斷估倉

係啲論譠由今年頭貼上斷估倉, 都係將自己同網友啲貼士加上倉位, 成年唔做買賣, 睇吓點. 得出嚟都係大上大落, 但似乎回報率都幾超班. 趁年尾得閒啲, 咁就快做每年既檢討同調整囉. 今日結如下:

啲老牌價值西報股, 同佢鬥長命真係想死. 華能畀阿爺咁壓搾, 都係自己捐錢好過嘞, 咁唯有全沽之哉, 換入低水招商局基金, 如信下年仲升既話.  傳統就話要 re-balance, 沽贏補弱, 咪好似逆風倒轉咁行. 贏既就唔郁, 跑輸既就等佢自己跑上嚟, 如沉淪就當縮碼, 橫掂呢個係無人駕駛倉, 要靠自己微調自己嘞.

買賣如下:

日期 (m/d/y)	行動	股票	每股價錢	數量	費用	輸入時間
12/03/2010	買入	中國石油化工股份	$7.26	2,000	$115.83	12/04 10:14:23	在分享  意見
12/03/2010	買入	招商局中國基金	$18.04	10,000	$647.64	12/04 10:12:35	在分享  意見
12/03/2010	賣出	華能國際電力股份	$4.35	24,000	$374.8	12/04 10:10:22	在分享  意見
12/03/2010	賣出	ＳＣＭＰ集團	$1.44	64,000	$330.85	12/04 10:08:37	在分享

變成新倉如下:

上落

寫緊個時, 同上月結爭幾十點, 即係無郁過咁話. 但前半月一口氣升二千點, 又用半個月跌番二千點去原位, 真係顛到想嘔突咁, 可見貼市之無謂. 如學人高位睇三萬, 低位又再睇低啲, 仲話可以食哂四千點波幅, 係咪有啲嬌天真呢, 都係自己睇自己傻傻好啲.

啲人話日本迷失廿年係資產負債表式衰退, 睇吓而家歐美都幾近似. qe 浸既唔係佢地本土, 而係流哂去啲新興市場, 主因係佢地啲家庭, 市府同銀行黑洞太深, 啲現金流同吊命錢都用哂嚟填窿, 印多多都係唔會有通脹架嘞, 唔 qe 都對唔住自己嘞, 點都好過衰退啩. 閒剩嗰啲, 咁唯有局賭去新興賭番鋪, 横掂睇落輸極都有得圍, 呢個趨勢怕且下年都係咁運行.

啲人話要趨吉避凶, 咁點知邊啲係吉凶先. 如果話升緊熱門個啲就係, 跌緊被人咒駡個啲就係, 咁係咪危啲呢. 如用年頭啲電車股或零八年啲基建股做吉例, 咁斷落去咪又去番點落車既問題. 日日睇住個市同貼住啲最新公司發佈, 加埋啲投機紀律, 都可能走得甩既, 但都怕且都幾短囉. 咁得出既循環, 就係要再揾過投機既對像 (用幾個星期或月既時間, 去買賣同一個工具, 唔可以叫做投資啩), 於專業既經理或投機者, 或者可能, 但要諸一般既投資者, 咁以乎無乜可能, 再壞啲咁諗, 怕且有害仲多啲, 猶其其注碼控制同紀律性上. 所以訕笑鞭策其他博客無所進取當然無任歡迎, 但要普通人照學呢啲轉身法咁就危啲囉.

倉內今年都有大跑輸, 大跑贏, 以中旅同惠理做例, 年中都調回原起步處, 咁如好似啲人話齋沽鬼哂啲弱, 咁個倉怕且更鬼肉酸. 個思路就係個中旅個啲資產值有得托吓 (今年跌番廿幾已), 同如股價低啲, 啲生意會有乜影響先, 如無壞既效果, 係咪要落多啲注先, 就算唔買, 都唔好沽住. 如話要揾引爆點, 咁咪仲難過吼落車既時機. 如注碼平均, 怕且都有啲 so, 因跌極都有得頂吓, 升就無止既話, 起碼交易費都無咁溶, 又唔使再要左諗右諗轉乜股. 當然唔係叫你去樣樣死守, 轉係睇本質咁轉, 而唔係單睇賬面上落咁去轉.

倉內轉股主睇估值, 巴西石油真係幾抵, 咁就分啲注碼去, 又可以順手博吓啲新興奧運概念. bac 啲壞消息真係多到無朋友, 幅圖又幾鬼肉酸, 就當佢係十一蚊美紙係小雙底, 賭就賭大啲, 起碼賬面係低過 xlf 一半呢.

月結.相變

呢個月狂升去二萬四邊未到, 嘟一聲又跌番落嚟, 由狂喜聳動, 又去番猶疑, 都幾得意既, 反正啲錢就係咁上上落落架嘞, 穏唔住都係食唔到跟住既大浪. 衝破三千位前已經有博友已話要清以上蟹貸, 一破啲人有鬧强姦金咁多年做咗啲乜. 可見人心已思動, 就好似啲水份子被冰封咁耐, 而家慢慢銷溶緊, 跟住份子既運動已不能用上一套去估算, 唔好話去鬥傻, 但心態要微調, 怕高就唔玩到啲高波波了, 技術上破咗三萬一先算嘞.

xlf 係抵, 咁又成年都係得個桔. 想吓跟住一年係會點, 睇嚟都係國內金融股值博得多, 起碼融資一步就到位, 唔使陰啲陰啲慢慢儲, 拖住點去升. 咁就微調啲注碼, xlf 睇吓仲有冇起色, 唔係就睇其他位再轉. 惠理謝清海加注得咁猛, 下年惠理必有場大龍鳳. 八十后話蓄唔到首期, 咁就買信和當儲蓄, 起碼首期個筆肯定唔會脫脚, 樓價跌番咪係本金賺番囉, 唔好諗住點都兩面賺, 唔好交易得咁幼稚.

月結 - 摩擦

今年以嚟內銀股真係跑輸哂大市, 仲未計嗰啲花旗金融毒股定埋格. 好似啲阿伯抄功課咁, 睇吓啲 a h 金融股差價, 由二成至三成不等, 咁就當係貴過廿五巴仙, 都唔好話唔厲害. 查番市面啲 a 股金融 etf, 有 2829, 2844 同 3061, 跟 nav 溢九至十二巴仙左右, 雖則貴啲, 但沽本地買番做套戥番一折, 除笨都有精. 2829 有十個對家做衍生合成, 2844 同 3061 則只有德銀做莊, 投資要計清楚風險, 啲合成都有啲似迷債架, 爆起嚟都一齊爆啩.

網上口水戰又討論價值投資同技術買賣優劣, 都係各說各話而已, 咁討論法都係改唔到對方. 講真, 如果對方死唔改, 以自己為正確為前提, 咁係咪對自己更有利呢. 之所以, 其爭也不以利, 只為口水贏對方而已. 就算明顯如股神或索老, 都有人辯駁, 拎埋張 statement去說人都係唔會入腦架嘞.  每一套路數, 最主要包括主要信念同相關技術. 但講到信念, 即係得個信字, 係咪真真係莫宰羊. 好似技術基本信念就係市場會重複自己, 價值投資就信每一項資產都有內含價值一樣. 由此信念就推導出各相應技術, 咁咪好似封閉自已自說自話一樣. 而一個學說可操作與否, 最后都係睇能否於現實中持續獲得盈利. 本人就無可無不可, 但有點要注意, 操作方法要切合自己性格, 反正條條大路通羅馬, 筆者唔會死板一塊, 但如對自己都唔誠, 欺完人變內化欺己, 咁就危人危己矣.

而呢兩套睇法, 最大分歧應係對風險既睇法同對其保險操作. 睇圖就話價值加死注溝淡長喳, 隨時爆煲, 起碼跑輸.  價值就話睇圖反覆買賣, 似盲頭烏英, 咪益哂啲劵商, 滿手茄薯或對沖合約, 一大升跌咪跑輸大市, 個市點會咁易估先, 睇錯仲即刻爆煲添.  其實每套心法都有其風險管理方法, 一注獨贏, 死咗唔關價值事啩, 似腦殘多啲囉.  同樣嚟講, 如果賭約夠分散同有勝算, 長賭都應有合理盈利既.  所以投資最緊要係風險管理, 一路賺咁又點, ltcm 爆煲一次就夠囉.

市面啲基金佬猛推快閃交易, 要免印花咁話. 記得最近睇既 "隠藏的邏輯" 一書, 其中用電腦模擬戯院眾人走火路線設計, 直覺認為走火門愈暢通愈好, 點知實驗下原來係出口處放番條圓柱啲死傷仲少啲. 類比下, 無咗印花, 睇落好似交易順暢咗, 但風險亦提高咗, 因大家都可以大沽大買嚟保險同食差價, 睇番歷史, 八七同今年閃電暴跌都係癹生係花旗, 所以有啲摩擦反而可減低大波動風險. 交印花稅怕且唔係一件愉快既事情嚟, 但買得股點都有啲閒錢, 唔同佢抽唔通打啲窮鬼主意, 當抽賭佣囉, 係第二度加咪仲大濟. 其實咁快賭法, 對投資者, 有乜益處呢, 啲對手咁强, 咪盞死.

百萬倉咁耐都無計過交易費, 咁都好似唔係咁誠. 假設咁多年收息率同大市一樣, 一年一半轉倉,總交易費為 0.3 巴仙 及 平均資產為二百萬, 咁每年交易費為 200 萬 x 0.3% =  hkd 6000, 中間跨時為 5.25 年, 總費用為 31500 元. 以后交易都會計埋犘擦.

月結 - 溝貨

既然差價縮番哂, 呢一刻仲平過花旗市, 咁就要做嘢. 如你問我到底知唔知入面黑箱係乜, 老實講真係木宰羊. 但價值投資呢樣嘢, 如做唔到愈跌愈買, 去到位又疑三疑四, 咁同匯丰三十三有咪分別呢. 投資無話必贏, 但到咗規則就要即做嘢, 九十幾都想去買, 但百萬倉月尾做先出手, 咁個價仲靚啲, 雖則可能遲啲仲抵啲. 今次五巴仙注碼去撈貨, 係將贏咗既去博多一鋪, 預咗輸番啲出去同要守一排. 東尼話而家暈理都變咗投機工具, 咁都係一個信號既.

見到個市唔係咁就, 啲中長美息係咁跌, 日圓係咁升, 都唔好話無啲遲疑. 但海潚時十年美息最低都係二厘多啲啲, 而家都去到二厘半左近, 四月個時最高四厘, 跌落去既空間怕且都已有限囉.資金再斷鍊機會係猛印銀紙下真係頗低, 咁息只會中期內升番, 啲錢唔係債就係流入股市, 所以筆者斷估年尾前點都有一升浪破今年高位, 但要注意, 本人坐貨都唔少喎.

每年

東尼魔咒再現, 宏理又跌番去十五月低位. 啲人一路撈, 一路咒駡一路止蝕, 咁都唔係辦法啩. 如果大師真係睇得咁透, 二百蚊都識轉哂身, 即係證明無乜邊個知盤數係乜, 只不過人云亦云而已. 渣得耐, 點都有啲感情, 惰性似啲啩, 轉身真係講就易, 禁掣個一刻真係會冒汗架, 點都用成二百幾買番嚟嘛.

高位點解唔走, 呢啲追悔問題問嚟都係把托, 唔係年年都大把畀番自己問到口啞, 反正個遊戲就係咁令你不斷追悔, 所以都係向前看緊要啲. 而家撈, 反正海潚大部份溝既都有賺, 呢個都係硬道理; 但 aig 都要清枱, 咁又係咪危啲呢. 正反睇落都有理, 即係點揀. 用倒后鏡嚟吹, 個個實係專家, 但用自家錢去投資或賭, 怕且都係要平衡一吓囉. 本人貨唔少, 溝當然對我無乜問題, 但去再添煩亂就唔係咁想搞, 所以本人策略都係以套戥為主, 現美國市同香江差距都有五至七巴仙左右, 盡快去做食番五六個應不難, 幫補吓都好過無. 如問點解唔早啲沽, 再去補番, 我就唔想亂咁炒去賺差價囉, 用套戥呢啲實食無痴牙無風險先係正路, 就唔知點解咁明顯都唔去套錢既.

一一零破咗, 技術上真係唔知跌去邊樹. 但上次海潚都頂得住, 就當係複癹唔死得, 如無貨慢慢溝唔死得啩, 以本人手法點都唔會溝到過五巴仙組合既. 以每年套戥觀察嚟估, 係低位美市低過香江五至二十巴仙 (極端情況), 暫時都未過十住, 所以咁次可能無調得咁勁, 撈可能要快啲. 係高位美調轉高過香江市, 但過常不會超過六巴仙. 所以今次幾時調完, 睇吓幾時縮番啲差距, 應係一個唔錯既參考, 但本人套戥為主, 差距大就做嘢, 唔會估轉角位囉. 斷估其差距源頭, 應係市場深度, 沽空機制同評價唔同啩.

百萬倉 强迫

係啲大戶睇淡聲中, 大市冉冉又升番年初, 低啲朵既位置. 朋友講過價值投資無乜效, 金融風暴爭啲死哂, 無哂彈葯去溝, 但估市呢樣嘢, 平時都係唔去做好過, 好似啲書本話齋, 歲寒先知乜係松柏, 唔係极端情況下, 價值都係隠而不顯, 吊轉嚟諗, 即係平日唔會點估到佢, 如常人嚟講, 頂底啩, 咁不如諗吓點優化持股同成本, 唔係真係乜都唔使做, 或日日去估炒囉.

呢排潮流就去買 a50 去撈阿爺底, 本人都有唔少 2823 貨底. 但近日報價都有過十巴仙溢價, 相比起 2846 數個巴仙溢似乎無咁抵, 未成事就先輸十個似乎非智者所為. 縮得勁就有 133 招商中國基金去到七折, 但啲經理咁狼死同你分身家咁去攞表現費, 買落去條氣都唔係咁順. 另一選擇就係換馬 820 滙丰中國基金, 都有折十巴仙左右, 雖則呢幾日升番唔少, 但都值博過 a50 多多囉.

樓價係咁升,直撲番去九七年既高峰位. 先前話要等調番至買嗰啲, 都要强迫性咁去買啲市區細單位或者啲上車盤嘞. 但浪呢樣嘢, 我就唔會估頂, 而家中原指數九七位仲未突破住, 但要創新高怕且都係睇時日而已. 我地呢脫人總算見過咪叫强迫性買樓法, 落唔落嗒都心中有數,盲毛咁衝就抵死. 但啲啱啱畢業嗰啲今次無居屋做軟墊咁入市, 今就看君好運囉. 其實一個市場你中意賭當然可以, 但民生既嘢點都要留番啲俾本地個啲玩吓, 唔係要個政府嚟原來係奴役或拋你去無雷公咁遠時, 咁唔同你當權死過先奇囉. 凡每一浪都係有動量既, 係唔會由人既意志所左右, 需要注意既就係佢既原動力轉角位, 諸君知道既話請單聲, 投資組合都要加啲屋戥吓啩, 但而家去槓桿就未搞嘞.

啲資源股果然跌到底就開始彈番, 自己既詛咒果然係信號, 起碼下次都要同人去溝. 中旅打完低, 突破番 1.8X 位, 兩蚊位睇嚟不遠矣.

絶對

寫咁多嘢, 有無人睇唔知道, 又無糧出, 點解啲 blogger 仲可以日寫夜寫. 如想為出名做財演鋪路, 其實有啲已開始做緊, 咪網上鋪排吓. 如果真係想同人分享吓投資之道, 但是否為大道, 本人就常以自己出錯為前提, 搭番啲樂觀, 但點推論都要行動番啲啩.

唔好講人地, 講番自己錯處, 真係掃埋都有成蘿. 匯丰一役講乜鬼價值投資, 咪好似散仔咁係最低價沽貨, 往日所謂堅持, 不過成就人地係你最殘處打劫你. 好似賭仔咁檢討, 如可堅持多半年, 咪由輸變贏番, 咪係又一傑作, 可以嚟獻吓世. 但知道心態已亂, 玩落去都係要死. 由眼睇信啲數字, 到否決啲信念, 都係果啲資料, 都係果啲人, 咁你而家又啲信你而家既判斷, 同你見到既嘢呢. 世事無話絶對既準, 但夠胆死用到最多五份一身家去博, 雖則個時個個都話獅王係盤石嚟, 所以信念呢樣嘢, 都係留番畀啲學生哥好過, 係自認一定無知吓, 分散係必須, 係持續生存既必須, 好似 benjamin 話齋, 持有或操作一隻證券, 不能說為構成一種投資. 但其中盲點, 就係人人同身邊啲人都話啱, 而呢幾十年都係佢令人發逹, 咁形成既信念, 係咪一種真理呢. 咁推論落去, 就算人類滅亡, 地球都要繁榮落去, 實有其他動物接捧, 獅王應千秋萬代, 真至宇宙結束為止. 唔好認為硬膠, 其實其他死樂觀既推論, 一路推落去就係有咁既結論. 當然筆者唔係末日論信徒, 如相反咁推咪即係樣樣都死, 咪要儲定糧水匿係深山, 等核爆等死. 之所以, 光明之處, 要預備黑暗; 係絶望時, 要耐性等待光明, 道都只係一種往還而已.

呢半年操作, 仲差過兩年幾前, 見到中石化同華能走出谷底, 咪慢慢買番, 咪買哂係山腰中間囉, 仲要畀人抽高咁派, 其他啲資源股輸幾十個更加唔使講嘞. 我地呢啲常人見到改善, 咪買囉, 但就係見唔到價錢同不對稱. 亦有啲后生 blogger 開頭講價值投資頭頭是道, 但最后進化出嚟既, 都係睇圖做買賣, 咁又好似忘記咗價值, 但啲券商一定支持囉. 人地成績我就懶得去核實, 自己就知咁睇消息去炒實死得, 唔死都蝕章. 睇番證券分析, 操作唔係睇時機, 就係睇價錢 (同價值之差距), 第一種要睇智慧, 后者就要加死注, 即係溝淡, 如你仲有水既話. 智慧常人通常都係無啩, 后者要加一啲死心眼, 同堅持囉. 日常練習, 唔係跌市, 就唔好買貨囉.

百萬倉.半年

搞咗半年, 都係要磨跌八個, a 場仲慘跌廿幾個, 雖則道指都唔係回得咁多, 外面似乎銀根無咁緊, 塘水滾塘魚, 真係唔知幾時先肯放水. 既然 a 場跌破中位, 下一個就退守黃金位, 而家係 2271 點, 距 1707 底三十三個, 唔通真係要做個雙底, 咁就死得人多了, 雖則唔係咁信囉.

原來網上填白表后要係截表前入數, 搞到申請咗三張細股都係得個填字. 跟住隻理財細細粒, 又無網上申請, 咁鬼趕客, 要入大張啲. 仲有個隻交通控制, 咁有概念, 都要大手啲. 其他入少少算, 啲地產就唔使諗囉.

死等

無寫幾個星期, 都掙扎好無寫落去, 但百萬倉每月都要報數, 點都要每月一篇啩. 啲網友問倉係咪真倉操作, 筆者就無咁傻, 真係將成副身家畀人睇, 只可以說, 與真倉成份操作基本一樣, 雖則風險取向有時少啲, 猶其係想避險時. 雖則避險方法唔同, 但年回報則巧合地一樣, 先前保守得制, 希望往后追得勁啲, 話要做到股神廿二巴仙年回報, 怕仲要切切實實調好啲手法同心力囉.

道指都算守得穏, 力守中線同牛熊, 唔破萬點問題不大. a 場則追貼番 h 股, 而家平水, 前幾日仲低過 h, 講咁鬼耐直通車, 而家咪係最好時機, 如可以既話, 一定開番個 a 股炒入面去, 起碼套番十廿個先. a 跌唔落, 香江市亦見守得住, 彈番牛熊去磨, 如無意外, 年尾前應突破 23000 位創新年高. 但先前熊一反彈高點係二萬六, 未必咁易突破, 破咗就海闊天空了. 以上次牛二經驗, 估計下年中先有力破向上. 呢一年都要揾啲大小概念炒炒波幅, 而家咪炒緊賭業股.

今期隻桑 x 徹回第二上市, 本人無抽慳番手續費, 見到啲價畀人係新加坡舞, 又搬啲舊股嚟套戥, 點夠佢地玩.  農行定得唔平, 市面都平過佢, 抽嚟做神功第子嚤. 抽前問吓啲經紀入非熱否好過, 都算係一種服務啩.

睇信報話隻超值傳媒股, 講到咁明顥, 望向日出咪真係無窮人. 呢間嘢都好搞鬼, 差唔多七成市值係現金, 計番剩得嗰啲咪即係兩年咪回本. 你見到, 唔通人地見唔到, 試過低過一蚊搞私有化, 怕且無咁易死心, 呢隻仲值博過鬼佬報, 但同馬氏去鬥磨, 要鬥耐性, 而家唔派息去趕客, 我就幾鐘意呢啲信號囉,等幾耐就唔知, 斷估一年內點都要成事, 盤數迫住靚啲仲點有肉食.

百萬倉 . 自由

今個月最低跌十幾個, 啲二三線都跌番去未升時或更低處, 散仔係咁平倉,癈事輸突上年賺嗰啲. 今個月最低點為 5/25/2010 18986 點, 收稍低於黃金位 19126 點, 之后就彈番上去無再落番. a 股呢兩星期除一交易日外, 全都能收高過中位. 道指則追跌破中位, 調回牛熊線附近. 如以內房股做領先指標, 既然再跌唔落, 冉冉上番, 可視為調整完既訊號, 睇番各指標亦頗脗合. 而家阿爺變咗做房產稅同歐元專家, 大把人做佢代言人, 猶其倫敦班鬼仔.

都諗過以信號嚟睇, 而家真係有幾多見熊信號, 例如 ah 同港股跌破牛熊多時, a 仲調多過十巴仙遠牛熊同離高位二十添. 之所以大把 blogger 話要清倉去反手食熊咁話, 上年波動咁大, 如無走既話蟹咁多, 都唔好話受得了, 都唔怪得啲人驚青既. 自己坐咗咁多貨, 話唔少少担心就呃你既, 但事實比起零八年坐咁少, 都係無嗰時咁担心. 既然坐嗰啲都係有實力既同分散持股, 就算惡劣如今次海嘯, 挨過了還不是一樣, 唔好畀波動大到就得. 其次, 亦重複反思投資既原意, 就係以合理既價錢, 以長期策略持有及調整優質既證券組合, 以作長期資產增埴及保存. 當然筆者唔會否定而家會再跌回萬七, 甚而仲低啲. 但打開過購物表, 真係樣樣都好鬼吸引, 就算蟹咗都幾有信心三五年內都去得番啩. 其次, ta 前提就係每個循環都會重複, 但以經驗睇, 每個 cycle 都有自己特性同波幅, 如只用上次路紙去估, 咁都幾危囉. 所以今次都係會以盈利線增長趨勢為主, 如大圍仲升緊, 同股價唔係偏高得太離譜, 咁就當係牛, 唔會點避險, 好似先前話齋, 睇到而家既離泡沫還遠呢, 但讀者如怕咗波幅, 就適量調整存貨比例囉.

瑞安跌勢以喘定, 反而信和追跌番, 香江對政策啲敏感度點都低啲. 各資源股都做咗大底, 中鋁都買得過了, 上高口氣都鬆咗好多. 惠理同中旅都升番, 其實係人都知今年咁鬼多人換回鄉證, 盈利必然爆升, 但係啲人都係咁沽, 真係無哂計.

李生話通脹一定嚟緊, 睇番連歐央行都要印銀紙買番歐債, 好似花旗咁量化寛鬆, 最尾又係水淹金山嚟多濟, 亦為本人無睇得咁淡一原因. 但佢話功能組別有功於香港, 咁又係, 佢既香港係唔同於小市民既香港, 小市民唔會係 target 買嘢食, 只想係街邊檔買吓菜揾歺晏仔, 但而家李生都食埋. 以前啲人收割, 都會唔會攞盡啲禾穗, 等啲孤兒寡婦都可以拾啲為生, 而家連餅碎都唔畀你, 唔通個個都要炒股同做 sales 先可以係香江生存. 最搞鬼就係泰國整咗個實彈射擊區, 合法殺人咁話, 各國都噤聲, 但債係要還既. 民主行咗咁多年, 實會遇到爭論同鬥爭, 但唔係體制鬥爭同改善其機制, 而係用第三者武力打壓自己玩哂, 咁又算係乜民主. 諗番臺灣忍咗阿扁咁多年, 雖然眼寃, 但真係太值得囉.

斷估-半半

去到啲大位, 都係要重複檢討大市走向同展望, 寫吓斷估篇呢看清前面條路. 呢兩個星期大插以后, 日升日跌, 磨到啲人意志無哂, 一係清倉做番塘邊鶴, 一就係長嗟短嘆, 怕真係呢個大插.

外人而家睇香江股市係中國股市分枝, 雖則直接畀國內, 本土及外來資金角力影響. 所以睇港升跌, 首要睇 a 場走勢為先, 正如九七前專跟美市走. 但 a 場今趟微調直情係重量級宏調,筆者都低估咗其威力, 食到應一應, 所以國內股民都話 a 場係政策市,今次真係有一番親身既體會. 國市未必跟外圍走, 今次就走前半年; a 股有時仲唔跟國內經濟唔同步, 好似零一至零五年咁反住走, 直至股改同 qfii 同外圍帶動回升為止. 而香江受 a 美兩市帶動, 外力都不容勿略, 上年三月美市創底都要令香港做多個底, 另邊 a 場早已一支箭飛走囉.

a 場大浪由 2008/11/4 (y/m/d) 日 1707 點開動直升至最高 2009/8/31 日 3471 點, 中間最低點為 2009/8/31 2668 點, 最近覆跌回附近, 今日收 2697 點. 三份一回調位及牛熊位早破, 中間位為 2589 點, 應為極强支持, 去到附近當局可能有啲嘢會做. a 股歷史高位為 2007/10/16 日 6092 點, 跟最近低位之中點為 3900 點, 今次升浪仍未觸及. 現五十天線同長期線交會於三千點左右, 現低過牛熊十巴仙過一星期, 不得不令人憂慮, 雖然反彈幅度超高, 不過以技術角度嚟睇其實未夠確定, 而且而家形勢都幾尷尬, 所以今月餘下走勢都幾緊要, 要睇緊啲. 所幸現在估值已比較合理, 周三晚啲外資係度吸 2823 同隘價升番去七八巴仙, 就算套戥都算值租啩.

香江今次牛市由 2008/10/27 11015 點開始, 升至牛一高點 2009/11/16 22944 點, 1/3 及中位為 18968 點及 16980 點, 牛一高位后最低點為 2010/2/8 19551 點. 技術上比 a 股强, 雖則上高收緊銀根, 外面猛印銀紙托番一把啩. 美市則由 2009/3/9 6547 點升至今, 未見高位, 亦已升破中位 10320 點 (2007/10/8 14093 點), 形勢現最强, 控到條水喉真係唔同啲,  跟足戱美市遲啲都要跌番啲啩.

而家每日后悔入得太早, 不過是零頭一巴仙以內, 點樣斷后向先係戲肉. 如睇位大出大入, 似乎最為理性. 技術上可以等確認先買賣, 但賭徒咁去買賣係咪投資緊先. 上次睇大跌都唔會清倉, 唔係既話可能入得仲少. 今次緊張咗可能坐貨重過以前, 如仲有一定現金可能從容啲, 但落注后其實分別咪一樣. 所以要回報, 相應壓力一定有無得避, 爭在係咪超出你預期. 又要唔跑輸大市, 又要跌市輸少啲, 邊有咁理想, 如咁做咪係咁出出入入. 估值現家唔算價值, 但亦唔係貴算合理, 睇大圍都係行牛為主, 大圍轉勢肯定信号真係未見到住 (a 股就幾半半), 如真大插插既話, 咁唯有換番啲散紙哂冷, 或等低位賭啲超反彈, 硬食囉.

洗單

琴晚話有人按錯盤,杜指即跌千點洗盤, 日元都升番兩三巴仙, 避險情緒急升. 咁啱得咁蹺, 我就唔係幾信囉, 係跌市中個個都想套現, 啲人睇住你嚟急住走, 順勢推多一把, 咪震哂出來了.

大市已跌破牛熊第二日, 先前以為 ah 代跌夠, 點知都係要追補番, 當然判斷錯誤係要畀唔少差價出街既. 二三線已嘔突變蝕, 但已不理, 大市唔知係咪到底, 但睇估值都算抵買, 咁就入都唔停得手, 連荷包仔都乾埋. 唔係話歐元危機唔駛理, 當然勁起上嚟去到金融風暴, 咁惡劣都有之. 但要等一切釐清, 仲點係呢啲價先, 而家買既當然打包埋入面既風險嘞, 入面有害, 但亦可能有利, 爭在你想要幾多風險回報. 網友好多已轉番入淡, 話今次反彈只不過係廉價流動性, 虛幻咁做成而已. 但觀諸每次大跌之前, 都係有個泡沫顛吓, 令股民如痴如醉, 今次真係見唔到. 而歷史上亦未見過由政府打壓下而見熊, 反而係托住咁去跌, 前兩年見過嘞. 技術上斷估篇已反覆討論牛熊, 真係幾難令筆者信反彈論囉. 當然世事乜都有可能, 以上言論亦係本人所坐之盤及地圖推論出嚟, 筆者睇錯當然會被套牢幾年, 但如守得下去, 不過會損失更靚低溝機會而已. 如讀者不能承受, 就要調節持貨, 以瞓得著為準囉. 如估方向咁去賭, 長期啱短期槓桿咁賭隨時都要輸光喎.

中鋁變咗價外輪, 賭得太早后悔已太遲, 未有既怕可以落吓細注. 中旅先前估得太强, 洗落嚟都係無險可守, 二三線真係要睇緊啲, 下次咁話.  反而地產雙雄守得唔錯, 或者下星期都咁强可變為領先. 咁多隻, 最穏都係 cop, 攻守皆宜.

百萬倉.上路

指數唔係跌咁多, 但呢兩個星期啲二三線係咁跌, 個個血崩咁話. 畀個二萬二拋窒, 加親啲內房資源起碼跌七八巴仙, 即做傻仔. 但見到咁低, 想溝都開始莫水, 啲抽新股都搞到乾哂塘, 好耐都未試過. 啲大盤陰吓陰吓跌, a 場仲低過牛熊七八巴仙, 今日先升番少少, 不得不令人警惕. 散水去避險而家似乎早得濟, 死症都要重複去驗, 睇番美港日股市, 同埋日元真係無乜唔妥出現, 但歐元同 a 場就真係幾弱, 但今次大跌都無辦法, 企咗邊就要堅持, 如唔係垃圾, 守幾年, 應回得番啩, 咁去博牛二三, 點都有蘇, 當然要犧牲可能低撈既機會, 但上年低位都無乜邊個 all in 喎.

滙豐同宏利輸咗幾多, 已不是重點, 要等平水先轉股係咪痴啲. 轉股睇吓相對值博與否而已. 既然呢兩隻唔係點郁, 亦再無興趣研究佢地黑箱盤數, 不如係低位轉去啲高波動好過. 睇番往績, 係上次牛市點解會跑輸, 通常都係買得太多 "價值" 點穴股同備用茄薯太多, 唔博又點會有平均或超回報呢. 唔會估調整完否, 差唔多就要出手. 既然估個市仲未玩完, 雖則內房技術上實在十分肉酸, 但亦代表而家最抵買啩. 中鋁係藍籌中都算最波動, 啱啱有得賺番, 咁就去馬吧. 開頭諗過不如轉 cop, 但未喪升住又賺緊, 緊係沽弱留强先嘞. 惠理畀五十天壓住, 要磨吓先.

最近睇咗國內期貨作手壽江所著 "作手" 一書, 書中自道自哲學系畢業后, 於九十年代初至零五年操盤期貨經歷. 作者本身早期困於短期波動, 畀貪婪恐懼控制, 强迫性做短線買賣, 傷痕纍纍. 后來反思自己操盤記録, 及印證其他作手總結, 將操作改為中線順勢操作, 於情緒, 風險同績效管理上更為可取. 此書文筆通暢, 真誠反影各種情景及其情緒反應, 可為各投資者反照. 提及如何選擇指標, 雖不免老生, 但細微之處不乏礫金. 末章提道投機者如何釋放自己於生命之中, 亦少見其他書提及. 最近本人都常思有否短線常勝之炒法, 理性上知其為謬, 但人性不免陷於僥倖之不理性. 看到書上話賺到幾百萬但要用個頭去換, 咁無生命既錢, 要來何用呢.

對賭

無嘢寫, 通常都係好事, 起碼唔使較位去入嘢, 即係大調緊, 賺緊高臥咪夠.

惠理今星期畀人洗到不似人形, 后悔都已太遲, 注碼太少怕且要留守了. 呢兩星期以為內房股調到夠啩,慢慢入咗啲上海姑爺,點知呢兩日畀阿爺追殺, 內銀股都要跟跌; 但壓呢樣嘢, 通常都係有起之勢先會有, 即係有升先至有壓. 國指已領先咁跌, 爭廿百天 2.5 巴仙, 牛熊 6.2 巴仙, 雖則 macd 有不利交差, 但上次掂完無幾耐, 一年唔會掂咁多次啩, 都係偏向追多啲 h 股, 快啲為主, 睇吓下星期點調. 美股就炒復蘇, 雖則美股唔係幾識升得顛, 但注碼搭夠, 咁就夠圍了.

入吓入吓, 都幾乎滿倉. 聴到有人話大調整將至, 都有啲銀耳. 但反唇咁低 b 怕且真幼稚, 諗吓係咪有得轉身, 兩手準備到先係緊要. 做到全倉, 即係百份百有信心, 要賺到盡咁話; 但投資一路走嚟, 都係要不斷係懷疑之中,否定之后再去肯定,然后又再重複嚟諗過, 所以無乜係百份百啩, 但都要係不太肯定中要作決定. 留太多現金亦不會,睇勢起碼一年內都唔會有乜大上落,走失大升既風險仲大啲, 見到喪升先算. 真係滿嘢既話, 以百萬倉經驗, 係高位保守啲, 係低位進取啲, 其實已可跑得贏, timing 其實仲難.

今日 a 股期指開鑼, 以往經驗通常現貨跟住起碼喪升番一二年 (美市 82 香江 86), 但實際有無人國內沽期, 香江買 2828 做套戥就莫宰羊, 但點都有 so 啩. 但如細戶無現貨做對沖, 日炒夜炒, 咪好似本地打蹾嗰啲, 咪得個輸字. 反而最近研究指數期權, 計吓怕且先覺得值得落注, 就好似賭場既廿一點枱咁樣. 技術性就上網或拎本書睇吓先嘞, 簡單啲咁講即係想做庄, 定係做閒先; 如果你有現貨, 係高位 sell call, 或者你肯 "真心" 係位買貨, 所以係低位 sell put, 咁去食時間值, 咁你咪係庄, 爭在會唔會將本來大賺既嘔番啲出嚟. 其他既咪係閒囉, 如做以上動作而無咁既條件 (無貨或無錢無心買嘢), 咁輸起上嚟真係唔講得笑, 切記. 記得零八年有網友收 2600 sell put 跟其他每月十萬咁話, 但十月一役輸咗三百個, 幾年收埋都怕且要嘔突, 如輸哂按金怕且真係要 total ko 囉.

百萬倉 . 輸光

開咗三鋪大, 今季跟 a 場開番鋪細. 呢兩季係 19300 至 2300 做整固, 記得上次 817 大奇蹟日都係 19300 左近組織大反彈. 睇圖五十天線已破二百天線, 潛落牛熊怕且都幾少見,咁就唯有嗱嗱聲升上去, 好有底都係無得改囉. 呢季美市行得好過 a 場, 升上去都健康啲啩.

花旗要沽哂啲花旗銀行股票, 市場反而腳軟. 通常政府畜嘢托市通常都有得贏, 之后沽咗仲有大把水位, 唔買係咪太鵪鶉呢. xlf 技術上亦向好, 溝上怕可以開始.香江已踏入通脹期, 大家怕己感受得到, 啲油點會唔升先, 買定啲油股資源股做吓對沖嘞. 中旅未開車, 睇吓有無得加注.

呢排打 fb 明星台灣馬吊, 如個晚輸光,第日又畀番五百分你再打過. 結果就係晚晚都要輸光再嚟, 打吓打吓諗番方展博係台灣炒幾格個時又係次次輸, 怕且都因為諗住儲番又可以再賭, 同可以挖慳妹個荷包仔. 如輸剩一半, 通常賭大啲, 輸咗咪又聴日攞番五百; 如贏咗賭得更大, 一唔少心就輸都破產, 所以點玩都要輸清光. 表面睇係注碼既問題, 其實係心態既問題, 我估同賭期指差唔多啩.技術上去賭要限 pool, 唔好一路加新錢, 唔係都唔知自己輸定贏, 仲要將個局無限咁延長; 其次唔好隨意加大注碼, 平均注怕且都穏啲, 除非個鋪機會率有優勢. 心態上唔好諗住嚟發逹, 而係持續有盈利, 做唔到就係做唔到.

上車

大市已突破向上, 二三線好多已創緊新高, 叫人去 take profit, 係咪揼錢落海呢. 中移動怕已扭轉弱勢, 和黃亦破咗阻力, 同地產股一樣, 領大市一路創高囉, 可以跑得贏啩.

朋友忍唔住問好無上車, 買吓啲上車盤入市. 見出面萬萬聲, 一萬賠百萬咁話, 真係又步入黃金大道似. 曾生話唔會朝令夕改, 但八萬五政改隨時都食言, 有乜唔改得先. 地又唔推多啲, 强迫八成拍賣又去屈機, 咁偏頗既政策咁又係咪為民制產先. 如果唔係一半香港人住係公屋, 怕且香江一早己暴動多時矣. 諗吓一個人造生造死, 但連租片瓦都唔得, 你話點唔會唔同你死過. 之所以公屋係社會既潤滑濟, 如用咪回報率計算咁真係死得. 居屋不太受歡迎是不爭事實, 但其將公屋戶升呢, 一級帶一級升級, 加强流動性係九七前其一既原動力. 外面啲錢當然好揾, 但第一其波動性太大, 靠死佢盞仆到直一直; 其次內部置業不足, 除減少內部消費外, 政治穏定性亦會減少, 為政者要深思之.

本人咁多年都無上車, 我都唔好獻醜囉. 但觀察樓市咁耐, 升到强迫性既九七又見過, 沙士恐慌性咁低又睇過, 賺多蝕少反而其次, 守唔守到先係重中之重. 自住既唔好當係投資, 當係消費更貼近現實, 租同買無偏頗先啱, 如數計得啱, 供款唔過總收入一半, 享受吓又咪所謂呢, 唔係自絶一世做乜先; 計唔掂咪長租囉, 唔好成人話同人供樓, 首期既機會成本滾廿年咪即係等於廿年既舊樓. 個樓市點升, 升到太空又點, 啲人買唔起咪得個價囉, 如係出面啲人買又關你乜事. 豪樓窮樓兩極化係客觀事實, 豪宅睇資金流動性, 本地窮樓睇吓樓宇供應量同租金回報率好過, 短期怕都仲有得上, 長期都怕係上上落落啫, 除非政府與民為敵, 與地產商沆瀣一氣囉.

中女

中旅 1.9x 打哂底, 2.07 突破后已完成后抽, 之后應持續向上, 2.1x 初怕且係最后入市位了. 惠理去到無人阻境地, 太誘人去食, 都係要等信號先做嘢, 未見到住. 另一中鋁, 係七蚊位上下打躉, 唔想落哂注碼, 係 7.7 至 八蚊食吓波幅, 有時都要轉吓膊既.

翻睇番 cctvb 中女特輯, 今次都唔算煽情, 但都係到喉唔到肺咁. 記得約十年前有女生家長投訴平機局, 話男女生唔公平咁排隊去攞成續, 影嚮以后入學機會, 最后政府都將兩條隊撈勻, 其后果就係大學男女生比例失衡, 做成而家女揾得多過男, 睇吓啲調查都話女既百萬富翁都係多啲嘞. 女既家長方當然大條道理, 男既家長亦無從辯駁, 但結果係咪佢地想要既呢. 公平怕且唔係死板一片, 殖民既智慧就畀啲上網上線咁整死, 每一個政策都影響深遠, 原則之外, 都要平衡吓其他原則同考慮, 要智慧地, 彈性地履行同檢討.

高樓價同傳統觀點塗毒啲港男女, 都不叙矣, 都咁多人講咗. 以技術上嚟睇, 不如畀個意見畀各男女好過. 女仔如大學畢業, 當歲數係廿二, 如佢預計最早廿四最遲三十六結婚, 中間就係咁揀. 咁就好似古哲講既故仔, 由頭到尾行入麥田, 想手揀一株最大最美既穗一樣, 但勁多弟子行完后, 一係兩手空空, 一係最尾求其揀啲弱既就算. 用黃金比率既睇法, 最正就係廿八拉埋, 三十二之前就要加把勁, 之后就真係點都要揾番件囉. 想揀番件正, 當然要咁上下 sample, 但太耐又歲月不饒人, 所以要攞個平衡, 去到廿八已經睇過大部份男人, 三十更加足夠啦. 筆者反對甚麼學業事業為上既籍口, 拖要早早拍, 好似投資一樣, 早啲輸好過最尾輸清光.

形實

網上話有大小三角, 悶局最尾都要突破. 睇番恆指五十天都就嚟下破二百天線, 雖則 a 場已破, 怕且如果個市唔散的話, 十日內必會向上突破, 先可以將所有線理順; 唔係既話, 咁就要睇清楚地形, 重繪幅地圖囉.

今個月買貨到乾塘, 咁就將收係籠底張 agency 債沽咗嚟套現, 唔係連抽新股都無水, 雖則呢排無乜好抽.  睇記録呢張債 (票面 5.25 厘至 12 年中) 係零八年中以 101 購入 (即係比票面高一巴仙), 前幾日以 107 尾沽出, 期間連收息回報即大約 14.5 巴仙, 年回報 9.6 巴仙, 係咁惡劣環境算係唔錯, 仲可以跑贏通脹添. 如果揀咗啲中長債基金, 回報仲高啲, 而且套現都唔使咁煩, 要打到美國同啲鬼講價. 但中間金融風暴個陣, 傻傻咁打去問價, 都曾經跌到 95 樓下, 之所以背景, 評級 (a 樓下就唔好買嘞) 同你既防守力都一樣重要架.

去論斷一個投資哲學成功與否, 當然要睇其回報, 唔係把口幾叻, 但輸都直一直有乜用. 但回報分長短期, 個股同組合既分別, 投資既如黑夜航行, 咁怕且無可能要求有即時回報, 怕且要有守既準備先耐得. 投機呢樣技術, 唔係話賺唔得, 但出入太快, 對注碼控制同 eq 要求太高, 係咪普通人採用到可成疑, 睇吓幾多人炒到燶就知嘞. 筆者都想組合隻隻跑贏大市, 但組合要攞個平衡, 就唔可以只見回報, 唔諗吓總體風險. 好似上高張債券, 開頭看似無用, 但無佢壯胆防守, 咁又邊有胆同彈葯呢兩年去溝. 年初個個睇死中移動, 照動量買法應直沽可也, 但偏偏到如今卻跑贏大市. 就好似有啲網友話齋, 基本分析唔係用嚟揾出贏家, 只係剔出輸家, 以減低組合風險, 未必一定跑得贏大市. 小投資者仲可以以現金水平嚟控制風險, 但好似一路咁話, 通常風險都係持得太少貨, 同埋係唔適當時機出入, 而唔係太有耐性咁持貨, 想吓你地啲投資記録嘞.

財爺份預算都係派吓糖算, 控制樓價都係做吓姿態, 地產股照炒可也. 但而家上萬尺既樓都唔係我地呢啲窮鬼去買架嘞, 咪係又係啲上高新貴同炒樓者左手交右手, 香江紐約倫敦化已成大勢. 坊間又質問政府貧富懸殊, 但啲中小企老闆話係咪要政治咁, 去分身家先. 但資源分配, 短期好似睇你有幾多資產, 但長期都係要睇吓個分配機制. 好似係明清個時你幾有米, 但制度限制下都要將啲金銀轉做土地, 或者政治資本, 因有權有地先至有權勢. 你而家有幾多港紙, 但一聲令下脫鈎, 又剩番幾多呢; 有好似如政府要抽股票及樓價增值稅一半, 你話啲資產個時又係乜價. 所以係一個新既政治形勢下, 啲財富係會自動分配既, 就算你名下啲資產一啲都無變. 而政治唔係一個適然既問題, 而係一個應然同力量既問題, 唔好畀財富既表象蠱惑, 要保持危機感.

神喻

年廿九阿爺先嚟收緊銀根, 琴晚花旗又嚟加貼現息, 紅盤到周末都要倒跌番三四百點. 扶手棍開始收番, 雖口口聲話乜都未證實, 但點都怕且經濟唔會再向下啩, 博都穏啲. 除日元外, 其他外幣都升番些, 啲炒家怕會轉番多用日元做套息, 長遠都係要跌, 日政經界都贊成啩.

奧巴馬决定起新核電廠, 自廿年來首見, 筆者有觀察 nlr etf, 其中包括核能發電集團, 鈾鑛物公司等, 長期跑輸美大市, 但新能源未有持續盈利模式, 核能可能跑得出都未定, 不過此 etf 派息頗低. 清潔能源 etf 則睇緊 pzd, 估值比較合理.

今日睇信報, 有文排列多年車公廟新春求籤, 見上年同零三年都係下籤, 反而零八年同二千年都係好籤. 除零八年下半年外, 以上此等極端, 都幾配合常人對周邊經濟既睇法, 但大市郤偏偏反住咁玩, 下籤就嘜高至少五十以上, 上籤就係大跌既開始, 或即跌一半畀你瞪眼. 所以五行術數測市呢樣嘢, 怕且都係滯后指數, 係極端嗰時記實要反住咁用, 中間嗰啲唔使理; 買本靠神人延伸去估市嗰啲, 自己去睇圖好過, 好過畀放大器帶住咁遊花園, 啲噪音少啲點都清醒啲啩.

鐵索

歐元區一個叠一個,個個性格同紀律都唔同, 搭埋一條船係咪有啲唔協. 話就限係三巴仙赤字以內, 希臘勁去到十二, 無政治力既自律點做到嘢. 記得大時代, 方展博點打低聯所條大鱷, 咪係沽爆佢是但一隻, 緊係搞最弱個隻啦. 九七金融風暴東亞各國都痴住美元, 因一邊賺美紙, 一邊要引資, 沽家緊係逐個食. 好在歐元大都係歐元區內做整合,里面公司做擴展都唔會借太多美紙啩, 所以沽家威力大極有限, 英德央行亦唔係碎料, 所以筆者不會認為會困擾大市太耐, 雖則點都會拖少少后腿. 但往后歐元區成員國, 必有一番政治上既整合, 怕且會有反覆; 如果一個政治經濟整合無一個相同既文化做背景, 怕且都要事倍工半, 此所以秦始皇統一后, 第一件做既就係書同文同焚書囉, 后邊漢咪要以儒法家理念, 做全國整合既工具, 就好似而家既馬毛江同胡囉.

大市稍為反彈到二萬三百, 有啲話彈到二萬一以上才算, 有啲話有終極一插去萬八, 同上星期咪一樣, 即係代表緊恐懼既情緒而已. 唔係話唔理情緒呢樣嘢, 但係股市揾食, 怕且係策略行先啫, 諗吓點分配注碼同止嘢好過, 臨場照做咪得, 日日估市有咪謂呢, 掃吓間屋好過. 呢幾年唔知點解, 凡係農曆年前都係大調整, 之所以鬼老啲嘢都唔好信到十足. 但前年係頹既開始, 上年係驚弓之后, 大勢點都唔同啩; 記住牛市都係係恐懼之中, 慢慢爬升架.

*****

政府放風話要搞個新既仲栽局, 嚟處理五十萬樓下既金融糾紛.  筆者就覺得都係揾嘢嚟搞, 又係搞啲乜局物局嚟推摚集體訴訟機制啫. 某論譠曾道:

叫啲盲毛同啲 banker lawyer 傾, 傾條毛咩, 咪畀人食住; 條仲裁又唔會主動咁查嘢, 掙係睇文件同聴 lawyer 或事主自己 (死得) 或其代表律師, 咁同小額審裁處有乜分別, 打贏哂神, 所剩都無幾啦; 仲講乜教育, 再教育多一萬年都有呢啲盲毛畀人昆架啦.

解決方法最簡單有兩方面: 1. 成立集體訴訟機制, 咁個啲范氏呀, bankers 呀, 唔可以話人地得個散紙跌咗, 就大人去高院鬥繞銀紙, 咁去甩身; 而且可以一次過處理成炸個案, 快啲有得賠, 唔駛畀人拖到無氣; 2. 證監處唔好再只用披露為本做檢證算, 要將投資產品分級, 假定分一至五級, 咁最高級一定唔可以賣畀非專業投資者; 其實里邊都寫咗好多指引, 但去到高層通常被人截哂, 呢排聴證會都聴到啲啦; 怕且要引入機制, 如果爆大鍋, 證監處要罰糧, 咁怕且佢啲人先會肉緊啲囉

選擇

今日創咗半年新低, 個個睇緊幾時跌到萬九, 誇啲話睇萬五, 甚而一萬. 網上有人止炒緊既嘢, 有啲溝哂彈葯, 可見今次調整都幾有威力. 各國外幣, 猶其歐元困於希臘財務危機, 陸續拆倉係咁跌, 只有人仔最穏, 遠期升緊.

技術上今日破咗近排低位萬九七, 可能要再創新低. 個個睇大市要跌回牛熊萬八七左右, 不如坐多一會等買平啲. 但市呢樣嘢, 唔係跌過籠, 一係撻唔到. 睇番上證已跌破牛熊幾日, 杜指就行最尾追跌. 現實上證行得最快, 所以星期中已預期點都會跟住强力反彈, 雖則未見到住. 所以筆者因而無睇得太淡, 且離底已近, 無謂估底先出手囉, 已戒咗好耐囉.

星期中彈反去二萬七百, 自己都忍唔住一路買, 連買三日下即要扮蟹. 幾日唔見七八個巴仙, 話唔少少肉痛就假. 但買個刻, 諗到如再彈上去, 反而會停一停; 如落唔番去咁就可能無得再平溝. 如再落咁就要一路蝕住, 一路買落去, 雖則會買得平啲. 先前都諗過到位先做嘢, 但都係好友底, 都係買得快一啲, 多一啲. 遇到咁既情形, 好似零四年初或零八年初, 都會問自己一句, 要貨定要錢先? 係呢一刻, 都係個句, 都係要貨先. 熊市行個陣, 買要慢, 主力沽就要快, 因大勢都係要跌; 反之如係牛, 咁買就要快一啲, 狠一啲, 因調整短, 反彈快到無影, 跟住仲要創新高無位你入番. 當然我唔會否定睇錯, 但大轉勢信號真係未見到住, 如將每次調整未到都當係轉勢, 咁真係有排畀人震, 重複一次又一次囉.

中石化同信和已跌到流口水位置, 有錢就慢慢買啦. 內銀股仍受配股困擾, 但最尾怕且都係阿爺供架啦, 有買趁手. xlf 跌, 畀奧巴馬咁大, 都係買吓選民怕, 點都要做啲嘢, 就算銀行唔操盤, 其他都要接過嚟賭, 圍起條數咪一樣. 惠理真係唔知點解咁强, 注碼咁少唔理囉.

*****

稅收呢樣嘢, 實無人鐘意啩, 但點都要揾人承擔. 如果要將已有之數抽, 必然雞飛狗走. 所以抽稅最好就係佢賺緊, 或者起碼收入產生嗰時抽, 佢想再賺落去, 就唯有要心甘咁去交囉. 之所以交印花稅, 點都爽過交差餉. 而且交得嗰啲都係社會上比較有競爭力既, 正係要再分配既來源. 如將稅源轉去消售稅或人頭稅呢啲嘢, 咪即係貧者愈貧, 咪反咗原意. 所以利得稅或入息稅, 最緊要唔比人貴, 唔畀人扯走咪得, 主動去減, 遲啲財赤邊個畀你加番先, 唔通向啲窮鬼開刀咩. 而家個個嘈緊貧富懸殊, 仲要減利得稅, 點講得通, 其實仲要加番啲上去就真, 橫掂香江咁好賺, 點舍得走. 入息稅反而可以將多啲人納入稅網, 但高階個啲納多少少, 將土地收入比例降低, 唔好再窒息香江嗰啲住戶同中小企, 同地產商同銀行打工同吊頸差唔多囉.

百萬倉 分配

個市就係咁玩你, 有少少信心, 半個月就跌到阿媽都認唔到. 溝吓溝吓, 連自己都開始猶疑, 係咪要忍吓先. 好似又見番一年前既自己一樣. 外面財演又話實見萬九或以下, 雖則只不過差七巴仙, 係唔係咁恐怖呢. 現家牛熊位萬八五左右, 冉冉向上, 但今星期低位掂過二百天線, 又未有振撼性跌市, 似乎怕最尾都要向下走一灣. 但又不排除彈反上去, 先嚟再插. 插到大位, 又唔排除再震深啲. 估吓等吓, 又係到企定定囉, 當然前提而家係行緊牛.

既然有咁多組合變化, 點都要留番啲嚟做估錯既保險. 假定估錯坐幾年都唔肉痛既, 當係七成貨, 留三成茄薯做守, 或用係超低位加注. 散仔當已入咗四成貨, 咁呢個調整即係有三成彈葯去入嘢, 但係點先入得最精明先? 最醒緊係等到最極一跌, 一次過入哂啦, 但錯過轉升番既話, 咁咪走失哂去入比較平貨既機會. 如入得太早, 如再跌低啲又無彈葯去溝. 當希望最低位係萬七五, 由二萬趈五百點一站, 做一個到底機會率分佈, 例如 : 20000 (10%)  19500 (15%)  19000 (15%)  18500 (30%) 18000 (20%) 17500 (10%); 咁一路跌會迫自己自動加注, 咁入唔哂, 點都入咗啲, 估錯低位仲有得溝, 雖則唔會買到最靚, 但經過上年筆者再無咁既妄想囉, 買平啲先係第一要務. 如果真係持久跌破最低位, 咁就要有打持久戰既準備, 剩番個啲注碼要有耐性, 小小心去用; 如跌到中途就落唔到去, 咁就中間波幅用埋或突破后買囉, 睇你性格而定. 最大可能就係忍唔住食小小波幅, 咁就失去平溝嚟長期投資既原意了, 唔好見小利而忘大利囉.

*****

有啲波浪大師, 好似啲高手匿係深山野嶺, 每日淨係睇圖去做買賣, 其化新聞報導都唔睇. 雖則無咁誇, 但筆者都愈睇愈少, 邊際效用不用說, 吞得太多反而仲递減添. 一個報導, 到底有啲乜先? 其實不離數據, 分析同評論而已. 大小市場幾十個, 每個市場又有上千成萬股票或產品, 無可能樣樣都要知, 關事同有重大聯繫先溜覽吓咪就得, 如讀者唔炒新股或壳股使乜睇啲小道消息呢. 其次數據大都係二三手既反芻, 時效不用說了, 重要數據要重複驗證不如睇第一手好過, 所以筆者大部份睇之資料大都來於 HKEX 及各統計大站為主. 睇資金路向, 外幣滙率及大宗商品睇圖已夠.

大部份分析同評論, 唔係屬於情感反應, 就係歸於願望, 大部份都係有害, 起碼無益於小投資者, 老點個啲更加唔使講了. 凖既就畀多啲心機去睇同理解佢地既思路, 本土李生, 任總無論你鐘意與否, 你無可能唔聴聴. 外國投資之神同央行評論亦值得細心去讀, 其他啲當雜文去睇好囉, 或反住去批判咁睇會穏啲囉, 唔好畀人洗腦. 別人既蜜糖, 可能係你既毒藥, 所以分析, 注碼風險管理點都要有自己一套, 點簡單都好過畀人舞.

*****

五區總辭用到 "起義" 同 "解放" 字眼, 好似孫悟空大鬧天宮一樣, 但怕且嚇怕咗中間一大片. 雖則開天撒價, 但對面都有個底線. 叫香江闊少同農民子弟兵死過咪講笑, 呢個係政治既現實, 香江既人點會反一中先, 亦無咁既實力同意願去做. 但民主派不可能永遠被邊縁化, 要當政唔可以只站係道德高地就算, 商界應見到功能組別頂唔到幾耐, 點都要揾代理人; 建制派要執政, 都可以組番個聯合政府, 以順利行政, 唔緃橫捭闔點攞到權呢. 咁耐歷史不離權勢, 金權同道統既結合, 偏埋一邊, 點會又善治呢, 善唔係全善, 世俗嚟講應係平衡呱.

換馬

呢幾日日日係咁跌, 今朝恆指仲停埋機去屈散仔, 個個係咁止蝕. 既預咗畀人派番, 咁咪慢慢入啲內銀, 指數同補番啲中旅. 今日差唔多掂到條二百天線, 之后係咁彈, 有啲話彈番上五十天再插過, 但離支持咁鬼近 (19000), 如無乜貨唔用係咪有啲唔妥. 最緊要, 係你覺唔覺係二萬上下買得落手, 同如跌番去係咪守得到囉, 如空倉嚟博撈底, 咪即係又重複前一年嗎.

沽去美麗華, 換入信和. 雖則無咁抵, 但今后兩年地產股點都有 so, 唔係李生唔會入自己咁密, 睇嚟呢隻大嘢係最抵, 亦係彈得最快. cop 同 xlf 注碼太偏, 勻番啲去落后中石化同交通.

NB 其化網頁美麗華報價為 7.13, 而百萬倉以 google 報價為主, 今日 71 其實是零成交, 此所以稀成交股差價大, 出入難矣. 真實倉操作成交價, 及次序會有一定出入, 但應係可 neglect 範圍.

工業人的未來

為企管大師杜拉克所著, 成書於二次大戰美國參戰前夕. 全書構想戰后, 以英美議會及民間社會發展歷史, 如何整合工業新勢力於傳統重商社會或類極權政權之中. 全書正如作者所倡導, 沒有勾繪出詳實的籃圖, 主道出引導式的原則及思想方法為主. 如將書名改做自由人的未來, 觀照最近政改訴求, 頗有參考地方.

作者認為大部份自由只是許可, 因其中個人沒有道德的責任. 就算在極權的國家之中, 人民都有搬遷擇偶的許可, 但所有政治或社會的決定都是由極權政體來決定, 人民免於負責的煩擾, 亦不想負責. 所以自由不是一種自然的狀態, 而是一種選擇, 且是一種不能說是愉快的負擔. 除非公民能有自決意願及準備以作政治參與, 一個自由社會及與之負責之政府便無從建立. 書中亦道及工業化大量生產化下, 個人已變為可替換生產零件, 猶如生產資源, 個人再無本身之身份及功能, 對任何社會均構成無組織之破壞力.

作者對把持自認真理, 或絶對理性之政權或人仕大加撻伐, 認為最后必導致極權統治. 理論上如一人或一群人掌握了真理或善, 其對立之民眾必為惡及可剷除的, 自由亦只是一種干擾而已. 所以作者反覆說一個自由人及政治家, 必然否定任何人能擁有絶對的善, 而政府權力應有明確的限制及程序. 而一個自由的社會是一個互相支援及制衡的組合, 以英美為例, 以財產權運作及社區團體之民間社會, 對立於以逹成眾人道德目標之政府; 而政客提出之願景及提案, 則受審於公職人仕對程序之審核, 一環接一環. 而憲法之成立只提出否定性之原則, 及簡易程序, 而不是對遠景之許諾, 俾彈性以未來環境之情勢發展.

書中亦論述管理權壟斷及中央規劃, 不公義及能引致極權. 描述股票投資者與管理層, 權力之衍生, 合法性及其間之矛盾, 其深度令人茅塞頓開, 雖則只寥寥數頁.

其中最令人啓發地方, 指出政府每一個決定都是一個道德的決定. 方案之研調只提供數字上之計算及可行性, 而方向性之選擇, 則取決於民眾道德價值取向之折衝. 書中預言經濟人社會功整合工能之不足, 及后發逹之社會除經濟發展之外, 對多元價傎發展之趨勢.

亂飛

外圍慢慢升, 港股就日日係咁跌, 但二三線等落后股發力, 資金轉住咁炒, 港元又强番, 農曆年前應不虞跌得去邊.

上高外貿終於止跌升番, 大勢已向上, 無咁易調得轉番. 銀根亦同時開始收緊, 內銀股短短三日已跌到一五零線處, 就算要供, 都係開心賺多啲去供, 唔執番啲係咪嘥啲呢. 船運股順勢炒起, 港口股唔使追加資本, 而家估值仍算合理, 加注都會穏啲. 講咁耐, 香江大把大價股, 今年都要番內地上板, 內地亦陸續引入本地指數基金, 拉扯之下, 本地估值應會向上, 以配合內地熱錢排洪. 唔想炒外幣, 但人民幣咁耐無郁, 出口又升番, 又話要搞吓內销, 點都要上番啲呱, 啲谷種就轉番啲去人仔囉.

美麗華半年業績睇落麻麻地, 似乎重估無乜入賬, 未到引爆點都幾難忍, 睇吓有咪可以轉. 中旅整固緊, 今個月應有位再入. 惠理佔總組合不大, 癈事食波幅, 其實通常估頂, 最尾都係哂神同揼心而已. 大市炒股唔炒市, 怕且要加多一隻想像股嚟跑快啲.

政壇話要同八十后溝通, 但唔通八十后啲訴求, 其他世代會唔認同, 同爭取嗎. 八十后亦唔係鐵板一塊, 有左中右, 跟其他世代一樣. 所以唔好再用呢啲去分化民眾同自己, 但今次無論反高鐵成功與否, 已令民眾知道議事廰功能代表議政既荒謬, 對跟住既五區公投同政制改革議題, 點都要參與多啲囉.

八十后

你呢個小右仔, 終於有啲火啦. 立法局今晚仲未通得過高鐵, 怕且今次要玩鋪勁囉.

查實我幾欣賞呢批八十后, 睇佢地啲文章, 唔係無學問同火既人嚟. 香港其實不嬲都係理性討論既地方, 但而家政府仲當啲公民當係順民咁屈, 連討論既空間都想抺殺埋, 真係佛都有火, 人生仲可以等幾多個十年. 仲講乜 q 理性, 咪畀人姦完一次又一次.

八十后都咁徬徨, 個啲六十七十后掙扎緊個啲, 都唔知點面對啲屋企人好. 每個人既出路, 都係唔同既, 但一切只往錢看咪又係死路一條, 天地咁大邊只係得一條路去行先. 但而家香港連做小販都畀人趕, 猛咁進修開夜十年連豆腐潤咁細既樓都買唔起時, 你話仲有咪希望先. 而家愈嚟愈多人要執紙皮為生, 中年人就要投閒至散, 社會已接近爆發既臨界點. 起因根本就係貧富悬殊得太厲害, 官商勾結搞到平民無以為活.

本人都日日係咁抓銀, 但生財有道, 歇澤而漁, 定係長釣長有, 對雙方長遠都係有利呱.


http://thinkthinkpen.blogspot.com/2010/01/jet-lag.html

開始

一路呷着咖啡, 同學問寫博好像自言自語, 到底真有人到訪否. 答猶如將信塞入酒樽, 擲到海中漂浮隨波, 給人拾到細心去讀一樣.

開博之時, 正是寫博潮流剛興起, 筆者跟其他人一樣, 都是瀏覽學習為主. 當時連手寫板都還未安裝, 只貼上買賣記録算. 其中買賣仿效東尼一週刋之百萬倉, 以作模擬港美股交易. 當時有感於網上末日論充斥, 自亦不會將實際操作發佈, 不如以價值選股為主, 輔以全倉不估市及定期優化持股, 以作檢驗及交流. 為免以人口實, 紀律以每天收市價, 即日買賣. 筆者欣賞各網友文辭富贍, 但如一主張只能以理壓人, 卻不能現實中產生任何可控制持續預期效果, 長遠來說對個人財務狀況, 不是流於過度保守, 怕便會集中於某一風險了.

牛市運行時, 百萬倉通常跑贏實際倉; 熊市則反之. 百萬倉以加入高波動股以增回報, 實際倉則主以現金水平調節風險. 剛剛熊市百萬倉都加入領滙煤氣減低衝擊, 但原先以為保險之滙豐宏利, 反帶來更大負面影響. 買過大賺之中鋁越秀, 但亦買過更多點穴股. 個人投資者多著眼於交易輸贏, 但組合投資應視為有機之全體, 以實行對投資理念之實現及其風險管理. 上年組合預防守保存實力, 今年則主進攻及防範通脹. 最高輸多過七十巴仙, 坊間嚇大眾需升廿三百巴仙才平手, 酌量買到同比例反無人做, 不加大風險便可. 賺了四五十巴仙, 止賺對組合當然有進賬, 但長期無異想跑輸大市, 放風箏看多高好過.

百萬倉 - 中場

花旗香江全穩收高於中點, 上斷估篇九月十六號后只有大概十日收低過,最低只差不過四巴仙; 再加已持續破中位, 反覆證實已為牛市, 爭在係是快是慢, 調咗先升, 定係再喪升一排先再插啫. 現家盈富二百天位係 19.2,牛熊位係 18.3, 今日收 22, 向下十七巴仙, 向上廿五至三十 (假定 26.5 到 28.8), 但先前高位大概為 23, 比牛熊高廿五巴仙左右, 似乎未夠顛住. 所以斷估下頭半年內要創中期高先, 跟住先嚟個大調整. 注碼照睇就起碼一半半, 真插破 18.3 再逐漸撤退避險. 點樣加注, 用乜策略, 係初牛唔駛我教啦, 但往后波幅應少於今昨兩年.

今日好似有啲粉飾櫥窗, 但亦可能有人忍唔住偷步. 惠理 3.7x 守得幾穩, 有人吸緊, 跟住應有突破. 宏利配股后 130 守得住, 求神唔好再嚟集資配嘢. xlf 同 cop 仲係到磨, cop 就食硬往后通脹. 中旅則一浪高過一浪,如回到 2.1x 或以下再加注.

年檢

今年大上大落, 驚心動魄, 對朋友曾說過經此一役, 勝讀十年書. 循例年尾都要做吓檢討, 以免再重覆犯錯, 今次成本比起以往高得太多, 諗起都隱隱作痛.

理論上管理層同股東坐係同一條船, 但各跨國金融巨企爆煲, 主要原因為管理層盲目追求盈利增長, 抵觸審慎投資之原則. 其目的為追求經理人超額花紅及權力之擴張. AIG 及 Citigroup 等未全爆前都發聲明, 話衍生捐失只佔股本少許, 過多陣就無哂事. 畀佢老點郁都唔郁個啲股東, 輸到直一直, 仲未計埋中途供股個啲呆鳥. 港人熟曉既滙豐夠誓神擘願話唔會供股同減派息, 咪又一個屈尾十仲要做突. 啲所謂良心聲明, 互相私下溝通, 老屈咗幾多港人既錢, 咁樣去推斷都算合情合理呱. 所以每一個聲明都係有原因, 而所帶嚟既好處當然係吹嗰個, 就算你半信半疑唔識郁都得. 下次如果某管理層或政府反覆否認某事, 但如成事對你本身有莫大負面影響, 咁就要當成真咁去作出至少部份或全面避險, 猶其是市場力量對着幹時, 啲錢落咗注點都可靠過啲老點迷障;

睇番自己中短期估市得啖笑, 就可知估市之無聊. 就算長期估得似樣啲又有乜好處, 咪淨係識得個驚同望住個升字. 此所以估市應以中長期為目的, 短期估呢嘥氣. 而執行策略上要引入一定量化目標, 到位及有信號時要自動做嘢, 而唔係靠直覺鵪鶉咁去交易. 計劃數字要係估市后要列明, 而唔係臨場去諗, 或衰到要去改;

筆者至今仍未買賣過期指及窩輪等衍生工具, 但見到網上死咗咁多都未免奉勸一句. 既然短線大市及股價不可測, 短炒既話基本上已注定死硬. 如果你諗自己就唔係常人, 應該有得贏, 咁你同普通賭仔都怕且無乜分別. 本人不反對用衍生嚟做正貨對沖, 猶其期指係唔錯鎖住利潤既工具. 但更多人單邊咁去賭, 仲要一張叠十張咁去加注, 真係知個死字點寫無. 保險怕且應係用嚟買人壽, 做投資就預咗上上落落, 鋪鋪廿一點都落保險 pace 實輸死你;

睇番紀録錯既多, 啱既少, 差唔多七三比. 但計落都有啲賺頭. 所以長線投資呢樣嘢, 怕且唔好怯於落注, 橫掂都要預咗輸既多贏既少. 當然買咗咁多落后股, 緊係賺少咗. 所以點樣篩選强勢股, 點樣控制注碼嚟輸少啲同贏多啲, 怕且要諗得仔細啲, 反正定咗個方向先.

左右

同老同學反局, 吹吹吓又講到最近公投同最低工資, 時有火花. 俾人問到是否反自由經濟主義, 亦反唇問到咁自由又點會有雷曼爆煲, 係咪政府咪都唔駛管先.

政經政經, 從來就係孖生胎, 大部份政治問題就係點去分餅仔, 雖則個個政客都話係點整大個餅先係正路. 而家個餅整咗幾十年, 夠大呱, 咁怨氣點解愈嚟愈高呢. 老祖宗都講過, 不患寡而患不均. 要長治久安, 就要各階層和諧共存, 而唔係同你去做奴隷, 僅僅吊你到生存線就算. 好似一塊爛地, 你可以將佢變做麥田, 或做動物園收入場費, 或當癈物回收場以賺錢, 每一個都是平衡同埋可以持續既, 但如果你係入面其中一隻馬騮, 你又係唔係咁諗呢? 俾主人殺到埋身, 你仲去理到底個總 "社會" 大餅係咪最優化呢?

兩個人去分配一百萬, 主人有分配權, 僕人有否決權搞到大家都無, 最極致就係革命. 現實主人玩得起, 同你慢慢陰, 所以結果僕人只獲枱邊餅碎, 勉強維生而已, 唔好講結婚生仔囉. 十九世紀夠哂放任自由啦, 咪最后要立法保障工時等基本福利, 亦催生咗共產主義同人人髮指既法西斯. 叫啲資本家自動為下低啲人謀福祉, 或佢地好生意就自然滲落去, 咪講笑啦, 已經血蹟斑斑啦.

政府既責任就係市場不能完成任務或失靈時, 要提供必須之服務或以修正, 而日常則以仲裁市場運作及資源再調配以作政治上之分配及規劃. 現家政府一來自人大委任, 其副則來自所謂代表港人之小圈子選舉團. 上邊搖控不能日日睇住, 實際畀啲商業壟斷大亨騎劫了政權. 要佢地倒自己米, 攞少啲着數, 即係期望太陽由西方升起一樣. 筆者相信自由資本主義係某時段能創做出最大既財富, 但個個都咁窮, 啲資本又淨係拎去再投資, 或者快出快入咁炒, 咁係咪你啲仔女想要既環境呢. 而家上高都搞內需, 香江個個做港男港女, 揾鬼買佢地啲樓, 再去買奶粉呢?

ps 最低工資都要用客觀經濟嚟解決的, 啲資本咁醒啲會唔識避. 但呢個係技術上既問題, 而唔係方向上既問題, 好似用低收入津貼效果可能好啲, 一樣可以去諗.

執漏

上星期日日有新股上版, 炒完仲要倒輸啲出去. 其實成年計落條數, 怕且只賺到條毛而已, 反而用親戚個戶口年尾抽幾次, 諗住幫補吓, 反而收獲差唔多. 其中分別就係質素同注碼既分別, 因后者錢銀有限, 所以無把握就唔抽, 亦因白表往來費時, 反而沽得好價, 兩加以后贏鬼哂. 所以亂咁去抽都唔係路, 連招股都唔想睇就限吓碼啦, 唔係就抽到一褲咁嚟去輸. 反過嚟講, 有潛質既既然派得不多, 就要分飛盡量抽, 唔駛我教呱, 而食個時唔好咁擒青, 要等個勢話畀你知邊樹走.

衰咗咁多次, 要搞到倒輸咁羞家, 怕要微調一下手法:

- 明知係圾垃同無水位就唔駛抽, 唔好為抽而抽, 吸毒畀鬼迷嗎;
- 想參與吓既就抽四五手撞吓手神算, 通常都有一手既; 但有時如華東垃圾個啲抽三手都可以派兩手, 唔知好笑定嬲好, 輸咗咪知;
- 有潛質個啲要盡量抽, 但不鼓勵孖展去抽, 超出自己財力最尾點都要還鋪勁; 其實用有限銀兩去分飛, 抽出嚟既效果係差唔多, 就算遇到全派都唔駛揾錢嚟填穵;
- 無論點有信心一定要開市前落定止蝕盤, 癈事臨門撻Q. 試過咁多唔同落法, 最穩陣就應係招股價加一巴仙位個度高啲. 如果開市無耐就撻到附近, 個啲孖展客都要開始斬緊, 啲托咁無力, 唔通仲要咁傻仔去加注, 自動走好過, 好過哂神. 試過懶有信心擺係招股價下面一格, 死得仲慘, 穿咗啲沽壓排山倒海, 仲要用市價輸多幾格. 平手當哂神啫, 輸就呻笨;
- 如黑仔一開就破發, 咁第一日點都要揾位走, 唔好諗會唔會彈得返上去, 機會太少唔值得博, 輸硬九成. 經驗通常都唔會低過廿巴仙, 所以開得太肉酸, 可以忍一忍, 將限價走貨盤放高啲去走, 反正實有人去博上去, 輸少幾個巴仙應不太難. 但緊記破發一定要即日走;
- 如果捱到第一朝似模似樣, 咁就要睇清楚盤路係咪有得谷上去; 記低最低做價做止賺, 調整唔破既話就酌量加注, 直至自動止賺為止. 咁樣做可能得個桔或仲要輸少少, 但賺上嚟一隻已可頂廿三十隻, 計落大有著數; 照經驗止賺后通常要調多兩三日, 如低位移番向上又可以再炒過, 直至一浪高過一浪之勢完為止, 嗰時已賺飽囉.

拆倉

歐元由 1.5x 跌回 1.43 中, 澳仔亦回到 6.9 跗近, 星期中見到中移動死猫彈, 而其他大股係度插, 就知道對沖倉有跌序拆倉, 市場已預備緊退市逐步收緊. 今次跌到幾多, 連日都有人問可以買得未, 通常都話可以既就慢慢嚟入. 大形勢花旗而家仲療緊傷, 除非失業率低過七先落得手去加息, 咁即係下年中之前都成唔到事. 上高炒高咗個市, 都唔想佢咁快去縮, 唯有出吓口術降吓温, 但東强西弱個勢怕且幾難改得到, 資金亦都唔會咁易放手, 無論係自家定係印出嚟既. 所以筆者認為今次應調不到牛熊線, 全世界都知既係咪大調既籍口呢. 如果你成身都係貨, 不嬲都勸要留番啲茄薯做轉身, 但未買夠既就唔好再錯失機會去吸嘢, 反正先前仲未狼死到大叫三萬二 gogogo 住.

技術上五十天線已破, 一百天都危危乎,但係睇番自己個倉今年都係得啖笑, 都廢事諗點去食呢啲波幅囉. 唔係話無得賺, 但低位没有充份利用, 錯失超靚位全力去溝, 反而一路升一路唔情願咁追, 想跑嬴大市有乜可能. 所以而家心態唔係再去諗金錢上賺多幾多, 而係諗今次點去食好呢個浪, 所以早預咗一路畀人派番. 如今次真係牛一尾中期調整, 咁怕且要硬食廿個巴仙以上, 但同樣嚟講亦可以利用此去減低持貨成本, 以畀追得貼大市多一啲, 這於筆者來說已是十分值得, 相比於賬面上之增減.

旁人或說今次可能係雙底衰退,咁死溝怕且十年都要輸. 但信號咁强都唔信係牛, 仲要日驚夜驚, 再唔係就去限注去賭囉. 如黑仔真係雙底, 技術上都會有一番掙扎, 好似零七年尾咁調法都有位出局, 你肯走點都有位你走,爭在有冇決心走而已. 未仆到已猶疑, 仲講乜鬼長線投資, 連坐多一季既耐性都無.

同舟

又幫朋友開獅王理財戶口, 友人剛録好音被分類做平衡型投資者, 多口問叧一個投資顧問有無 eli 賣, 條友仔一路吹一路反眼白, 叫隔離嗰個第日即去再做評估, 好升呢幫佢接 eli, 無辦法唔喝停之, 無咁擒青呱. 其實啲所謂問卷問嚟問去, 如憨憨咁答咪直落佢地窠臼, 咁佢地買乜中咗咪唔怪佢事囉.

而家理財啲顧問全靠銷售佣金維皮, 想唔 sell 啲高風險同啲毒都幾難矣. 睇番二三十年代銀行信托業都係以審慎理財為頶的, 而唔係死炒或猛咁將啲產品去轉, 而當時亦是以資產值大少收費. 基金公司當然想推自家產品, 但啲回佣可以立例只過畀客戶戶口, 而唔係去誘導啲中介人去 sell 賭.所以政府應立例中介理財只應以資產值去主要收費 (例如一巴仙或低啲), 啲顧問主要責任係建議或幫助客戶,因應各人風險承受能力及需要而作出審慎資產既調配. 中介表現費應限制低於主要費用四份之一以下, 以避免高風險誘因. 如果炸爆咗個客, 亦等於斷自己米路, 唔同舟都唔得囉.此等建議當然會乞好多人憎, 但幫大袋賺多啲緊要, 定係為民制產緊要啲呢?

咁嗰啲高風險投資者, 要自己主動聯絡各基金公司或投行去攞資料研究, 或直接自己操盤囉. 好過畀人昆同呃呱, 反正都無乜賺過.

通信

論譠日日駡中移加中國通信 (552), 都唔知幾時先識郁, 仲要陰陰跌. 本人喜燒冷灶,唯有慢慢加注逐漸入等買平啲.

下游直銷散仔電話咭, 不如做上游服務好過, 通常賣鏟既都好賺過掘金嗰啲呱. 如本錢有限當然沽移動換通信啦, 筆者仲有茄薯, 咁就今日開始慢慢買通信, 反正係低位度磨緊, 現正處於上市日收市附近, 唔係話一定係底, 但起碼係大位囉.

而家 PE 大概 15.5 左右, 今后年增長當係 17 或 33 既平均既話, 即係 25,咁計落現價 4.0X應有六十多巴仙水位升, 之后才算合理. 起果 3G 無咁快呱, 玩個三四年都有排玩呱.

基本

友人鐘意炒股仔, 今年初重傷至今仲未復元. 細問之下, 唔係從未膁過, 只不過烏吓烏吓將賺咗廿三十嗰啲嘔突番出嚟, 仲要重傷添. 佢啲經紀都話佢咁炒法, 似乎啱炒藍籌多啲囉.

自己炒新股同波幅, 有時都斬唔落手. 見食少咁多, 緊係覺得唔抵, 到止賺咪等多陣, 咁又直插落去囉, 嗰時仲揼心. 但細諗, 有得賺, 仲好過倒蝕呱, 唔輸實係投機第一要務, 輸鋪勁贏幾多鋪細都爭唔番. 所以而家一去炒既話, 一落完盤就一定同時落番個止賺(蝕)盤先, 電腦唔會有感情猶疑, 佢斬完你都未覺, 插落嚟差不多一定做到, 除非早上開盤 ao 勁拋離原先止嗰個位啫.

擧最近炒新股龍湖做例子, 最近幾日做價如下:

日期	開市	最高	最低	收市	成交量	調整收市價*
2009-12-02	8.08	8.46	8.08	8.40	24,202,000	8.40
2009-12-01	7.96	8.05	7.87	8.00	12,337,500	8.00
2009-11-30	7.90	8.07	7.86	8.00	20,842,100	8.00
2009-11-27	7.70	7.84	7.57	7.71	30,536,500	7.71
2009-11-26	8.15	8.17	7.83	7.92	43,846,200	7.92
2009-11-25	8.31	8.33	8.08	8.15	37,008,000	8.15
2009-11-24	8.06	8.48	8.00	8.35	54,807,000	8.35
2009-11-23	8.08	8.26	7.98	8.06	26,871,400	8.06
2009-11-20	7.95	8.37	7.83	8.10	102,219,400	8.10
2009-11-19	7.20	8.19	7.20	8.01	561,915,300	8.01

如以每一日最低價做止賺既話, 那麼之后每日既止賺盤咪係 7.2, 7.83, 7.98, 8.00 同 8.08, 係廿六日最低做過 7.83, 即係一定掃過止賺盤, 所以自動於 8.08 或附近完成交易, 最麻煩地方就係每日收市要重新改止盤, 但咁既麻煩都唔錯呱. 現實中被上次 845 所大, 其實己於 ao 盤 7.2 沽清, 所以紀律遵守至為緊要.

如果炒股真係賺得超勁, 就將賺到既 1/3 做止賺位, 穿咗都怕且有陣調, 唔買番再彈上都賺夠啦, 唔好諗住賺哂全世界先喎.

百萬倉 - 觀望

唔郁就係唔肯郁, 雖則計過超哂值, 但埋單點都要圍吓數, 唯有沽去和黄, 轉入比較有把握中石化, 横豎資源股唔多夠. 注碼太小, 不如唔好賭, 就將偏重花旗金融股勻啲去細細粒囉.

呢兩日大市跌破五十天線, 昨週五爭啲穿埋一百天線, 三月升市已來首見, 不可不防. 上日跌得咁勁, 循例都要買啲守吓門口. 今日睇緊五十天線 21900 附近穿唔到, 畀番食反彈嗰啲出去. 明日企得穩咪買番, 差價當買些少保險費, 演習點都要做啲既, 唔係睇信號嚟做乜. 如再跌就忍一陣博好啲價逐級溝, 好過十上十落咁反覆.

新股龍源睇落定價算貴, 但明后兩年預計有七十多巴儿增長, 而家買緊四十幾倍, 以 peg 一對一嚟睇最多可食一半, 當然此等估值上年整死咗幾多無人知, 但短期都怕且啲經理都信住先, 唔係點去估值喎. 派到九十九似乎無乜可能, 啲人縮仲易抽得多添, 本人就分幾張細飛, 避免被迫爆, 另一方面又保證派得足夠多, 去炒.

笑話

股神係次會議后撞到索羅斯, 問佢呢排有乜發逹大計.
索: 發債最好揾,
股: 咁又係, 啲息咁鬼低, 但長得濟邊會有盲毛落嗒,
索: 靜靜雞話你知, 無限滾存, 零息, terms 亂嗡都可以既真係有喎,
股: 邊樹先, 咁筍,
索: 咪係搞到我一頸血個度囉, 九七既可以拖到零五, 零五既又賴到一二, 一二又拖到一七,一七又可以話循序漸還, 仲話要乜乜先, 呢啲先至係無限復活.
股: 可惜我無咁厚面皮, 又唔可以呃自己係老人痴呆.

人在中環: 賭運

人在中環: 賭運

燃料

最近瀏覽投機心法及投機策略兩書, 循例都教人記住記住要落止蝕盤, 同落場前要紀律性死跟已釐定計劃, 唔係實死硬. 反而一點比較有新意, 就係點解要去投機先, 即係乜動機. 要知道個個都話要玩鋪勁, 但有啲竟然有恐懼成功症, 有啲係用嚟解賭癮, 有啲係當係做愛, 各適其式. 用嚟打機當然無問題, 但成功率咁低, 啲錢又咁難揾, 財散家破可不大好玩.

動機有高有低, 但最緊要誠, 鄙不鄙反而其次. 口中話要用嚟做慈善, 當然不會面誹之, 但輸到要典床典席, 便知個心點捨得. 猶如起樓, 先立好根本, 穩打穩扎一步步起上去, 卑亦可變高. 要買樓生仔結婚, 條數清清楚楚寫低, 初頭睇似遙遠, 但照計劃逐步做必能做到,通常仲快過先前既預期. 股票只是投資工具之一, 有啲買樓收租又得, 玩石頭又得. 計劃應計到最差時點去開反交租, 無人成世好運呱, 點樣去安撫情緒就要成熟啲去睇.

好似網友話齋, 啲阿伯矇吓矇吓買中人壽嚟收息反而賺得超多過啲炒出炒入. 炒個啲開頭都諗投資呱. 當然我呢半個賭仔唔係反對去賭, 你可以將投機納入計劃之內, 但要有其限度而不是日日去估市, 喧賓咁奪主.

筆者可不會認為人人可以成聖,但真係一日反正賺多個零都當是打機的話, 基本或至稍豪生活都過得起既時候,回贈啲返社會都無所謂啦, 輸嗰時咪可以守耐啲囉, 反正最后用的很大可能不是你, 死都要攬住啲虛係咪有啲痴呢.

人在中環: 賭徒

人在中環: 賭徒

有機會成人, 已經賭贏咗第一鋪, 人生點唔會唔係賭呢.

大部份人都認為賭係衰嘢, 但呢個唔係選擇既問題, 根本就係無得揀, 局住就係要你去賭. ok, 二千年 it 好景, 個個大學就湧去讀電腦, 咁圍住去大算唔算係賭先. 有啲人成世死慳死抵, 拎哂去買債收息, 點住原來係賭得仲大, 輸得超大, 嚇個半死. 如不知每一個選擇都係一賭, 唔諗吓點平衡風險, 只知逃避承擔選擇既責任, 咁真係幾危矣.

市賬

國浩慢慢吸東亞至八巴仙, 進可攻退可守, 亦可見香江金融樞杻之要. 而家東亞市賬 1.6,香江中小銀行市賬率排列如下:

349   1.68 (可見將來整合於工商中國);
2356  1.26
440   1.16
1111  1.09
636   0.90
626   0.76

可於折價買入只剩 636 及 626, 雖則 1111 創興分行多啲,收購動機會大啲. 用呢三隻做個待收購組合, 應有四五成可食既.

回看 xlf 平均市賬率市只逹 1.00 只, 加時猶疑看吓入面有乜死既都唔見咗, 剩低個啲都怕且死唔去呱. 比較資源股市脹率亦是主要參考數.

百萬倉 - 來了

今個星期跌足三日接近千四點, 提醒散仔知道調上嚟有幾急, 每一掂五十天線呢半年必彈上去.但個個苦口婆心勸吿, 即大家未入夠貨.但都諗自己亦常係明燈一盞, 都唔好咁老定, 雖則可入既都已入囇, 再入就係博大霧,用哂現金就企定定囉.

倉內金融股實在太多, 本想掦走宏利算. 但整體進取性不夠, 雖則係既插上嚟都幾痛, 但唔博買股嚟做乜呢. 所以沽出中銀, 換入內消中旅同未升夠美金融股基金, 遲啲再睇吓點去整勻啲. 如無意外, 會盡量用少過十隻股嚟組合投資, 加一隻前先沽一隻.

而家中美數據參差放出, 多屬利好, 但專家仲係睇淡居多, 睇后多過向前,好都係暫時好而已, 遲早跌過. 但經上年兩次跌, 仲揸得既都相對比較强; 不能說再没有反覆, 但心中已演習多次同大家已有底, 所以情况都是日趨好為主. 所以本人認為今次調極都不會破牛熊向上之勢. 以現家盈富收市 21.85 同牛熊位 16.97, 一路調平均入就可攞到價為 19.41, 同而家爭 12% 左右, 所以食波幅就不太夠, 或要極强忍功. 如而家你仲係大把現金, 要好好利用跟住一兩季囉, 升上去都係風險, 而家知啦. 想轉到身, 留番兩三成現金, 一路彈一路追囉.

觀察

華能 (902) 星期中一洗頹風, 某日竟入十大成交榜,顯示散仔要追同沽空補貨. 網上討論到此是否阿伯可揸之股, 啲人話利錢又低, 債又兩倍於股本,賭贏係好運, 輸就扺死. 話一隻嘢只有好, 没有壞, 怕且無乜可能. 如只諗好嗰邊, 唔去聴吓有咪壞, 係咪有啲傻同危呢.但以前一聴都會動搖初衷, 但而家一動不如一靜, 起碼注碼只去一半, 已有第一層保險絲, 輸極都有數可圍, 怕且仲可以溝吓添.

美金日跌, 中港資產泡沫遲早爆鋪勁,香江地產今個星期點爆不用多贅. 但行街見到各色遊客, 包括埋東南亞人仕,比起一季前多約一倍, 亦有可能先前海嘯跌得太多. 先前己落注酒店股,最近升市查看仲有乜中資股未升,中旅 (0308) 未大升住仲有水位, 債無幾多,盈利大跌都係數字遊戲而已. 可以諗吓, 今星期已入第一注, 有好位會再加.

睇報紙話南華早報 (583) 人工海嘯減后回復舊觀, 雖則主炒資產重組, 但唔駛蝕點都好過每日倒錢. 琴日仲可以 1.3x 頭買, 今日已彈到 1.4x, 觀察再加少少想像力已可食少少既.

下流

特首被啲律師中女問到話中產連港島樓都買唔起, 係唔係有啲搞錯呢? 網上又講到向上流已無望, 老屎忽阻住三四代上位, 講嚟講去都係個爭字.

九十年代起都知香江產業已趨空洞化, 如果搭唔到公務員尾班車, 係外面無增長下又點吸納到愈嚟愈多既大學畢業生呢. 再加上九七后各個風暴, 啲所謂中產裁裁吓都變哂下流啦. 上邊仲可以行到八九個增長, 睇番日本有同樣現象, 就不足奇了.

係一個比較成熟既體系裏, 階級係會慢慢形成既. 此所特首仔女親家唔會 mk, 法官個仔多啲人求情都唔駛坐監咁囉. 門弟既已成形, 普通人怕且只有几個出路.

醒目既要多付出多倍努力, 去到黄仁龍同馬局長咁 level 仲有啲希望既, 想考好啲就話想做 ao 發夢無咁早呱. 唔係就諗吓點係夾縫裏茁壯自己, 地產吸血鬼食哂你啲盈利呀, 咪寫吓手機程式博大霧囉, 靚仔靚女啲咪做吓財演賺吓快錢, 咁又得. 但以上食腦太多, 位置太少,怕且唔係解到几多渴.

而家興乜就做乜, 政府都係咁啦, 好似二千年就做 it, 零三年就搞零售,前年就讀中醫, 今年咪做地產經紀去囉, 就好似游牧民族咁見乜咪搶乜, 好過餓死呱. 再唔係做吓富豪啲管家或者清客, 做吓物業管理或者賣吓毒債攞回增.消極啲咪退隱江湖, 當然前提係唔駛去執紙皮啦. 諗落都几悲吓.

遙想到以前咁鬼封建考吓八股都可以分享治國權柄,小民南獠都可以坐而論道, 而家揸住支槍或者收緊你租啲人, 壓住順民成世既係咪合理同必然呢?

滴汗

友人想買番啲港美債券或者嗰啲債券基金, 咪同佢約咗個經理吹吓水囉. 入到去當然金碧輝煌,熱茶款款送過來啦.

都預咗實介紹啲比較高回報嗰啲架啦, 當然係俾 sales 佣嗰啲. 但真係估唔到而家仲夠胆死推介啲疑似毒債, 唔係話佢仲打包緊結溝性票據, 而係入面嗰啲所謂債真係幾危囉. 打個譬喻, 1/4 係絲苗白米, 再溝 1/4 米糠, 后加 1/2 化學米煲俾你食, 話平均都食你唔死, 仲有啲營養添. 一路聽真係有滴汗既感覺, 好似入咗盤絲洞一樣, 隔離嗰個仲點緊頭, 都唔知點去搭嗲好. 心諗, 咁荀, 不如將貴行啲存款大部份投資係呢啲阿根庭呀, 委內瑞拉呀, 等等既債券去套息咪好和味, 仲駛乜 sell 嘢呢.

五六厘當然吸引,但債券投資與其說為增益,主打都係唔想蝕俾通脹姐,息多息少反而其次, 計都要計條總數啦, 唔係就好似啲雷曼債收咗幾年高息咪一鋪俾番佢囉. 網上能夠買到一啲美國短期美國國債 etf, 年總回報兩至四厘, 用嚟守都唔好要求咁多囉.基金本身要補番入面啲債, 而且受美息影響, 係將升既情况下短點都好過長, 調上嚟怕唔會過十巴仙呱.

如果啲債用外幣做結算, 咁就唔係買緊債, 而係買緊外幣囉.

無賴

睇番中央結算月結單,申請新股過數都要扣水, 仲揾笨過艇仔. 今次幫老媽子申請 845,雖則出師不利, 但用繳費靈唔駛 check 户口名稱出入, 中又易啲,更慳番使費.網上能登記 eipo 户口免重複填資料, 唔好好利用係咪哂啲呢.

有網友上星期仲担心緊抽唔到 ipo 啲飛,銀行艇仔又唔俾抽飛, 七上八落. 其實銀行有提供 void支票服務, 肯俾數填吓表就得. 再無賴咪唔入數或將扣數户口啲錢調哂, 咪申請唔到囉. 要知道此等行為唔係唔合法, 其他方法亦如是. 股神通知香江監管都用平郵迂迴十幾日去慢慢沽, 投機講明係詭道, 咁老實係咪傻啲呢. 再進一步嚟講, 你唔爭取, 係唔會有人真正會 serve 你既.

有網友做廠, 話緊九月接到大單要趕工, 怕且電力股港口股可以追吓落后囉.

對稱

845 一開市 3.5 尾附近, 計落應該無咁弱, 雖則大市冧緊, 忍一忍先. 手邊咁多手, 有懷疑, 通常先沽一半減低風險先. 未幾升升吓, 於 3.6x - 3.7x 先沽一半. 午前最高 3.81, 諗前幾日咁肉酸嗰啲都升多四五巴仙 mark 價, 估計應去到減十嗰個位附近, 食反前 set 3.85 后行街去, 兩點八九承咗, 最高去到 3.91, 收市 3.76.

沽之前見有網友話呢隻係好嘢, 睇四蚊去得番招股價可以慢慢買. 自己見佢個勢又唔係咁差, 係唔係可以等等呢. 但先前抽到一手兩手就手起刀落, 今次猶疑就因為揸得多得濟. 賭就係賭, 唔通即刻拎起本招股書去研究投資嗎. 古人都講過先求勝才求戰, 衰咗仲求乜鬼戰, 有秩序撤退才是緊要, 加注就更加唔駛諗, 愈陷愈深嗰時咪仲尷尬.

先前都講過, 正既派唔多或根本抽唔到, 獲利微不足道; 衰既就派到十至廿三十巴仙, 滿手蝕到眼坦坦. 不要提證券行留貨自肥, 截飛前有乜大户抽飛落幾多注散仔都唔會知呱. 咁似黑箱作業, 即係贏既就少少, 輸既就多多, 亂咁賭遲早清枱. 最簡單應付方法就係揀筍既先落相對大注, 雖然贏唔得多, 但跟莊大注點都撈得多少少, 破發亦能守耐啲, 最衰咪長揸囉, 同佢鬥長命. 無把握既咪唔抽慳番啲心力, 或落兩三注解吓賭癮咪算囉, 止蝕都無咁痛. 莫息當然無奈, 但世間無焗賭, 亂咁賭實輸.

再推論落去, 投行銀行有毒債估價, 外邊散仔知無, 爆緊仲 sell 緊俾你. 買公司債剩係可以賣俾銀行, 銀行就能夠以好價賣俾其他大行或者其他散仔. 如果你賭緊個局啲對手知得多過你, 或者你要讓半臂同佢雙手雙腳打, 就要小心囉. 想減低銀行風險, 減人工不如將所有收埋既衍生標準化去上版等價錢講俾你聽好過囉.

百萬倉-破發

大市升又升唔上, 跌又跌不破, 消息時好時壞, 雖則大都睇淡啲起碼回一回先, 照咁睇路紙似乎仲有得去, 高追就預留啲嚟守囉. 資金有啲似强弩之末, 向上如真係做雙頂怕要調遠啲囉.

惠理炒預期, 細股人氣散咗都幾難守, 拎嚟投資要細注碼睇位加, 未到引爆點住. 宏利跑輸保險指數, 經上年一役仲點會同股票談情, 要計吓數.

呢排隻隻新股都破發, 十就係起碼, 廿三十亦時見. 孖既隨時抽到五或竟至十以上, 用十萬到五十萬去抽會派到五萬至五十萬新股實貨或至以上搞到去補水, 咁既驚喜又點唔會急急去沽. 可見啲公司餓狗搶屎, 都癈事再炒高去批, mark 高即刻去還債填氹好過, 都唔駛理之后有冇人落嗒囉.

本人有幸全中所有最近潛水王, 匹克同華南城已差不多全殲咗條唯一有得賺既金魚, 最后被焜既恆盛仲派到歴史記録咁多手, 抽咁耐都未試過咁惡劣, 搞到要狠狠倒蝕出去. 呢一堂真係幾貴, 講明呢個世界真係無 easy 錢同必賺既嘢, 要賭都要做吓功課, 揀啲有把握既先嚟賭, 連中投都中招名人效應怕且都只不過是引人落嗒工具. 如果上咗市你都一定唔會買既, 用實銀甚至孖展去抽係咪危啲呢, 心中無個底點去炒, 狠心止蝕真係幾痛.

時

古人以日夜計時, 再延一年循環做結. 古代數百年如一, 所以有啲古人想時間只轉圈而已, 重複舊事姐. 度吓度吓, 以水漏計日有長有短, 用機械鐘計則又準啲, 而家就用到原子鐘咁話.

現實所見之鐘有一定程度同步性, 但落到而家最準嗰啲鐘過咗某千年亦無可能報緊同一個數, 咁只有假定宇宙有一個勻速既鐘, 宇宙每一點都有效, 時間就好似流水一樣流過所有事, 而對之有所作用, 其他鐘既同步性假設才有立足處. 以上為經典物理學對時間之說. 通常絶對呢樣嘢, 都只不過一種懶惰既假設或者對完美的一種執着而已.

相對論已證明唔同運動或重力狀態下既參考系統 (以叧一個嚟睇) 既時間變動速度都會不同, 所以絶對既鐘不會存在, 亦不需要. 只能說於每一個參考系統的鐘都是有效的 (即附合物理定律), 而各個參考系統亦可以轉換且都是等價的, 雖則講緊既好像不同.

咁縮到去一個參考系統裏, 咁到底時間係乜呢? 設想一個不老既觀察者封閉係一個密封既鐵箱入面, 牆上掛住一個時分秒鐘, 一路觀察住. 如果佢有記憶既話, 佢就會得出結論話世界是死寂的, 只有一種"時間" 既嘢來回伸縮, 將個鐘同自己記憶撥完一次又一次而已. 如果連個鐘都無, 個觀察者只意識到自己, 根本無需要假定時間既存在. 如果嗰個觀者係無記憶既話, 時間更加無從說起.

所以時間只存在於有記憶觀察者能觀運動中, 於神眼中時間只不過三維一樣可以前后穿越, 無所謂進行式. 如果一個心靈用星跟星距離做時間刻度, 到一日如宇宙再嚟縮番, 時間咪調轉番行囉; 全部縮番去奇點, 仲有乜鬼時間呢?

空

有實體之空, 抑只有衍生之空而已? 如謂實, 無物已可獨立於天地, 即是何所指? 又有何用?

說宇宙之外有一大空, 既然無物無光, 無物可載, 又怎算係空? 跟問起點前之時間一樣, 根本就不對題或無得答. 如果說可載為空既第一性, 可調轉嚟講空為所見物之第一假定而已. 話 a 君存在於某空間, 同等地即用某數把間尺叠埋去度姐, 就算用光束去度, 也只不過用另一種物光子去砌條數而已. 把間尺有時長, 有時短 (調較只不過跟另一物比較而已, 推論一樣), 光子撞歪走樣避免唔到, 唔通空間咁客觀咁就法上法落. 所以與其說空係實, 不如認清空只是物既另一面. 如果嗰道有空, 咁嗰道必有物, 無所謂絶對既空.

見到前面夠蛋糕, 好似唔點郁, 宏觀上都當啱既. 但微觀咁睇, 只不過概然地係呢到姐, 唔排除佢某一刻佢會係隔離房閃一閃, 係微觀世界呢個現像會更明顯. 所以每個物都會產生一夠雲狀物, 愈遠愈稀, 空就係各雲重叠而成, 矇矇鬆鬆郤內裏有物, 當然有啲空會比較實呱.

抽資

剛傾吓幾時班水, 吹吹吓就即喱了, 今年啲節奏就係咁快, 仲未慣? 一個消息可睇成正又得, 負又得, 如果唔係企得穩, 支拐杖又點拎得走喎. 所以遲啲真係加番息, 我都仍認為係利好架, 但短線借勢調整就點都要受啲. 如果仲要加啲新既 plan 嚟救亡, 咪仲驚.

個個話而家美紙做咗第二隻日元, 長期睇淡, 直沽可也. 但日元受制於人, 花旗第一霸權點諗先至係真. 如直線死哂, 揾鬼買入去喳嚤; 再加輸入通脹, 點向國民交代, 無端端又多夠魚. 而且又開始抽水, 加番啲息口留吓啲散仔點都要做吓門面呱, 所以中長期美息長期低過日元怕且無乜可能. 雖則長期陰陰跌去賴債引資, 但挾淡倉必然幾個月喱番一次, 係沽真係唔好哂冷沽, 要等好位慢慢嚟做嘢. 商品用嚟代美紙儲嘢, 穩過玩外幣呱, 睇嚟睇去啲錢都係虛虛地.

斷估-牛市

用咗兩個月, 今日終於突破中位 21192 点高收, 技術上已肯定喱次係牛一, 而唔係熊二反彈. 所以而家唔係除非出現强力反證, 即係大大跌破牛熊為止. 咁樣分析啲人怕且都覺得幾兒嬉, 但咁多信號都唔信, 都無乜好講了. 其實萬物都可歸於數, 自己都覺得神秘架.

坊間都知牛市中每逢調整應係吸嘢, 熊就反轉趁高減持. 但睇上次牛一過萬三后到頂只去到萬四就跟住急調回牛熊, 中間回旋只七八個而已. 而家牛熊萬六左右, 現距三十三個, 不能說没有壓力, 所以明天直調都不出奇. 波幅唔係話唔可以食, 但以炒股既技巧去限制住回調風險似乎穩啲, 例如本人已接近風險上限, 驚但又想食向上既波幅, 咁就每個新加既注咪即刻落番個止蝕盤先囉, 臨場做只怕猶疑累事. 如真係扑中, 就每天將止蝕推高便可, 可能唔好彩一入即輸, 但想贏点都要俾少少代價 呱. 如而家你滿手茄薯, 咁樣炒向上回報点都好過抽新股既. 21192 要睇實啲, 破番九成嚟了.

如果調調吓炒個啲都止得七七八八, 咁長期喳嗰啲都可以沽番少少出嚟, 假定彈嚟彈去都破唔到第一個止蝕位. 以炒既信號應更能捉到中期調回牛熊呱, 唔係跟住幾年都幾難追得番大市囉.

如唔想咁博, 就等兩萬樓下牛熊附近盡量買囉, 怕且係最后機會囉, 中間咪抽下新股, 有貨咪沽下 cover call option 收下 pace 囉, 下年第一季前都做唒呱.

日元

日元係咁升, 旋踵已近九十. 以前股市通常跌個不亦樂乎, 但金市又升, 乜都升, 唯一肯定就係各人係到掟緊美紙, 通脹之勢可能比預想中嚟得更快.

傳聞頗多投資者已入緊花旗樓市啲貨尾, 而家賺埋滙水, 樓市可能更快觸底. 但如若惡性通脹, 股市遲早亦會泱及池魚, 記住通脹升會帶動低 pe 囉. 似乎資源股同樓市相関股可以諗多啲.

爭分

有啲人話要絶對回報, 但跑得貼大市已超難, 何況仲要跑贏十幾个, 話要每年回報要近三十巴仙, 發夢無咁早呱.

就算每年跑贏少少, 積番十幾廿年就幾倍, 看似無可能, 但有人做到, 亦無需妄自菲薄, 事在人為而已.

傳統揀十零廿隻價值或者增長股全倉不理市高市低, 定期檢討, 就話能自動跑贏大市. 此法九成基金經理自己都做唔喱, 叫散仔去搞掂係咪無可能呢. 咁個結論必係揀股不如揀基金經理好過, 但之前有咗个臭豆腐, track records 太好都好似幾危. 嗰遊戲就喺十个爛橙揀个好既, 仲要保證佢跟住廿年要保持新鮮多汁, 都有少少似一啲神話囉, 懶啲既試吓揀幾件過咗四五年既分散吓, 但都要一路監察住呱. 如減去使費仲低過大市總回報, 咁平均買指數基金好過了.

理性來講投資者應瞓身買股嚟食哂長線增長, 雖則無乜邊个做得到, 包括埋股神在內. 但假定一个投資者唔去估市咁去全面持股, 長期嚟講佢應享有大市平均既回報. 但有時大市真喺顛得太離譜, 去到跟大勢爭四五十个甚或以上, 咁唔食係咪哂啲呢. 就算套現后仲要向上要一年內附近位入番機會都頗大, 因大勢唔會升得一樣快. 假定能食一半三十巴仙, 即能從調整中能跑贏大市 15%. 此等機會兩三年應有一次, 咁即係每年賺多五六个, 都唔好話唔爽. 難處係大市調整最深時能全部補回, 但做得哂前兩步都唔係阿嬋啦. 食唔到就次第補回囉, 貨太少就唔好亂食囉, 呢半年見唔少啦.

有現金係手要跑贏, 現金回報就要跑贏大市啦, 方法不離投機、套戥、及另類投資. 投機細細地玩影響不大, 玩大咗輸鋪勁可不易翻身, check 吓自己記録跑唔跑得贏先. 套戥於不同市場機會不多回報亦不大, 主機會都係賺合併前后價或賺資產及其衍生間價差, 后一種太專業怕且不會用囉, 前一種歷史回報高於大市, 但要記住大師都要用啲槓桿, 下次除 ipo外應會落吓注講吓. 另類投資 (對沖基金、林業 ...) 大都跑輸大市, 其最大作用係其不同步於大市, 當係張七八厘既債券怕近磅啲.

百萬倉-鐘擺

花旗發力追上, a 場郤急速調整, 香江正處冰火兩重天. 啲人話牛去熊來, 係都話熊二反彈完結似合理啲.

估計調整剛開始, 但換馬月尾做跟等靚位做長期所差無幾, 即做好過無做. 如係牛一走勢連中位都未破, 係既話就怕且未到中期頂住. 睇牛熊已由向下變冉冉向上, 自上年初屈向下第一次. 要知道大市猶如鐘擺, 而家係由要由剛到既合理擺到貴嗰邊, 講合理就要再等萬二下囉. 唔係話今次食硬, 但个勢七八成要向上, 去賭点可以包生仔先, 咁大个局蟹咗都無怨囉.

相

上 fb 一大樂趣就係睇下有乜新既相, 八卦下. 有啲乜鬼垃圾都放哂入面, 又有啲話要 re-touch 過先見得下人, 都唔知係影野定係畫緊野囉.

用數碼機影低幅相, 原汁原味咁就係唔係真呢? 只影到條女, 漏咗个男, 啲人怕且覺得唔夠真呱. 推而廣之, 係咪要攝哂全宇宙先算真呢. 所以所謂真只是某範圍既真而已, 大驚小怪, 都啱黑白邏輯既.

進一步, 用濾鏡將个天變藍啲咁算唔算原先既藍先? 塊面有粒暗瘡, 捽甩佢咁怕都唔係真呱. 但過咗幾十年假既都共認為係真囉, 眾人記憶怕且都如是. 調轉嚟諗, 如此人已亡, 点推論怕且分唔到邊張真邊張假呱, 懷疑始終都係得个疑字. 同一幅相假既可變為眾人概然地認為係真, 某記憶消失后反可變為死無对證既真. 記憶既然受願望感情所扭曲, 揾佢做真既驗證係咪危啲. 照堆論記憶愈少或減少之某些事反而變得更真, 不竟應有人操作緊呱.

和黄

睇幅幅圖和黄都跑輸哂大市, 3g 三年又三年已近十年, 長期擁躉怕且死得七七八八. 跟長江旗艦差天拱地, 收窄之期應不遠矣.

本人都間中用下 wifi 上網玩下 facebook 查查電郵, 站又少, 且行過啲就乜都做唔到. 而家成街智能手機, 唔用嚟上網咪好鬼哂. 再加 netbook 急速流行, 可見全球短期內數碼通訊必有爆炸性增長. 前幾年誓神每个下年要 breakeven, 今年郤閃閃縮縮扮蟹, 唔講就怕反似更加近磅囉.

先前係負資產, 但折下折下就十年, 怕且水份所剩無幾了. 正現金流除代表守得穩外, 即係喱夠野真喺可以善價而沽囉, 水浸金山之下呢啲買路錢資產大把人迫住要買. 个時和黄就唔係打折, 要拿溢價囉, 所以下年番一番可不會驚奇喎. 本人現已持有和黄.

XLF

唔駛番睇就知美國金融股呢幾年一定跑輸大市 (s&p 500), 但今年七月已見首次突破, 連沽神都買埋一份, 技術上不可謂不重要. 以前講過金融指數係全球領先指標, 呢幾年領教過点準啦, 信就要信全套呱. 而家斷估跟住花期金融股会跑贏大部份指數, 策略上逢低吸納, 前提當然而家係行緊牛啦, xlf 都係咁講.

做事

做一件事, 容易既可以變難, 難既亦能變易.

如果大方向已啱, 咁即係執行既問題而已. 最易混淆係手段當目的, 忘記初衷, 只糾纏於細節. 每一个主張必有人反對, 如个个應酬, 即係乜都唔駛做啦. 咁就共識下大方向先囉, 怕且都反唔到呱. ok, 既然咁樣唔得, 咁得唔得先, 唔啱, 你地不如講吓点做到先. 磨吓磨吓点都有啲嘢呱, 怕且再無籍口拖落去囉.

去行一个山, 有啲人著住隻拖鞋都爬到上去, 有啲左傾右傾擺哂陣, 虛咗幾年都係得个桔. 與其計吓有幾難, 不如望住大方向, 諗吓点兜路走下一步好過囉.

恐懼

升咗咁多, 又一路加貨, 計計數自己都有啲心虛. 見人地日日咁走, 21200 大关前又行人止步, 都咪話唔驚.

波幅易食, 但通常睇番記録都覺自己傻仔. 跌落去梗係唔会高興, 但仲有現金係手唔係買平啲嚤, 如果而家唔係高到升唔番去. 想大注汁都撈埋, 一升上去又變做傻仔了, 当然不做就賺唔到啲差價啦. 經過呢几年, 真正值得食既真係無几多次, 零四年一次, 零七年尾第二次同埋零八年十月个次囉. 熊市头尾或牛头調整急跌当然食得過, 但十个怕且都無一个食到呱, 其他更小波幅怕且更难食了, 起碼對我係囉. 食到当然开心, 但更多既就係沽過籠, 升番又唔憤氣去買回, 跟住就同市場拜拜囉, 呢几个月見唔少啦.

个市一日未升穿三萬二嚴格嚟講都未算係牛市, 但我就几肯定咁講, 而家全持貨既投資者差不多实跑贏九成以上玩票者(我未做得到), 当然能利用往后調整者梗係醒啲, 但本人上年玩都咁大都只係食到餸头餸尾, 跟住啲波幅都係讓賢好過囉, 反正大部份人既風險胃納應該係提高而唔係去炒, 百萬倉己經做咗示範啦, 正常人都几难接受, 或者覺得只係紙上談兵, 但出面倉不知死咗几多, 自己呃自己同埋順便騙旁人既又几多个, 如果連自己都唔信, 都唔知信邊个好囉.

个啲話要等跌破一萬先買, 佢地真係賺得到嗎? 个時咪又轉睇六七千囉, 食到啲小小小反彈又如何? 怕且咁黑仔开口中最尾都係个啲超蟹頑固者賺得多過呢啲口水尾囉.

百萬倉-分散

百萬倉再次大大跑贏大市, 似乎市況有啲狂. 估頂跟估底一樣難, 唔去估好過. 但無秩序力量洗得七七八八, 調轉去攻似乎贏面高啲. 集中注碼上年仆到直一直, 都係分散注碼好啲.

地產股無哂折讓, 美麗華雖然疏落, 仲有大把水位. 比較香江花旗石油股, 似乎个邊抵買得多囉, 資源股点都買啲睇下門口既. 內地金融賺得咁勁, 分散啲都好應該, 橫掂花旗金融股應剛剛起步, 水位可能多一啲. 要注意美股買賣時間以先一晚收市作準, 實際操作怕且有啲差距.

股價,棉花,與尼羅河密碼

為法國數學家 Benoit Mandelbrot 著, 主研碎形幾何學, 旁及流體力學及現代金融學旁支. 書中道及主流金融學種種基本缺陷, 以及提出現实統計數據以修正金融學基本前提.

主流金融學前提為任何區間各事件為各獨立事項, 簡言之即沒有記憶現象. 形像化就似每次都跟擲公字一樣, 其結果即為 Guassian Distribution (Normal Distribution); 統計下之離散一變為 beta (相对大市升跌幅) 以量度風險及以設計各量化下之投資組合. 其象為一堆細小不一的沙堆, 沙粒有大有小, 但最大的則只大四五倍左右, 要找到石春機會微乎其微, 萬年怕只有一遇.

但实際數據則似乎不只有石春, 甚而有山丘, 道指及期貨百多年數據已爆了十多二十多次鑊, 證明主流前提大大低估重大風險出現頻率及其幅度. 形像化事件是一个於無重力下矇眼箭手隨機 180 度射向前面城牆及統計距離中点長度, 只要某一次极端偏向已可大大改變其平均值, 其分佈為 y= c x^(-r), c and r are constants and greater than zero.

其引伸為主流金融模型通常低估了風險之頻率及幅度, LTCM 同 AIG 爆煲都說億年一遇囉. 而因市場参與者都是有記億及有不同風險取向及时間覌, 所以導致大上大落及有群聚現象. 作者反覆說道回報是不能預計的, 但風險應尽量避免及或然地能預計的. 又因各事件互為影響, 所以某些重要事件位置能影響以后圖表走向, 當然愈向后影響愈少. 不知的話還以為給 TA 做背書喱.

惠理-二

谷哥搜尋功能癈左, 都唔記得自己寫咗啲乜. 但人家喺历史高位放哂啲貨俾散仔, 到而家又想等个幾兩蚊去撈番, 喺唔喺天真啲呢.

惠理而家七八十倍 pe, 以前打死都唔會買. 但呢隻嘢資產喺招牌裏面, 前幾个月食西北風一二巴仙, 个市咁顛佢个爆炸性唔喺碎料. 組合有守有攻, 喱隻未炒起, 希望仲可以買低啲. 呢隻嘢大起大落, 注碼位置自己諗啦.

杜指今个星期尾九千都破埋, 全世界技術上都已向好, 雖則還未肯定經濟增長與否, 但似乎圖表已俾咗答案. 由三萬点跌落嚟就愈買愈低, 到萬四五郤清倉等再低啲買番, 而家又話高得不合理, 跌番先考慮再買過. 同一个價位, 半年內諗法剛好相反, 怕且都喺俾参考高低点所迷惑. 投機最緊要睇調整風險下既值博率. 而家正喺眾人調整想法迷糊之際, 做向上變做蟹当然有風險, 但比起走失隻牛就喺小毛囉. 最后个句, 升緊既就唔駛沽住, 跌番落嚟就沽番俾佢囉, 要諗定自己既撤退計劃嚟控制風險.

斷估-突破

今日終於突破最近黄金反彈 18890, 五十天線假突破己扼哂間呎黨啲貨, 指數向上很大可能觸及中位 21192 点, 一日不跌破 18890 位反覆可炒向上. 其实筆者受持貨比例影響, 跟主流一樣主觀希望能至少調回萬六邊再坐多啲, 漠視一浪高於一浪同從未跌破調整低位既事实, 錯失每次調整吸貨機會.

主觀上今次已七成認定為牛一, 只待破地獄谷 21192 位. 上破就唔會咁碎, 二萬三以上應可去到, 最高二萬六, 到時再計, 開始調諗都未遲, 升到咁高調整目標至少係牛熊線, 怕且嗰時應向上升破萬八未破二萬呱. 如果 21192 真喺破唔到, 就睇緊 18890 囉, 跌破就酌量減持.

以前到牛一頂前焦点都係另類主題, 上次喺零售濠江, 今次怕且喺緑色能源, 其实花旗民主黨主場通常都利科技股, nasdaq 怕都要做啲功課.

平均

几日前跌破五十天線, 以為深度調整來了, 怎知一个屈尾十就升番過千給你看. 既然跌來跌去都跌不到, 無了期等下去也不是了事, 怎都要想个行動計畫出來.

賭得大遇急調整就無得轉身, 反過來不加注扯到二萬一以上又怕變得更尷尬. 為今之計怕且只能適度平均加注, 假定此為牛一, 行了四个月怕且要至少行到下年第一季尾為止, 即還有大概還有六至八个月運行; 每月可加五至十巴仙貨, 直至風險上限為止. 就算黑仔遇正急速回調, 應還有至少三成以上現金來守及再等低位吸貨, 雖然不能全面買到最低, 但現價兩三年后應不算高, 儲一部份蟹貨怎都好過全面錯失迷糊牛一既.

趕錢

昨晚反局談到樓市, 經紀朋友說現比上年初更火爆, 差不多已無盤可推. 問到買家為何買得咁快, 主因是几百萬放在銀行收息实在太少, 不如一炮過買樓收四五厘息好過囉.

另一要点買得最多最勇的都是大陸客, 大陸銀根對香江樓股影響怕且大過想像. 如果信心只靠愈升愈高, 似乎有些支撑不到.

陰謀

外人喱香江食反見个个反前洗碗, o 哂嘴. 日常唸人之性善, 但連身边既都要防, 做出嚟剛剛相反.

而家大陸冧樓又有, 大頭賢石 bb 又有, 防人說大話浪費多少精力. 圣人說做人要誠, 但疑人已自不誠矣. 香江都有啲危, 大陸真唔知从何做起.

道徳基石如何高尚, 但導出散沙一盤, 自私自利, 几千年都喺咁又有何用. 荀子立足剛相反, 統治只用階級和蟹, 性惡口中否定, 但日常暴力已用之. 原意德為人為之度, 因時制宜. 人性物欲之性, 不節制統攝必致生亂. 所以人必日以學日洎德智之性, 日常亦要習禮以內充之.

以前仲有祠堂做吓仪禮, 現在公司要賺又点会講禮, 學校已變职業訓練所, 唔通上吓 internet 或睇电視可以習禮嗎? 習禮又無錢賺咁諗当喺傻仔, 什都向錢看又怎会有遠略.

百萬倉 - 半年結

大市由年初爬升二十八巴仙强, 而家个个等二萬渣都食埋. 回想第一季尾大家等第二浪, 死等穿萬一点, 自己都企定, 怕且到一萬又要退到八千五囉. 个市咁易估仲駛乜返工喎.

錢太多浪又食唔多, 唯有炒新股去. 是否到頂莫宰羊, 但亂咁抽通常有啲不妙.

回看倉內中資跑贏港股, 更跑贏外國金融股, 下次真係跌番知買啲乜啦.

波兒

霸王个廣告甘搞笑, 但食住个資金浪上市, 竟無厘头申請高达几百倍. 初头都猶疑好無抽, 但大注抽, 攞到都怕且都唔会多, 咁混水摸魚又何妨, 肯止蝕就得囉, 又唔喺同佢做人世.

动 L 怕已成經典, 但唔知道喺幫忙定喺幫倒忙. 有啲人滿口淫义道德, 但連抹咀都唔識, 仲要話比人屈, 喱啲就喺真男人囉.

紀律

反局間常被問对后市睇法, 質疑的会反問如咁準為何不早清倉或滿倉食到尽. 此时必然收口, 不是報告何必需要向人解釋, 説了也怕当被帶花园而已.

好似而家睇將会調整, 但是否啱緊, 咁怕且又未必. 如果全沽个市再挾要追又頗尷尬了. 理性來説每个主張都应有存疑地方, 但唔用以行动又諗來何用. 用番前人物理或財務公式, 落注比例应跟機会率成比例. 例如我估今次破二萬机率低过三成, 所以最高持貨不应超过七成. 反之亦睇破萬六大概三至四成左右, 所以持貨亦不应低於四成. 要知道投資不是要十战十胜, 最要緊唔太脫腳. 假如認為股市是謀人寺或持末日論者, 点講都喺無用, 有啲人成世都否定之, 有啲五分鐘就把握到了.

太多人都認為自己能知道个市点走或值多少, 一就喺死等劝人唔好爛賭, 一就喺晒冷賭鋪勁, 但要知道一串長 Q 只要甩轆一次就無得玩囉, 死左个市点升或你点叻你都已完全 out of the game. 不自誇,不貪心及对市場謙卑可是保命符喎.

斷估-唞氣

月初 18889 及 12 號 18890 做左个小反彈双頂, 離上年底部 11015 7875 点. 今次大反彈至小黃金比例而止, 暗示牛一仍然未到或起碼來个大調整先. 1/3 及 1/2 調整為 16265 及 14952, 所以今次怕且要到萬六先. 但大户力托半年結前, 陰陰跌下怕要拖到月尾囉.

回看美市未到九千已腳軟, 喱个反彈頗為無勢. 啲人又重 sell de-coupling 美熊新兴牛, 真喺吾知大花筒吾再駛錢淨靠基建全球点能增長, 話第三季樓價喘定或可, 再重新賺到或再按到似乎太快, 就算六个月后都喺甘話.

但先前双底已成, 啲錢又甘多, 無貨就趁機補番三四成先. 上次 15700 守咗甘耐, 应几强, 年初个位怕且已變上下波幅底, 吾好再墮入要喺最低位先買, 投資短輸有乜所謂, 吾喺最貴就得囉.

交叉

網上股民萬五六清晒倉, 打游撃炒吓三四綫, 七上七落. 但日日睇淡个市連十天線都吾肯破, 心理上睇慣咗就吾覺得高囉, 逐漸改變睇法上望至二萬上牛市已至.

十日內黃金交叉將至, 但先前已大升, 難道又要一口氣升到氣絶為止, 要知道上次牛一都行過成年, 就算喺都怕且無甘快呱. 今次斷估反高潮來个大調整先, 怕且萬六五十天線樓下先.

一点

一無所有

原則

見到个市喺咁升, 今日又跌一跌, 都吾好話吾想沽番啲出嚟. 但回頭一諗, 喱兩年嚟真喺沽既次數又唔喺咁多, 彈上彈落無可避免, 波幅賺得不算多, 但亦唔駛諗住点調轉去沽, 自己技术吾夠用半臂怕且輸得無咁慘, 睇下喱兩个月啲淡友点被夾到上太空便知辛苦了.

上年初点解要沽貨, 估到熊市將撲過嚟, 吾閃都吾得啦. 旁證 817 大上大落, 高過牛熊四五十以上, 甘顛爆煲機會太大, 不避險就危啲囉. 而家沽吾喺吾得, 但經過喱幾年怕且再無人自信能夠做得曬全套. 其實如果無五十个以上沽落嚟食真喺無什作用. 跌落去吾食当然可借, 但比起給大市狠狠拋離点都好啲, 計吓下次如果喺牛頂無貨損失可大大高過而家上落之損失, 除笨怕且有少少精既. 所以今次被派都無辦法, 鬼叫自己未儲夠嚤. 除非个市真喺去到似 817 四成以上咁話, 咁有把握吾食就真喺幾难忍既. 食一半怕且都得既, 食吾到等慢慢上嚟應買得回呱.

百萬倉 - 長息

大市急速爬升, 坊間睇淡空倉得個恨字, 死熊做集結號炮灰的更不用説了.

全球股市升個不亦樂乎, 但債市狂跌更應注意, 十年美息短短一月從 2.6 厘爬升至最高 3.7 厘. 要知道猛印銀紙只為托住樓價僈僈買單, 短息跌到買菠蘿包都買吾到, 但市場投票長息要升, 自己升就話掂姐, 連政府猛㩒都控吾到, 想吾増加斷供都几難囉. 睇圖美市仍困於樓價, 死又死过了, 生又未又有氣, 牛一似乎未有根基住.

今次怕且是大型上落市, 但記住升市莫估頂, 吾食都吾好沽住, 挾到上火星可不太好玩囉.

斷估‧數字

翻看先前斷估篇，真係有点神奇，但沒執行力点準都賺吾到一分‧現神奇數字為 31368 及 11015，衍生中位 21192‧

(21192-11015)*2/3 + 11015 = 17800;

(31368-11015)*1/3 + 11015 = 17800;

看來神奇，但用代數計當然一樣‧上段意思即下區间最高反彈点為 17800点，上破則上番 21192 先，用簡易二萬乜都破了‧以歷史高位計破左一樣要到 21192‧可見此位為大阻力位，甚為關鍵‧破左雖則不一定是牛一，但成數更大，起碼可食波幅‧如係牛一，以經驗應上破 21192 及最高拋離牛熊三十至四十以上，今天牛熊於 17200 附近，即 22360 或 24080 更高‧此后反可安心等調回牛熊以全面入貨‧

坊閒等黄金交叉大升市，雖則 AH 已是‧但以经驗反而是中期急跌信號，15614 亦可再次去到‧回看美日港中市一年圖，美日港似未肯定，而且以歷史來說港市從未於美熊市中牛過， DJ 決定位九千，通常主人帶着狗，狗走得太遠便要勒回來了，輔助亦可看全國发电量，仍未見轉勢‧看圖月尾最遲六月初應有重要突破‧

未滿倉后悔低位入得太少，每想一調即補貨儲多些‧但萬二三任買縮手，萬五六就狂買都幾搞笑‧但一調怕且又縮手，只反映心怯而已‧如而家係牛一，估頂去沽就愚不可及了，沽都等超高先算，不夠貨就要忍手食多些‧如現家乜都無更要追，用價溝吾到，就決心每月買十巴仙趁調整逐漸買吧，反正一步不会到天‧如熊彈再跌過，除非你接近滿倉或瞓吾著要沽一部份，應趁機及至位再以優惠價入貨，反正今次彈已知無貨之苦了，有耐性的話知是走 L 或 W 哩‧

Greed, Fraud & Ignorance

閱讀上述中文版，作者作為貸款公司要員叙述美國次按食物鏈及其不負責任行為，甚至欺瞞及惡意詐騙‧簡單來說即將雞屎拌成雞肉沙律 (從按揭经紀至中介貸款公司)，再變成羊肉扒 (经評級公司及投行打包成 AAA 貸款債劵買給银行、保險公司及投資者)‧

匯豐龐約翰所說神奇軟件即各 Agency 或投行所設計之貸款評審軟件，但前頭輸入是垃圾，后面趕住賺亦不會翻查，反正樓價升便可過骨‧書中舉例零七年 Alt A 優質債短短半年急速惡化，違約率急升至 13.5 巴仙，遠超預期，再加莫錢下樓價下跌，壞賬必增多‧

次按通常頭段極低息引人落㗳，今年應是最多次按户調至正常高息，亦是最差時‧如無估錯，今年底樓價方開始企定‧

信號

升浪一路低水今天变高水，牛熊站得一日就落番，日元又升番，似乎大浪將快過預期‧

2800 今天罕有入十大成交榜，轉手為平時三倍左右‧

忠旺‧２

前文說過 IPO 破招股價已無得炒，何況暗盤開市已破，除非想炒向下‧真係大大破上再諗，有貨的近招股或趁反彈就打靶算囉‧要知道 IPO 是長玩長有，但今次要幾多有幾多，都幾尷尬，切記注碼要計過輸得起，小溝翻船可不是玩兒‧

斷估‧疑牛

淡友網上歛跡，猶如兩月前好友噤声‧持續突破阻力位 15614，亦后抽至上升最近低位萬四中，做足全套，上升極有勢‧一五零二百天線通通破曬，17362 牛熊線必碰到，爭在是否會突破‧

劇情發展至今，如果真係牛一，15614 便變為往后極强支持，近日急升，怕且点到會有一后抽再碰萬五中區頂，時閒可能頗急，自己要執生‧但今次熊市甘勁，牛熊就算破左拉下力度應頗勁，暫應去吾到太遠‧大市可能係萬五中至萬七中閒振盪消耗，策略上萬五中盡量吸一部份貨，如突破左肯定再追‧

如果今次又是熊彈，萬五中必大大摔破，貨多先前吸的可酌量减持等低些補回，貨少的就等低位買多些囉‧但上次双底形態太强，可能最低只去到萬二下就行人止步‧今次急升可视為基金補貨潮加水浸金山，外貿增長仍未見到‧但股市反邏輯同睇得早過你和我，不要用直觀死邏輯了，但盲沖沖全追貨也無須，就算牛一最尾都有个大調整，有本的怎會無機會，耐性最緊要，當然耐性太過就乜都無囉，要攞个中庸‧

冥冥

十天線破左二十天線頂住，怕且反彈已告一段落，先前保險落注死忍，蟹不多貨既不多就不走了‧反局討論過到大位時自自然然就有野发生，對應阻力調整，不旋踵便傳來墨西哥豬流感正在漫延‧

倒退加瘟疫為最佳創牛市組合，近的是沙士，遠的是 68 年香港大流感，67 年怕且是大跌市呱‧美國內傷，再不能点新火頭了‧今次機會難逢， Q 都 set 埋，如蟹左就死守囉，往后都應彈到呱‧

忠旺

忠旺 (1333) 係北車子公司，產品為火車系统所採用，食正基建浪‧最近低鋁錠價亦有利‧以上限 8.8 元招股作準及 0.48 盈利，PE 18.33 ，参考其他火車基建股有 20 以上至 25 左右，今次餓大型 IPO 太耐，投機性亦可一博，吾瞓身就得啦‧

Three Questions that Count

此為 Ken Fisher (Philips Fisher 兒子) 近作，有別於先前 Superstocks 專注小型反轉股分析，專注於宏觀策略分析，頗適用於一般投資者。

頭數章破常人投資迷思，人云所云‧例如常識偏向投資低 PE 股，但用日常數據驗證下只屬小部份 (R-sqr=0.2)，不是主要影響盈虧因素‧作者要人反覆驗證市場迷思，當眾人認為Ａ產生Ｂ便發生時，卻知道應大概是C，那你便有 edge 了‧

投資回報八成以上來自資產調配，只一成多由選股，所以常人應盡量貼近指標表現，除非極有信心市場過熱‧其指標通指為全球股票指數，亦可加新兴指數或各別 sector 指數，其組成為指數基金或個別龍頭股，個股投資不会過五巴仙‧投資者預期未來各國或 sectors 榮枯，會增加減少各比重去跑贏指標，但不會偏離先前比例太遠，估錯來年仲有得追，如脫脚十多巴仙就有排追囉，要知道連八成以上專業經理都跑輸‧

作者反覆告誡不要過份自信集中落注，決定前要諗諗衰左能否追回指標及接受到先‧以作者角度來說，而家肯定吾係清倉守現金時，反應要吸龍頭股貼市，入得早當然預輸，但升上去被甩開的風險更大﹔要知道海嘯后你仍有現金已跑贏大市二三十个，而家買已大賺差距了。

斷估‧迫叫

全球股市愈升愈有，無貨的如坐針顫，沽空的更不用說了‧

三月九号恆指築双底於 11345，高於上年低位 11016，相距四个半月差少少‧已確認為双底，亦顯示為一低高於一低之勢，為向好之跡象‧回看上兩次熊市形態，九一一后下一底 8700 創新低，往后反彈亦極弱至一萬就再跌直至歷史低位‧九七有四隻腳，一底低於一底，第二隻脚收八千上，最高反彈五成至萬二下，其第三隻脚反彈亦甚為無力‧每創歷史底位后，指數會以一底高於一底形式突破之前反彈阻力位為止，之后便变成牛市極强支持。

如上文話齋，似乎 15614 (上年十二月十一號) 反彈阻力形成時间仍未夠，今次可能反彈至左右為止，但双底已成及一底高於一底信号太强，而家吾追可能以后無得追‧最簡單莫於睇實最近既底來追貨了，而家咪係四月一号既 13520 及四月八号既 14475，跌破咪嘔回追左既再等，蝕咪當買保險‧

如而家你乜都無，跟零七年十月相反，建議往后点都要買番三四成貨做底，輸係其次，吾係跟住怕且無得玩，而家点算貴，由人稀萬一往上望當然反於二萬点往下望，吾好再墮入不跌到回就吾買既心魔囉‧

套戥

昨晚美股升到癲癲地，觀察以往宏利美收市同跟住港開市有一定溢價，跟先月剛相反，一於半夜起床拾番些零錢‧

計左七八日數據，預算能食二巴仙左右，多則四五，最差就平手全追回‧半夜扎醒於三時二十九分沽 MFC 於 104.62 港元，於港早上 AO 於 100 元補回全數，超出平均就不用等了‧遲些如果美沽家再沽宏利，香江價又溢於美市，又多張门券囉‧睇番收市先知美市於四時收市‧

昨勁升一千点，而家眾人又驚番無貨底，似乎要升到無人信為止，怕咪睇實五十天線先‧