八十后

你呢個小右仔, 終於有啲火啦. 立法局今晚仲未通得過高鐵, 怕且今次要玩鋪勁囉.

查實我幾欣賞呢批八十后, 睇佢地啲文章, 唔係無學問同火既人嚟. 香港其實不嬲都係理性討論既地方, 但而家政府仲當啲公民當係順民咁屈, 連討論既空間都想抺殺埋, 真係佛都有火, 人生仲可以等幾多個十年. 仲講乜 q 理性, 咪畀人姦完一次又一次.

八十后都咁徬徨, 個啲六十七十后掙扎緊個啲, 都唔知點面對啲屋企人好. 每個人既出路, 都係唔同既, 但一切只往錢看咪又係死路一條, 天地咁大邊只係得一條路去行先. 但而家香港連做小販都畀人趕, 猛咁進修開夜十年連豆腐潤咁細既樓都買唔起時, 你話仲有咪希望先. 而家愈嚟愈多人要執紙皮為生, 中年人就要投閒至散, 社會已接近爆發既臨界點. 起因根本就係貧富悬殊得太厲害, 官商勾結搞到平民無以為活.

本人都日日係咁抓銀, 但生財有道, 歇澤而漁, 定係長釣長有, 對雙方長遠都係有利呱.


http://thinkthinkpen.blogspot.com/2010/01/jet-lag.html

左右

同老同學反局, 吹吹吓又講到最近公投同最低工資, 時有火花. 俾人問到是否反自由經濟主義, 亦反唇問到咁自由又點會有雷曼爆煲, 係咪政府咪都唔駛管先.

政經政經, 從來就係孖生胎, 大部份政治問題就係點去分餅仔, 雖則個個政客都話係點整大個餅先係正路. 而家個餅整咗幾十年, 夠大呱, 咁怨氣點解愈嚟愈高呢. 老祖宗都講過, 不患寡而患不均. 要長治久安, 就要各階層和諧共存, 而唔係同你去做奴隷, 僅僅吊你到生存線就算. 好似一塊爛地, 你可以將佢變做麥田, 或做動物園收入場費, 或當癈物回收場以賺錢, 每一個都是平衡同埋可以持續既, 但如果你係入面其中一隻馬騮, 你又係唔係咁諗呢? 俾主人殺到埋身, 你仲去理到底個總 "社會" 大餅係咪最優化呢?

兩個人去分配一百萬, 主人有分配權, 僕人有否決權搞到大家都無, 最極致就係革命. 現實主人玩得起, 同你慢慢陰, 所以結果僕人只獲枱邊餅碎, 勉強維生而已, 唔好講結婚生仔囉. 十九世紀夠哂放任自由啦, 咪最后要立法保障工時等基本福利, 亦催生咗共產主義同人人髮指既法西斯. 叫啲資本家自動為下低啲人謀福祉, 或佢地好生意就自然滲落去, 咪講笑啦, 已經血蹟斑斑啦.

政府既責任就係市場不能完成任務或失靈時, 要提供必須之服務或以修正, 而日常則以仲裁市場運作及資源再調配以作政治上之分配及規劃. 現家政府一來自人大委任, 其副則來自所謂代表港人之小圈子選舉團. 上邊搖控不能日日睇住, 實際畀啲商業壟斷大亨騎劫了政權. 要佢地倒自己米, 攞少啲着數, 即係期望太陽由西方升起一樣. 筆者相信自由資本主義係某時段能創做出最大既財富, 但個個都咁窮, 啲資本又淨係拎去再投資, 或者快出快入咁炒, 咁係咪你啲仔女想要既環境呢. 而家上高都搞內需, 香江個個做港男港女, 揾鬼買佢地啲樓, 再去買奶粉呢?

ps 最低工資都要用客觀經濟嚟解決的, 啲資本咁醒啲會唔識避. 但呢個係技術上既問題, 而唔係方向上既問題, 好似用低收入津貼效果可能好啲, 一樣可以去諗.

笑話

股神係次會議后撞到索羅斯, 問佢呢排有乜發逹大計.
索: 發債最好揾,
股: 咁又係, 啲息咁鬼低, 但長得濟邊會有盲毛落嗒,
索: 靜靜雞話你知, 無限滾存, 零息, terms 亂嗡都可以既真係有喎,
股: 邊樹先, 咁筍,
索: 咪係搞到我一頸血個度囉, 九七既可以拖到零五, 零五既又賴到一二, 一二又拖到一七,一七又可以話循序漸還, 仲話要乜乜先, 呢啲先至係無限復活.
股: 可惜我無咁厚面皮, 又唔可以呃自己係老人痴呆.

下流

特首被啲律師中女問到話中產連港島樓都買唔起, 係唔係有啲搞錯呢? 網上又講到向上流已無望, 老屎忽阻住三四代上位, 講嚟講去都係個爭字.

九十年代起都知香江產業已趨空洞化, 如果搭唔到公務員尾班車, 係外面無增長下又點吸納到愈嚟愈多既大學畢業生呢. 再加上九七后各個風暴, 啲所謂中產裁裁吓都變哂下流啦. 上邊仲可以行到八九個增長, 睇番日本有同樣現象, 就不足奇了.

係一個比較成熟既體系裏, 階級係會慢慢形成既. 此所特首仔女親家唔會 mk, 法官個仔多啲人求情都唔駛坐監咁囉. 門弟既已成形, 普通人怕且只有几個出路.

醒目既要多付出多倍努力, 去到黄仁龍同馬局長咁 level 仲有啲希望既, 想考好啲就話想做 ao 發夢無咁早呱. 唔係就諗吓點係夾縫裏茁壯自己, 地產吸血鬼食哂你啲盈利呀, 咪寫吓手機程式博大霧囉, 靚仔靚女啲咪做吓財演賺吓快錢, 咁又得. 但以上食腦太多, 位置太少,怕且唔係解到几多渴.

而家興乜就做乜, 政府都係咁啦, 好似二千年就做 it, 零三年就搞零售,前年就讀中醫, 今年咪做地產經紀去囉, 就好似游牧民族咁見乜咪搶乜, 好過餓死呱. 再唔係做吓富豪啲管家或者清客, 做吓物業管理或者賣吓毒債攞回增.消極啲咪退隱江湖, 當然前提係唔駛去執紙皮啦. 諗落都几悲吓.

遙想到以前咁鬼封建考吓八股都可以分享治國權柄,小民南獠都可以坐而論道, 而家揸住支槍或者收緊你租啲人, 壓住順民成世既係咪合理同必然呢?

時

古人以日夜計時, 再延一年循環做結. 古代數百年如一, 所以有啲古人想時間只轉圈而已, 重複舊事姐. 度吓度吓, 以水漏計日有長有短, 用機械鐘計則又準啲, 而家就用到原子鐘咁話.

現實所見之鐘有一定程度同步性, 但落到而家最準嗰啲鐘過咗某千年亦無可能報緊同一個數, 咁只有假定宇宙有一個勻速既鐘, 宇宙每一點都有效, 時間就好似流水一樣流過所有事, 而對之有所作用, 其他鐘既同步性假設才有立足處. 以上為經典物理學對時間之說. 通常絶對呢樣嘢, 都只不過一種懶惰既假設或者對完美的一種執着而已.

相對論已證明唔同運動或重力狀態下既參考系統 (以叧一個嚟睇) 既時間變動速度都會不同, 所以絶對既鐘不會存在, 亦不需要. 只能說於每一個參考系統的鐘都是有效的 (即附合物理定律), 而各個參考系統亦可以轉換且都是等價的, 雖則講緊既好像不同.

咁縮到去一個參考系統裏, 咁到底時間係乜呢? 設想一個不老既觀察者封閉係一個密封既鐵箱入面, 牆上掛住一個時分秒鐘, 一路觀察住. 如果佢有記憶既話, 佢就會得出結論話世界是死寂的, 只有一種"時間" 既嘢來回伸縮, 將個鐘同自己記憶撥完一次又一次而已. 如果連個鐘都無, 個觀察者只意識到自己, 根本無需要假定時間既存在. 如果嗰個觀者係無記憶既話, 時間更加無從說起.

所以時間只存在於有記憶觀察者能觀運動中, 於神眼中時間只不過三維一樣可以前后穿越, 無所謂進行式. 如果一個心靈用星跟星距離做時間刻度, 到一日如宇宙再嚟縮番, 時間咪調轉番行囉; 全部縮番去奇點, 仲有乜鬼時間呢?

空

有實體之空, 抑只有衍生之空而已? 如謂實, 無物已可獨立於天地, 即是何所指? 又有何用?

說宇宙之外有一大空, 既然無物無光, 無物可載, 又怎算係空? 跟問起點前之時間一樣, 根本就不對題或無得答. 如果說可載為空既第一性, 可調轉嚟講空為所見物之第一假定而已. 話 a 君存在於某空間, 同等地即用某數把間尺叠埋去度姐, 就算用光束去度, 也只不過用另一種物光子去砌條數而已. 把間尺有時長, 有時短 (調較只不過跟另一物比較而已, 推論一樣), 光子撞歪走樣避免唔到, 唔通空間咁客觀咁就法上法落. 所以與其說空係實, 不如認清空只是物既另一面. 如果嗰道有空, 咁嗰道必有物, 無所謂絶對既空.

見到前面夠蛋糕, 好似唔點郁, 宏觀上都當啱既. 但微觀咁睇, 只不過概然地係呢到姐, 唔排除佢某一刻佢會係隔離房閃一閃, 係微觀世界呢個現像會更明顯. 所以每個物都會產生一夠雲狀物, 愈遠愈稀, 空就係各雲重叠而成, 矇矇鬆鬆郤內裏有物, 當然有啲空會比較實呱.

相

上 fb 一大樂趣就係睇下有乜新既相, 八卦下. 有啲乜鬼垃圾都放哂入面, 又有啲話要 re-touch 過先見得下人, 都唔知係影野定係畫緊野囉.

用數碼機影低幅相, 原汁原味咁就係唔係真呢? 只影到條女, 漏咗个男, 啲人怕且覺得唔夠真呱. 推而廣之, 係咪要攝哂全宇宙先算真呢. 所以所謂真只是某範圍既真而已, 大驚小怪, 都啱黑白邏輯既.

進一步, 用濾鏡將个天變藍啲咁算唔算原先既藍先? 塊面有粒暗瘡, 捽甩佢咁怕都唔係真呱. 但過咗幾十年假既都共認為係真囉, 眾人記憶怕且都如是. 調轉嚟諗, 如此人已亡, 点推論怕且分唔到邊張真邊張假呱, 懷疑始終都係得个疑字. 同一幅相假既可變為眾人概然地認為係真, 某記憶消失后反可變為死無对證既真. 記憶既然受願望感情所扭曲, 揾佢做真既驗證係咪危啲. 照堆論記憶愈少或減少之某些事反而變得更真, 不竟應有人操作緊呱.

做事

做一件事, 容易既可以變難, 難既亦能變易.

如果大方向已啱, 咁即係執行既問題而已. 最易混淆係手段當目的, 忘記初衷, 只糾纏於細節. 每一个主張必有人反對, 如个个應酬, 即係乜都唔駛做啦. 咁就共識下大方向先囉, 怕且都反唔到呱. ok, 既然咁樣唔得, 咁得唔得先, 唔啱, 你地不如講吓点做到先. 磨吓磨吓点都有啲嘢呱, 怕且再無籍口拖落去囉.

去行一个山, 有啲人著住隻拖鞋都爬到上去, 有啲左傾右傾擺哂陣, 虛咗幾年都係得个桔. 與其計吓有幾難, 不如望住大方向, 諗吓点兜路走下一步好過囉.

陰謀

外人喱香江食反見个个反前洗碗, o 哂嘴. 日常唸人之性善, 但連身边既都要防, 做出嚟剛剛相反.

而家大陸冧樓又有, 大頭賢石 bb 又有, 防人說大話浪費多少精力. 圣人說做人要誠, 但疑人已自不誠矣. 香江都有啲危, 大陸真唔知从何做起.

道徳基石如何高尚, 但導出散沙一盤, 自私自利, 几千年都喺咁又有何用. 荀子立足剛相反, 統治只用階級和蟹, 性惡口中否定, 但日常暴力已用之. 原意德為人為之度, 因時制宜. 人性物欲之性, 不節制統攝必致生亂. 所以人必日以學日洎德智之性, 日常亦要習禮以內充之.

以前仲有祠堂做吓仪禮, 現在公司要賺又点会講禮, 學校已變职業訓練所, 唔通上吓 internet 或睇电視可以習禮嗎? 習禮又無錢賺咁諗当喺傻仔, 什都向錢看又怎会有遠略.

餓

吃菠蘿包看墓碑一書時，想到阿鼻劍漫畫，饑荒中父母將要屠兒一幕。白衣淨士只係空想，要死的熬幾個月便解脫，活下來的反覆折磨，心中已下地獄。坑人整人的怕不會后悔，雖則死前想的亦差不多。

易子而食只當豬羊，但想著自家孩儿笑臉魂已消。當是外物可消可滅，但心實有感。安慰百年萬年后一切皆空，甚罪甚苦亦只歸虛無，有什么好算。

樂苦相隨，窮通亦如之。苦孽無邊，不為自己及旁人加添己是無量，其取向不離於不物化一切，於佛家來說怕是常懷慈悲之心呱。婦人之仁，只見其所見，佛家所見應是空中見苦蒂，亦是天堂路引。

墮落

餐廳上榜眾人朝聖食招牌菜，不失為一種咀咒，只有變差，從沒變好。

維記牛奶同豬潤逐日長龍，食未坐暖已趕客，囉黎賤，豬潤亦不見最沙最滑。時新排第一漢堡包卻不熱不泠，街坊都搖頭。九記對面闊太推介緊腩伊，卻韌過普通鋪頭。蘭芳園污糟檯面煮，面又生，加番茄都無用 ...

茶水濃落足料，多士黃金面熱到透吾係白曬曬，面煮得恰好又有中湯底，加三角火腿太陽蛋，附近地痞已足矣。

笑話

價值

女人﹕喳係手既最有價值﹔
男人﹕得吾到手既最有價值﹔
信徒﹕番到十番既先係價值﹔
股民﹕仲有價值既先係價值﹔
價值﹕存在先於價值，否則 ...

債券

證監﹕債券只是一種宣傳字眼﹔
任總﹕那麼，監字也只是宣傳，無實質內容﹔
證監﹕銀行好似係你管喎，新仔都就範啦﹔
任總﹕我既管就係貴人自管，買毒既寫住買毒既就得，自己找死就抵巨死咯。

預測

特首上年﹕特區行緊黃金大道，想吾發都幾難﹔
何生上年﹕我迫叫，睇四萬點﹔
...
財爺十二月后﹕金融海嘯一二浪黎緊，想吾輸都幾難﹔
陸生﹕今年波幅由八千至兩萬六，雖則我估市，但我都係價值信徒。

距陣

坐地鐵望對面母嬰，額對額笑住逗著玩。百年各人歸土后應無人記得此事，但於某時空或有類似事件，當然角色不同了。

每人所感為自身所限，但合眾人所見世界便是這樣，不能多亦不能少。推而廣之，萬物有情有感，空谷之花能感春日煦煦，其他雖不知，卻不能否定此為全感拼圖之一塊。木石為氣之流衍，感雖有但情無從著落。想著各生只為 Matrix 中一運算點，只感周圍，其硬體流變便是氣囉。

天人合一

耍太極二儀混一成太極，以小象擬大象。人既是天一部，當然大觀無所謂內外，如整天都直通玄天，只白相嗑瓜子囉。

周人只當天為人道之天帝，獎善懲惡。至道家虛室生白，才有偷天成仙之想。儒家修改為道德根本，直接天道，以人感天，只是鬼話。

人既為道之微觀，但俗塵所蔽，只行常人之行，好惡一之。於江湖落拓處，荒寺苔蘚，曲漡清泉靈臺稍明澈，大小宇宙交流相滲相洎，深處或能達致不能言說境界，參天地，亦可能只是神經失調。

自由

自由意志討論多千年怕且仍是懸局，其提出及反駁根本上不能證明或反駁。如某人能準確預測某事往后發生事項，但之后只要一件錯了便推翻命定。而且系統外參數太多及些微差距，已能令預期差天拱地。加上觀察者微觀干擾，邏輯上宇宙所有心靈都不能證明機械命定。如說事物存在於絕對中，又是廢話，不如落實心之感應玄觀，起碼有得分享。

自由意志於其說為事實，不如說為選擇。一人能認命所受皆命運安排，於最小壓力線生存。有人亦能為天地立心，拯萬民於水火。一念之閒，眼前可變天堂，亦可變地獄，視心之所視，心之著力處。人生為自由，反自馱大石往山上走堆塔作碑，不知道暮春三月，正好沖涼唱歌。

十宗罪

望著眼前端上的公仔麵，茶餐廳如果列入為世界遺產的話，那么於港人來說應是負資產。看日人食肆敬業整齊，比起爛達達中西融合強多。將心中悶氣一洩，望有志者能改之﹕

麵湯底清水一片師傅擔大旗，成為例牌。數年前起碼整色整水，番茄湯底易做瓜，牛腩底百角底亦過到骨，睇下澳門麵食都好過香江﹔

茶一就不要落，馬尿見到就想死。最怕連水都半溫不吞，大量放在旁，飲下還有油漬味﹔

例湯又係清水般死落味精。可知一碗正例湯簡直是龍睛呢。眉豆花生煲雞腳係灣仔就令人懷念﹔

白反翻煮散成一粒粒，狗都吾想食﹔

碟頭反猛加汁，吾知以為食緊湯反﹔

廁所洗碗廚房打成一片濕漉漉，里面還是洗料雜物房，廁紙欠奉﹔

永遠有飛蟲蟑螂幫你環保清貨，條抹檯布隨時多菌過張檯﹔

牛豬肉化學處理，嚼臘還好些，食到想吐﹔

面包外判無所謂，過期硬曬怎食﹔

平常中式茶水加檸就變檸茶，沖濃些就係奶荼，簡值侮辱港人條利。

公共財務‧二

最近政府提出新六條醫療融資方案，大眾視為新稅種及強積金延續，中產例牌得益少負擔最大。

醫療使費僅次於教育經費，隨香港人口日漸老化不能不面對。討論前要釐清以下問題﹕
1. 現公營醫療系統服務解決了何社會需要？是要擴充之還縮減之？
2. 醫療融資應視為公共服務，還是財富再分配工具？
3. 私人保險有保障範圍，更嚴重的如何保障？公共保險如何有別於現時系統？

於第一點公營服務已超過九成全港服務，下至門診上至大症手術都包括在內，本人曾住院觀察留院多是老病持久病者。政府所提供的服務應是社會或團體所不能供應的，滿街西醫中醫為何不用，質素監管中央病歷檔案做到便可以，老弱綜援可派醫療券代繳。政府應只負責急症及嚴重不能受保疾病縮減現系統﹔

生存權為基本人權不容侵犯，社會上富有的幫弱勢亦義不容辭，但所保的要限制在公共醫療所定範圍之內，以免民粹無限膨脹﹔

私保能保障門診以至中度有限額醫療費用，每人需求不同，但政府要令人知不參與所帶來之破產風險。政府應做的是展示病患數字及其使費，以令市民能於公司保及現醫保下調節，醫保多人參與應有下調空間及輔以稅務優惠，市民衡量下參與率必大大提升。貧困老弱大病肯定沒人受保，這正是政府存在所需，防病在漸，將資源放在預期性醫療好過發了才做。與其全民交公共保金，為何不如前文所說每年於盈余提撥成立福利基金以融資之，派錢容易收稅難呢。

語言與思想

詞語一下筆，概念已籠罩以下全文，到底是人在寫文，還是已陷舊窠。語言迷人，寫者多不知。

詞語歧義可多可少，一個仁字解釋累篇，各家說各家話，打空拳一樣，沒有堅實溝通基礎。孟子類議論聲勢迫人，但組織空疏，互相矛盾，氣放出來都要嚴謹法度。中文出名鬆動，致國人思維混沌一片。下次給人一大，應反問於現實有何對應，如其前后左右皆真，無非廢話。像電視劇一樣，將似是論辯推到極限可見真假。

言語聽得多想得多便成固念，日以夜求之卻不反思其初。猶如有人求財為家人幸福，反而目標達后冷落家人茲茲求發達。思想是主人，不要讓詞語反奴為主，至死為囚。

道德的計算

昨天看色戒后茶敘跟友說，似乎漢奸易先生於王仙芝以言更有人味，而不是遺棄她利用她的，正如她所說他正如一條毒蛇要鑽追她心窩一樣，幾場床戲沒有了便殘缺不全，內里含義迷語頗多，怕且要多細看一篇。

延伸談到汪丁等人做漢奸，有論如將淪陷區交給日本人管理，人民生活可能更不堪。遙想古時五代馮道宋末文天祥，前事三朝五主包括遼帝維持政權穩定，后則幽禁后拒做元宰相欣然赴義，雖則旁人勸說於水深火熱之民有利而維護之。

義有大小，互相矛盾，當以存大者近道者為尚。普通民眾不能離開，難道話活餓死，沒有選擇之下無所謂義或不義，但取舍之間亦能有出入，於自心能知。汪丁等人識書明理，於社會上知性上有更大選擇，勉顏事狼虎以救人民則何為主何為次，無異與虎謀皮及遮羞布矣。假若彼有魏文康熙在位，則獨善在身亦逸民之一途。

文天祥直通天道，不以一時得失為念，以衛道顯道為任已近宗教精神。但戲中老吳以黨義推人去死，那只是賊。義如不自發、自排、自決幾於人至於天道的話只是殺人坑人圈套而已。

氣

滿腦子道理，只見眼前一堆氣。有云道理在先，氣只為形而下，但沒有氣，道理只為空構，連馬后炮都不是。

存天理，去人欲喊了千年仍滔滔人欲，其可行性可知。人欲既為天賦，去人欲即去天。假如人人冰清玉潔環保，人必自絕一途。如不能肯定人欲，人則無立足矣。

人人以潔為潔，我則以卑下為本。如本不立不固，只為應聲蟲一鄉愿而已，何足論道。