政府特首有清晳理念去搞掂呢三個問題, 話知佢乜背景, 我就無任支持佢嘞.

妖股

一月又重複前三月走勢, 升一陣又跌番起步三千處. 上高過年結班師找數, 又要抽銀根, 而家話內地通脹五巴仙, 保守啲都要計雙啩, 十個應無走雞, 香江乘多一半都怕且夠, 起碼五個以上嘞. 係資金抽緊下, 公仔紙市場短期都唔會有運行嘞. 怕且要禱告新嚟之大鱷, 幾時發慈悲, 炒番起個市, 雖則調轉炒, 都可以發過個豬頭.

2379 一役, 大折讓供股除權后即炒高, 以為鴻鵠埋嚟, 即沽賺幾倍咁話, 點知大股東否決供嘢, 即刻奶哂. 呢啲唔誠實既對手, 莊又係佢, 規矩又係佢定, 對賭又係佢, 散戶賭贏, 都係慘勝而已, 怕且九成都係輸到乾乾淨淨. 股神話投資對手要做得女婿過, 都唔好話無道理, 我就唔會將啲錢交畀啲賊嘞, 要防佢地或甚而要係賊囊偷金, 不如畫好幅圖, 或計好盤數好過囉, 起碼機會大得多.

睇番自己過去一年轉倉活動, 結論都係唔轉好過轉, 明顯如轉出和黃, XLF 轉深滬金融, 386 轉巴西石油, 真係全部都係哂兩面轉角關鍵處, 真係無話可說, 亦可證自己亦為市場之一部份, 所以一動不如一靜, 會盡量減少買賣, 起碼慳番啲心力同使費, 實倉亦如是. 咁幾時先轉, 咁怕且唔係係超價, 或係超值時囉, 通常騰雞同唔想做嗰啲買賣, 都係啱同供獻最大既, 平時其實影響不大, 持倉多少才係要點囉.

年結 . 整固

恆指今年回報 5.31 巴仙, 百萬倉則為 8.99 巴仙, 跑贏 3.68 巴仙. 但本人啲無人駕駛既强積金都椄近有十五個, 證明年中之調整把握不到.

啲人話唔好姓賴, 君子都係要問凶唔問吉既. 講自己點威, 不如講吓做錯啲乜仲實際, 起碼之后提醒日后點避. 今年恆指升得雞碎咁多, 如好似年初諗住貼住指數, 成功逹標之后都係得啖笑. 用番道氏理論, 都預計到今年係大上落市, 升幅少, 波動亦無前兩年咁誇張. 好似坊間話齋, 即只有高沽低喳, 或炒股唔炒市, 或兼兩而用之. 今年實倉仲跑得出, 都係因為先前低位未落夠籌, 唯有趁跌到二萬樓下猛咁補番, 只不過攞番跑輸嗰啲少許. 但大藍籌其實第一浪差唔多已全面反應咗, 甚而超突, 落注係佢地真係唔跑輸都已偷笑矣. 百萬倉真係跑得出既都係二三線股如惠理, 或被人唾棄個啲, 其他嗰啲都係陪跑個款, 衰啲撈早嗰啲仲要倒輸. 國指今年要倒輸, 反而分散投資到外國資源股都幫補番唔少. 除咗 sector 要分散外, 地區分散應都會減低波動性, 有時仲可以增加回報添. 今年賺到個啲都唔係貼住走保險嗰啲, 不離估大方向個啲 (石油資源), 估值低嗰啲 (cop, mfc) 同盈利有爆炸性個啲二線.

實倉仲留有 xlf 花旗金融 etf, 呢幾年都係定咗格咁上下而已, 百萬倉夠胆轉 bac, 自己都係做唔到. 博內地 a 股觸底反彈, 猛咁溝 133, 820, 3061 同 2828, 133 老僧入定, 真係唔知幾時先係畀番出啲差價嚟, 唯有同佢鬥長命, 3061 雖則有啲溢價, 但今年內銀變咗 dogs of cei 做埋蟹, 唯有希望在明年. 華能炒波幅點知搞到一褲都係, 中鋁蝕緊都要炒, 蟹都係揾隻有概念如鉻鉬好炒啲啩, 圖都睇到强弱嘞. 941 跑輸大市少少, 但 13 突破五十五時都可以即轉, 遲疑下都係要被點穴, 都係要自欺欺人話要等上高啲人去玩 fb, 唔食現成咁話. 買咗 3378 廈門港唔理同系啲上落, 計落買臺灣 etf 仲賺得實啲.

呢三個月恆指都係二萬三磨, 但牛一高位已持續突破, 牛二都要行埋下半集矣, 照上次路紙, 下年都係會逐漸向上, 年尾前應係三萬前徘徊, 如太快破咗上次高位咁就可能仲危啲.

强積金

呢啲咁有爭議既政策, 不經不覺都行咗成十年, 檢討留於吹水, 或夠唔夠用, 都唔及係咪真係揾到銀實際啩. 本人啲强積金只係雞肋, 所以唔會積極咁去管理, 所以咁多年都無咪轉過, 所以全部都係全股票基金, 咁怕且可以用嚟驗證吓啲傻死牛, 係呢十年點死法.  數額當然略咗, 回報如下:

From Yr Return Accu Yearly return (irr)
2009 2010 17.5% 2.22 10.46%
2008 2,009 35.2% 1.89 9.49%
2007 2008 -37.0% 1.40 5.71%
2006 2007 13.8% 2.22 17.24%
2005 2006 17.6% 1.95 18.11%
2004 2005 10.2% 1.66 18.29%
2003 2004 17.6% 1.50 22.57%
2002 2003 27.7% 1.28 27.74%

今年數字都係用今日估值計住先, 但應差唔遠. 自己計過近十年恆指平均回報連股息, 大概為 12%, 咁個 1.5 巴仙差距即係畀咗啲乜局, 乜經理或托管嘞. 其實中間做過兩次算正面既買賣, 如普通咁喳住, 怕且要低至十巴仙囉. 講真, 唔使點郁同管理, 有咁既回報, 都好過以前啲 orso 年三四巴仙啩, 但中間個兩巴仙管理費, 真係有頗大減價空間囉, 指數基金年管理費只不過 0.2 巴仙, 加埋其他點會過 0.5 先.

咁又試吓如果每年調配一部份去無風險, 年尾再 re-balance, 會唔會提高回報先. 做咗所有大位情景測試, 結論話只要有任何無風險資產係入面, 就一定減少咗累積回報, 似乎傻傻咁持貨係最筍, 當然要有良好既心脏 (eq 或阿q) 嘞.

張 spreadsheet 太好玩, 咁就將個比率變做負數, 即係做槓桿借錢咁投資, 睇吓增加幾多回報同幾時先爆煲. 係有一蚊借五毫既情況下, 係零八年最惡劣時都係低全喳七巴仙左近, 到番今年則賺多十二巴仙 (要注意, 借貸成本係跌市時會變高, 啲超額回報怕且所剩無幾, 仲未計畀即追數); 但如果借到個六既話, 咁就係零八年爆咗煲, 如下:

雖則爆前賺多成四倍半又點.  係高位識得套利, 咁似乎幾難做到; 但係低位加高槓桿, 可操作性易得多, 雖則幾違反人性, 要賺得勁有時就要反住咁玩架嘞.

檢討

今年都唔算大上落, 到如今都係升咗 5.9% 而已, 百萬倉則升咗 8.7%, 只超 2.8 巴仙强. 做唔到今年增長幾十個, 又點見得人. 但事實就係事實, 求唔跑輸指數係中旨, 啲結果就係咁, 走唔甩架嘞, 如爭得太遠可能仲危啲, 因煑既方法同做緊既根本係另一回事, 手段咪即係目的既另一面啫.

滿意, 咁一定唔係啩. 雖則扣咁多年佣金係有些少影響, 但啲手法真係有啲唔妥. 倉內有藍籌做緊貼指數工具, 但唔係倒輸就係軟腳蟹, 雖則估值都算平. 大方向估得唔算太錯, 但落錯棋子都係得個桔, 如只懶懶直覺求其咁揀股, 真係死得. 而家 GOOGLE 都有橫向畀人去揀, 睇吓再揀都無咪蝕底啩. 藍籌咁多人及住, 倉內通常都跑輸, 唔岐視寒門, 都易跑出啲啩.

刻意去撈啲失寵股, 可惜開頭都係要扮蟹. 中鋁吸個時係跌既開始, 咁就食到應一應, 搞到翻唔到身吓話. 后期係宏利溝貨一役處理得好啲, 咁就有天淵之別了. 係跌既初期就溝一大注怕且真幼稚, 咪唔叫做初期, 咁就肯定係呢隻衰嘢再無人討論個時囉. 用 TA 未必揾到個底, 但無論你正住咁用, 反住咁用, 點都好過你用計數機咁去估, 因個時盤數又點會靚先, 當然個前提呢個調整係暫時性既財務問題. 雙底未必會有, 但大底成個月后倒后睇點都睇到啩, 係第一吓回調都買得過嘞, 唔好諗住要去番個底先架, 唔好咁膠. 如穏啲, 就分三四注去溝囉, 起碼用到一半啩, 攞番個平均算嘞.

內銀內房個啲都癈事提, 都係用估值咁等. 但無可否認中旅都係有炒既成份, 講真對佢既信心真係無惠理咁强, 而係個炒表入面真係有更多選擇. 之所以如開頭係炒既, 就要跟炒既規矩咁出入, 有食唔食喎. 諗番自己個啲炒出炒入既波幅, 變哂蟹個啲, 中旅起碼只不過輸番贏個啲啫, 仲想點.